Indopui pahnihna a zawh hnu lawk 1947-ah a piang a, 'Cold War' vanglaia USSR boruak sipai tha zinga mi; Soviet Air Force major general (soviet two star general ni pha), Vladimir Rodionovich Klitschko chuan fapa pahnih a nei a, 2011 khan khawvel chhuahsan tawh mah se, a fapate pahnih chanchin erawh khawvel ngaihven a la ni zel.
Khaw thlang mi hangten lal an hrawtna huangah Soviet fir thisen atanga zi chhuak, khaw chhak mi ngo unauin kum tam tak kal ta atangin lalthutthleng an luah tawh a, an peih chen chen heavyweaight boxing huangah an vawklallen a ni ber.
A upa zawk, feet 6 leh inchi 7-a sang, kum 42 mi Vitali Klitschko chuan December 16, 2013 khan Ukraine president nih a tum avangin WBC title a kawl lai kalsanin boxing chawlhsan zai a rel. Ukrainian politic-a eptu pawl lian ber UDAR (Ukrainian Democratic Alliance for Reform) Party leader niin, 2005 atangin tih tak takin politic a luhchilh tan a, Ukrainian parliament member ni mekin 2015 inthlanpuiah rorel lai paihthlaa president nih theih a inbeisei.
Vitali hi professional boxing world champion zinga lehkha thiamna lamah PhD degree nei hmasa ber a ni. 1996 khan zirna lamah graduate-in, National University, Kiev-ah postgradute a zir zawm a, February 2000 khan doctoral thesis "talent and sponsorship in sports" tih a ziah hmangin Sports Science huangah PhD hlan a ni.
Professional huangah mi 47 a hnek a, vawi 45 chakin 41 a knockout a, tum hnih a tlawm. A beih zawng zinga 87.23% a knockout a, Rocky Marciano (87.76) tluk lo deuhin heavyweight zinga an beih atanga chhuta knockout hnem ber dawttu a ni a, lehkha thiamna lamah PhD a nih avangin 'Dr Ironfist' tiin a hming lem an phuahsak.
Tute mahin an knockout ve lo a, vawi hnih tlawmin hliam vang ve ve a ni a, judge-te point pekah a sang zawk ve ve leh nghal. April 01, 2000 khan Chris Byrd nen inbeiin a dar hliam vangin round kuanaah a inhnukdawk a, hetah hian 89–82, 88–83, 88-83 in judge point pekah a sang a, professional huanga a tlawm hmasak ber a ni.
June 21, 2003 khan a hun laia title hraw kawl kim vek Briton Lennox Lewis nen inbeiin, round sarihna an tan hmain ringside doctor-in Vitali-a mitko kak atanga thisen chhuak nasa lutuk avangin inhnek a titawp.
Beih zui zel a duh avangin Ukrainian hi thinrim tak zet a, a chhan chu champion lai Lewis nen round ruk an inbeih tawha round liah chakin round hnih erawh British mi hangin a la ve thung. Beih nawn tumin hma an la nghal a, mahse, Lewis-a team lamin inremna an siam theih loh avangin WBC chuan January 2004 khan Lewis-a kut atangin WBC title an chhuhsak phah a, a hnu lawkah Lewis hian boxing a chawlhsan thu puangin Vitali a hlauh vang tiin an sawi zui nasa.
1996 Atlanta Olympic kha USSR a keh chhiat hnua Ukraine-in ama puala Games a hmachhawn hmasak ber a ni a, Vitali hi super heavyweight huangah ram aiawh tur ni mah se damdawi hman phal loh steroid a khawih tih hriat chhuah niin, a tel thei lo va, a hmun ruak hi a nau Wladimir chuan luah khatin gold medal a hnek chhuak nghe nghe.
Vitali chuan a ke hliam enkawl nan chauh steroid a khawih tih a sawi a, professional a luhchilh atangin damdawi hman phal loh zungzam amahah hmuh a ni tawh ngai lo. Mahse, Olympic gold medal erawh a awrh ve ta lo va, a hmingchhiatna hi a nau Wladimir-an a chhawr ve thung.
A u aiin feet 6 leh inchi 6-a sang Wladimir hi heavyweight boxing-ah a hlawhtling zawk tiin a sawi theih. 1980 chho tawp lama Soviet-in khawvel boxing awpbeh tuma thalai beiseiawm tam tak a hrual bing zingah Klitschko unau hi an tel a, chu chuan theihna, thiamna leh huaisenna kawngah nasa takin a tanpui tih hnial rual a ni lo.
Kum 37 mi Wladimir hian April 2006-ah Chris Byrd hnehin a kawl tawh IBF leh IBO kawnghren a la kir a, heta tang hian a hawi kir leh tawh lo. World title vawi 15 a humhim tawh a, tunah hian WBA (Super), IBF, WBO, IBO leh The Ring Heavyweight champion a ni a, a u kalsan tak WBC title chiah kawl loh a nei a, lak kim vek a tum a ni.
Boxing chanchina IBF, WBO leh IBO heavyweight title humhim rei ber ni mekin, heavyweight title chuha inhnek tam pathumna niin vawi 24 a inlan tawhah tum 22 chakin vawi hnih a tlawm a, Joe Louis (chak 26, tlawm 1) leh Muhammad Ali (24–3) chiah a tluk lo. Mi 64 bei tawhin 61 a chak a, 51 knockout-in tum thum a tlawm.
A u ang thovin lehkha thiam a ni a, 1996 khan graduate-in Kiev University-ah postgraduate a zir zawm. January 18, 2001 khan Sports Science huang atangin PhD (doctorate degree) hlan a ni ve leh bawk a, Wladimir hian tawng chi li Ukrainian, Russian, German leh English a thiam a, 'Dr Steelhammer' tiin a hming lem an phuahsak a ni.
Wladimir hian 1996 Olympic gold medal a lak lilamin dollar maktaduai khatin a hralh a, Ukrianian fahrah sang tel tanpui nan heng sum hi hman a duh vanga medal hi lilam a nih thu a sawi. Mahse, a hralh hnu lawkin a medal leitu chuan Wladimnir-a hnenah a pe let leh a, a chhan chu Klitschko chhungkuain kawl zui zel se a duh vang niin a sawi.
Kuttum hlauhawm, tute mahin an hneh hleih theih loh Klitschko unau hian heavyweight boxing chanchin an tidanglam nasa.