Ka rilru a ka thil vei thil pakhat YMA pem lehkha kan in pek dan hi ngaihtuah ngun deuh chu a ngaiin ka hria.He lehkha kan hman chhan ber ni a lang chu Ruihhlo zuartu leh Foreigner kan dona atanga lo awm ni ngei in a lang.Heti chung hian khawimaw laiah chuan Ruihhlo zuar leh Foreigner kan tih te chuan In luah tur an hmu ve reng tho ni chuan a lang.
Pem lehkha neilo chu In luah tir lo turin kan in hriattir chamchi a. Pem lehkha hi an nei thei zel ni maw? In luah tur chu an la hmu ve zel tho zawng a nih hi maw. Hemi chungchangah hian tu in nge mawh phur ta ber ang? Lehkha lo siam saktu khan nge ni ang a, a lo dawngsawng tu in tih hi chhut tham a tlingin ka hria. Ruihhlo zuartu an nih avanga kan veng atanga insawn chhuak tur te, an insawn chhan leh eizawnna diktak kan ziak ngam lo emaw, ziak lang duhlo emaw a nih chuan a lo dawngsawng tu tan chuan lo pawm loh ngawt emaw, In lo luahtir loh ngawt pawh kha thil awm ber pawh a ni lo ve thei a. Chuvang chuan Ruihhlo zuar an ni tih kan hriat chuan an lehkhaah pawh Ruihhlo zuar thin an ni tih kha ziak lang ta mai ila, chuti ni si lova, kan veng atanga chhuak tur a kan duh avanga veng danga kan in hnawtsawn kual mai mai a nih chuan Ruihhlo zuartu te hi kan vengah awmlo in, vengdang ah chuan awm mahse, kan pawiti lo tihna ani ang.
Ruihhlo zuartu te kan do a, foreigner kan duhlo anih tak zet chuan, pem lehkha hi awmze nei a kan hman hi a tha hle awm e. Mahni veng chhung chiah ngaihtuah lova Zoram pum ngaihtuah chung in thil tih ni thei se, Zoram pum hian kan thatpui thei zawkin a rinawm. Chutianga zoram pum ngaihtuaha kan hnam thatna kan duh a nih takzet chuan kan in hmun lo ram kan hralh chungchangah pawh hian kan fimkhur deuh chu a ngai hle awm e. Entirna pakhat han siam ta ila, tuemaw chuan an in hmun hralh a duh a, Chakma pakhatin emaw a lo lei a, tichuan chumi chuan kan vengchhungah, kan ramah in hmun lo ram rawn neiin foreigner kan tih te chuan min chenchilh ani ta mai a. Kan duh emaw duhlo emaw, kan vengah chuan foreigner an awm ta tho tho ani. Chutiang bawk in kan veng chhungah Ruihhlo zuar thin ten inhmun lo ram an neih chuan an mahni in leh lo atanga thil tih kha chu a awlsam zawk hle dawn tihna ani a. Chuvang chuan kan inhmun/lo/ram in lei leh hralh chungchangah pwh hian YMA te leh VC te hriatpuina te pawh hi a ngai ti ta ila, kan veng, kan khua, kan ram hnamdang mi lakah kan venghim in, kan chhan chhuak zawk ngei ang.
A CHHE LAI SIAMTHA TU
- VLH Chawngthu, 9862374870
Khawtlang nun siam that leh kristian chhungkua kan tih hi lakhran theih loh, inkawp tlat a ni. YMA in khawtlang nun siamthat tiin a puang a, kohhran pakhatin kristian chhungkua tiin hma an la mek bawk a. Khawtlang nun kan siam that dawn chuan mahniah bul tan in chhungkuaah, chhungkua atangin khawtlangah. Chhungkuaah tangkai tum si lo, pawnah chuan kei ber inti te chuan khawtlang nun an siam tha lo vang ,; kristian chhungkua an din hek lo vang. Chhungkaw tana thawk peih silovin hnatlan nikhua a kan thawh vak a kan chhungkua a tlakchhiat leh si chuan miin min nuih zat ang a, Chutiang chuan vengchhung ngaihtuah lek lo va vengpawn a kan thawh vak hian awm zia a nei lo. Nu leh pa leh aia upa zah thiam a, nu leh pa leh aia upa te pawhin naupang thu ngaichang lova mahni thu a kal tlang tum ringawt hi a finthlak ber lo a ni. Chuvangin inlungrual tak in ke i pen tlang ang u. Chutiang bawkin kan vengchhung a pawl hrang hrang, ate a lianin, thu leh hla inngai chang tawn ila, pawl lian deuhvin pawl te deuh ngainep a lehlam hawisan mai lo vin, in chawmdawl tawn zel i la, tlawmngaihna kawng ah pawh a chhe lai siam ho zel in, chutiang a kan tanrual chuan chhungkua leh khawtlang a lo nuam dawn ni. Kan ram leh hnam, khawtlang, chhungkua min rawn runtu hi do let ve tur hian Mizo nih mai a tawk lo, rinawmna leh thawhrimna, hmangaihna nen i do let ve ang u. In diriam leh inelrel mai lovin hmangaihna leh duhsakna inhlan tawn ila, nang khawtlangah ate ber leh mawl berah inngai mahla khawtlang hian thlauhthla hial che a i inhriat pawhin he khawtlang hian a mamawh che a, a chhe lai siam tha turin a nghak reng a che.
Nang a chhe lai siam thatu ni ang che.