Khatia mahni pian seilena venga VC election-a vawihnih lai mai ka tlak dup hnu khan hruaitu ni lovin mipui ni tur ka ni tih hi hrilhfiah hranpa leh chuan ngai lo hian ka hre ve thiam. VC inthlan hi awm leh thin pawh nise in tarlan ve leh chiah ka ngai tawh lo. Hei VC chu Local Council-in a thlak ta si a, kan vengah hian VC member chu ka ni thei dawn ta lo tih hi Luka ziak tlukin a chiang ta.
Khawtlang hruaitu tur thlanna kan hmachhawn hian ‘house to house campaign’ hi ngai lo turah ka ngaia, candidate te reng reng hi vengchhungpa kan hmelhriat sa, khawtlang tana an hnathawh leh an inpek dan chin kan hriat sa anni tlangpui a. An lehkha semah thlalak, hming, pa hming, nupui te hming nen chiang takin an tarlanga. Mipangngai tan chuan in-a an rawn campaign kher loh hian rilru a siam theih. Mahse chuti chung chuan kan inah pawh tum hnih tum thum rawn lut an awm a, kan kalpui dan hi a hun laia lehkha zir peih si lo exam hall a tang leh thut ang chi nen hian ka khaikhin deuh.
Khawtlang hruaitu tur thlangtute hian ngaihtuahna kan seng peih lutuk lovin ka hria. Khawtlang hruaitu tur thlang na na na, biak inah khuang a pu thin, khawharinah thu a sawi peih, a hmel hi ka khawngaih zawng tak a ni. Kan party mi leh sa a ni a, kan khawchhuak a ni a, ka fate leh a fate an inkawm a, hmanah work camp-ah kan kal ho tawh a, kan kohhran lawina a in ang a, chi khat kan ni a, hmanah kan fapa leh an fanu an inngaizawng a, hmanah ngaihzawng kan lo intawm ti tih tawh a, ruahsur laiin nihliap min zawn tawh a tih vel avangin kan in vote leh ngawt thin.
Khawtlang hruaitu tur kan thlanchhuah dawn chuan kan khawtlang tan a finna, a theihna, a thiamna, a inpekna hi a tha ang em? Hmathlir a nei tha em? A rorel a lai ang em? Khawtlang tana tha lo tur huai takin a do ngam ang em? Khawtlang tana tha tur huai takin a bawhzui ngam ang em? A hun kal tawhah khawtlang tan eng tiangin nge ke a lo pen tawh tih te hi tehna kan hman tur zawk niawm tak a ni. Utawk pawh nise kan party mi leh sa a nih chuan ka vote tho ang tih ngaidan hi bansan a hun tawh hle niin kei chuan ka hria.
Inthlanna thianghlim lo hi Kristian kan nih vang leh mihring chhia leh tha hriatna nei kan nih avangin kan huain kan do ngam turah ka ngai a. Ka hriatchian ve em em chu, voter tu emawin a vote kha thlak lova rawn ak chhuakin a rawn zuara, mahni duhna takah mi vote kha thlak turin lei theih in a awm a, ka lei duh lova, mi dang a zawrha, an lei ta em chu ka hre lova, kha tiang kha lei loh tur a ni. A nihna takah chuan Police man tir tur a ni.
Tlin kan duh avang hian zu leh sa, pawisa dik lo taka chelek kan hnial lova, mi vote thlak ai thlak pawh kan hreh lo thin, hetiang thil tha lo hi kan sim a hun tawh. Kohhran, YMA, MUP, MHIP leh thil dik leh tha duh pawl thilah kan inhmangin kan tha hle a, political party thila thil chhe deuh kan duh leh si hi kan sim tur pawimawh tak a ni.
Chanmari West-ah hian hmasawnna tur thil a lut lo a ni bik lo a, hmasawnna tura lo lut pawisa hi a thawh tur ang tak thawh tir loh vin, hlep tam kan duh luatah kawng, ko lungrem, luikawr rem etc hi a thawktute thawhchhiat avangin a tha lova, vantlangin thil chhia kan neih phah thin.
Thil chhia kan neih chhan hi sawrkar lam thiam loh nilovin biak in khata kan lawipuite thiam loh a ni zawk. Hetiang a lo nih thin avang hian step tlabalah kan ke kan bilh a, lungrem chimin kan kawng a hnawh ping a, kawr lungrem chhiat vangin kan inhmun a min a, ruahtui leh thildang puh tur kan zawng a, a bul kan chhui thleng lo thin. Khawtlang hruaitute hian khawtlang thil tur thawktuten an thawk tha lo a nih chuan siamthat tir ngam a, an thawh lai enpui a, sawisel ngai sawisel sak ngam a hun ta hle.
Tunah hian VC/LC vawiriat kan thlanna a ni a, kan thlantlin ten kan veng an enkawl tawh dan, dan leh thupek an lekkawh tawh dante kan la hre reng hlawmin ka ring a (Ui khawlaia chhuak i la hmu ngai em? In kalpawhna kawng a tha hlawmin i hria em? Luikawr a tha tawk em? Thil kalphung pangngai baka tha leh rotling vantlang min hnutchhiah em?)
India ram a changkang chho zela, Mizoram pawhin hma a sawn zel a, Chanmari West pawhin hma a sawn ve zel tur a ni. Kan veng hmasawn leh sawn loh hi mipuite kutah a tlem zawk a innghata, a tam zawk chu kan hruaitu atana kan thlantlinte kutah a innghat a ni.