Tun atanga kum 50 awm leh tura kan veng Chanmari West awmdan tur i han thlirlawk teh ang. (Kan Lalpa Isua Krista a lo la kal lo anih hlauh chuan leh lirnghingin min la sawp chhe lo te anih chuan) Kan veng hi Aizawlah pawh veng lian pawl tak alo ni ve ta reng mai a, Presbyterian kohhran phei chuan kohhran indan tumin hma a la mek a, Biakin thar tur pawh an sa tlut tlut tawh a nih hi. Mizoram hmar lamah hian Presbyterian hi kohhran lian ber niin, kohhran an indan hian a hnu lawkah vengthar/ VC thar a piang zui deuh zel a, Chanmari West ngei pawh 1986 ah Chanmari kohhran atanga Presbyterian kohhran Preaching Station a awm tanin, 1988-ah VC hran neiin 1990-ah YMA Branch thar a lo awm ta anih kha.
Kum 50 a lo vei meuh chuan Chanmari West ah pawh hian YMA Branch 4 (pali) a awm tawh ang a, chu’ng Branch pali te chu CHAN Branch YMA, MA Branch YMA, RI Branch YMA leh WEST Branch YMA tih hming pute pawh anni mai thei. YMA Branch hran ni tawh mah sela Joint YMA-in nghet takin a suihkhawm reng ang.
Power chungchang: Kan sawrkar hmalak mekna Tuirial Hydel Project MW 160 pe chhuak thei te, Chhimtuipui Hydel project MW 300 chuang pe chhuak thei tura ruahman te hi peihfel vek a ni tawh ang a, power supply ah chuan kan hnianghnar tawh ngawt ang. Tin, Meidum khua leh a chhehvela ONGC Gas laihchhuahna hmunpui atang hian Oil leh Natural Gas tam tawk tak tharchhuah a ni tawh bawk ang, chhim lamah pawh kan hman sen loh an siak chhuak rei rui tawh dawn a ni. Hei vang hian tunlai a Gas harsatna ang hi sawi tur a awm tawh lo anga, In tinah Gas connection (Electric wiring ang hian) a awm tawh ang a, Gas Cylinder put ngai tawh lovin a hmunpui atangin Pipe-in a inzawm vek tawh dawn a, duh hun huna on mai tur a ni tawh ang.
solar energy: Power supply an hnianghnar tawh dawn avangin thil tih theih loh a awm tawh lovang a, kan veng atanga Ni chhuak en tura khawthlang lam hawi ngai ziah pawh hi a reh tawh ang. Engvangin, Engtin maw ? Ele Rangvamual chung zawn velah khuan ni chhuah veleha kan veng rawn kap eng tur Solar Plate (darthlalang chikhat ti mai ang) an dah ang a, chu chuan thlasik lai pawhin ni chhuah hun zing dar 10/11 vel nghah kher ngai lovin chhuah lamin ni chhuak an hmuh veleh a rawn en ve nghal ut tawh mai dawn a ni. A ban (post) phun dan tur leh a inkhaikan dan tur velah ilo buai a ni maw ? buai duh suh, thangtharte finna a sang tawh lutuk! tunah pawh US unaute chuan Sikeisen programme hial an neih tawh hi!! He solar plate hi source of energy turu lutuk mai a ni dawn a, (Mizo tawngin a daih tlat lo, sap tawng kan zep zeuh zeuh ang, thil a changkang tawh dawn lutuk a, lo hrethiam mai teh u) he thil tangkai tak hi Pu Germanruna (L) thlah kal zel ten Israel leh Arab innghirngho dan an zir chianna lama an indona weapon chi khat atanga an hmuhchhuah a ni nghe nghe. He thil hi kan tlaklam unau Tuikual veng etc ten an awt em em ang, a Blueprint neih ve dan phet an ngaihtuah ang a, an hmuchhuak ve thei si lo ang. He Solar Plate hi Sector chi hrang 139 a thensawm niin, Sector khatah ngawt pawh hian sub-circuit leh cabinet sing chuang zet a awm ang. YMA Branch committee phalna in a Blueprint Sector XL pakhat chauh pawh cheng nuai sawmnga zelin an hralh chhuak ang a, chu chu section YMA sumtuakna chikhat a ni ang. (Pu Lianchhuna leh Pu T.Bualzika te hova iei laia YMA sumtuak ngawt ai chuan a hlawk deuh ngei ang!) He Solar Energy hian power tam lutuk a pechhuak dawn a, vengchhung ta bil anih dawn avangin Tuirial, Bairabi etc atanga a power supply te chu a hming chauhin an hmang ve ang.
