A hmasain berin KAWIHRUILIAN kan chhat anga, SESAWM kan hling ang. A beitham deuh dawna kan rin chuan VANBAWNG kan hlin belh ang a; SETHLUM-ah kan thlung khawm ang. HREICHUK-in kan chekhlum ang a, LUNGPHER-ah LUNGCHEM-in kan chan darh anga, KHAWBEL-ah khung khawmin MUALLUNGTHU-ah kan chhuang ang. CHHAWRTUI kan leih anga; THINGLIAN kan tuah ang. HMUNNGHAK-ah kan innghakkhawmin CHAWLHHMUN-ah kan chawl anga; NISAPUI a tlak hnuin ZANLAWN-ah kan lawn ang a, SEKHUM-ah kan mu ang. KHAWZING-ah kan thovang a, LUNGDAR an vuak hunah ZAWNGIN-ah kan inkhawm ang. MUALPUI-ah mual inkhawm kan hmang anga, ZAINGEN hla sa turin kan ngen ang. KHUANGPUI leh KHUANGLUNG chumchilhin, RULLAM,SAILAM, LAMHERH, LAMCHHIP, LAMZAW, SELAM leh LAMTE an lam ang a. Chumi zawh chuan BUHCHANG kan chhum ang a; KAWLCHAW nen HNAHCHANG-ah kan khawrh ang . Mi mal mal chan tur insem nan HNAHTHIAL-in kan fun ang a, THLENGANG-ah kan dah khawm leh ang. HUALTU-in an kil ang a, SAIHA-in an thial ang a, TUIDAM-in kam kan thuah ang a; KHAWPUAR kan nih hlawm tawh dawn avangin kan hah lutuk loh nan ZALENGLUI-ah kan mu zal ang a, kan la puar lutuk cheu chuan REIEK-ah kan in e thawl ang a; puar ta fam chu kan tam leh hma chuan BUHBAN-ah kan pem ang a, chutah VANZAUTLANG bul mai a nih tawh avangin enghelh tur kan nei tawh dawn lova, TARPHO a ngei tawh lovanga, NEIHLOH a awm tawh dawn loh avangin ren hlek lovin CHENGPUI leh CHENGTE kan hmang hiau hiau tawh mai dawn a ni. A ropui dawn mang e.
(Heng thumal hawrawppuia kan dahte zinga a tam ber hi Mizoram-a khaw hming an ni hlawm a, ZALENGLUI erawh hi chu Serchhip ram chhunga lui pakhat hming a ni awm e) (Source- Dan leh Hrai Vol VII, Issue No. 11&12)