YMA park: YMA Park chungah hian Multi Purpose Centre zau tak mai siam a ni ang a, tuna Zawlbuk building hi ban thlang lam kilkhat a hmangin Kawrpui lam Khaungchera section YMA bungraw dahna velah hian ban kil lehlam a ding luah bawk ang, Pu Zarzoenga te inbul kawngpui rual/zawl hian hmun zawl zau tak siam a ni ang a, chu hmun chu khawl chi hrang hrang inbun khawmna hmunpui leh khawtlang thil chi hrang hrang tihkhawmna hmun a ni ang. He construction turu lutuk hi Pu J.Lalrova ‘V’ leh Pu K.Lalramhluna ‘CH’ thlah kal zel joint family ten an din “J&K Construction Company, cw,azl. pvt.ltd” ten hlawkna um miah lovin, vengchhung tana rohlu tur anih hria in a sak hna hi an thawk ang. Park-a thingte hi a thih mai ilo hlau deuh a ni maw? hlauh thawn tur a awm lo, boruak thianghlim leh ni eng leh ruahtui duhthusam hmu thei a siamin, Green House changkang lutuk a ni ringawt ang.
chhiatni thatni: Kan hnam culture hlu em em chhiatni thatni a kan in buaipui dan hi chhawm nun zel a ni ang a, tun ai hian tlawmngaihna pawh a nasa tawh zawk ang. Mahse ‘kan tih dan hlui’ ang diak diak hi a chhawm theih tawh dawn lo va.Mitthi an awmin Multi Purpose Centre-ah ruang dah a ni ang a, lumen ngai pawh hetah hian lumen niin, Band chi hrang hrang, musical instrument chikim changkang lutuk nen hetih hun laia hla hit lutuk tur “Lungngaih tahna ka pelh hunin...” tih hla te chu an sa dup dup ang a, nula tlangval mitthi lumenna a kal nachang hre lo te chu an endawng tawh ang. Multi Purpose atang hian kan thlanmual panna tur Ropeway a thlur sung ang a, mitthi vui pawh ropeway ah hlir an tawlh tawh mai dawn a ni. He Ropeway thlur khatah hian thlan laihna khawl vuah a ni ang a, thlan size chi hrang hrang 7’x3’, 5’x2’ leh hlamzuih thlan size 3’x2’ te awm in, he khawl hian duhna lai takah leivung hipchhuak in, line nalh lutukin thlan a lai tawh mai dawn a, tlangval tlawmngai thlanlai tura in punkhawm a ngai tawh lovang.Kuang siamna tur thingzai a awm tawh dawn loh avangin Plastic kuang mawihnai tak leh zang tak hman a ni tawh bawk ang.
mihring pianphung: Ei leh in ah leh hriselna chungchang thu ah thangtharte an uluk tawh avangin mihring an lian in an vun rawng pawh a nalh tlangpui tawh dawn a, mipa rawlthar feet ruk vel leh hmeichhe tleirawl feet nga leh a chanve vel an ni tlangpui ang. Hetih lai hian Pu Sangzuala s/o Pu Hlira ‘T’ leh Pa Vena ‘V’section te thlah kal zel te vun rawng erawh a danglam chuang vakin a rinawm lem lova, Pu Muantea ‘K’ section tu leh fa te pawh chuti teh ual a an len erawh ring duh hek suh. Chutih laiin Pu Zawma, f/o CHDA ‘N’ section thlah kal zel te erawh chu an sang it it hle ang a, Pu C. Chawiliana tuchhuan te pawh an pi ( Pi Buati) lamah kal in Wrestler Mark Henry emaw Big Show emaw tiat tiat an ni tlangpui thung ang.
faina lam: Khawtlang thianghlimna lamah mawlh hian an chhuanawm, Singapore kal thin ten an khawlai faizia hahipa an sawi thin ang mai hi a ni tawh ang a, “hmanlai kan pi leh pute hunah chuan khawilaiah hian ui an chhuak thin a, kawngpui dungah an duh na lai lai ah an e thin” tih te chu nuihzat takin fiamthu thawh nan an hmang tawh ang. Kawrpui rimchhe tak te leh khawi lai hmun emaw a septic tank rim nam vut vut thin te hi awm tawh lovin pangpar rimtui tak rim a nam chek tawh ang.
committee koh: Kan Branch YMA piantirh lai te kha chuan mobile phone chu sawi loh telephone nei kha in hnih in thum bak an awm lova, comt koh te hi a’n hahtlak mai mai thin khawp a, kal char char in, chawl miah lovin minute 57 ah ka sem chhuak hman hram thin (Pu Thlanga, JD (OP) Transport-in KTP Souvenir-ah khan minute 40 sem a ti) Kum 50 hnu ah chuan hun a hlut tawh dawn em avangin awmhmun atangin E-Mail through in “Zan in dar 10:38 - 11:27 PM ah Branch YMA committee meeting Video Conference hmangin neih tur a ni a, computer lo ready vek tur” an ti tawh ang a, Multi Purpose Centre atangin On/Off switch hmangin an control tawh mai dawn a ni. Pu T. Zorampela hi la dam thleng ngat sela chuan comt. kal taima zinga mi a ni ve ngei ang.
in kal pawh na: K section leh N section mawng atang pawhin Bazar kal a huphurh awm tawh dawn lova, Escalator (Millenium a mi ang) hmangin tar te te te pawh an tawlh chhuk/chho zung zung tawh ang a, mu ang in thlawk em lo mah sela, chau lovin ke in an kal tawh ang.
He hun hi tuna kum 20/30 kai tawh chin te hi chuan kan hmu ve phak tawh dawn lova, la dam chhun an awm anih pawh in ‘tar chhia’ kan tih ang hi an ni tawh ngei ang.