Kum 2012 hi kum dang aiin a danglam viau hran lo thei a, amaherawhchu, a hmangtu a zirin a danglamin, kum tha leh tha lo a ni thei viau ang. Leap year kum a nih avanga kum danglam ni tura ringtute rin ang chuan thil mak tak tak leh chhiatna chi hrang hrang a thleng a, kum pangngaia ngaitute tan pawh hetiang chu a thleng kumtin alawm a tih theih awm e.
Kan chanchinbu pawh hian a dan pangngaiin a kumtluanin a chhuah hunbi a chhiar kim a, kan thu chhuah pawh a chi hrang a tam a, thu tak inzirna tling atanga thu ho mai mai kan hrut viau a ni. Thil pakhat chauh han zep lawk ila, ‘Pasaltha Vrs Pasal tha’ tih Pu Lalnunthara Sailo ziak YMA AW a kan chhuah kha Pi Manghaki, Pu Hruaia VL thiannuin a la na deuh a ni ang, YMA AW copy ruk leh Pathara thlalak a hal niawmin kan lo hria a, chhui chiang turin Ngawireng pawl chuan facebook specialist Hmingliana a tir ta a, ani pawh chu inla detective takin vengthlangah a zuk kal a.
A hminga chhungkaw pain an fridge kawngkhara ramhuai tuibur a dah chu a hmu fuh pek a (In neitupa hi chuan in atan a ti lo, rawngbawltu a ni tlat), a thil chhui tur pawh chhui zo thei ta lo chuan a zuzi phah ta a ni. Hetiang tehnuai kan nih avang hian Thinglian khuaa Pu Rimtuia chet dan turu leh ngaihnawm tak pawh a nupui Sangtei vangin kan ziak ngam ta lo a ni. Thuziak thiam lo inti thiam tak tak si Pu Chhuanawma, Pathara tih vel an rawn inrawlh ve chhen a, anmahni avang hian mi pawi pawh kan sawi teuh ta ve ang, an tel lo hian kan kal hleithei lo chu a ni bawk si a.
Tuten emaw khawvel tawp hun tura an hrilhlawk chu a kal liam leh tawh a, an rin leh beisei ang ni ta si lo insawi mamna pawh hriat tur a awm ngei ang. Kum 2012 hi a lo thlen dawn khan hma lama beiseina avangin kan thleng chak a, kan phur a ni. Chhungkaw tam tak chuan an kum tha leh chhinchhiah tlak a ni ngei reng ang. Hemi kum hi an ngaiin an hre zui vawng vawng ngei ang a, liam lova ding reng turin an duh hle ang. Nula tlangval tam tak tan pawh an kum tha, an intawn kum leh hlim taka leng dun a, tudang ngai lova an lenlaini an chen kum a ni ngei bawk ang. An tum leh beisei ang ngeiin nupa kawpchawi hlim tak anni ngei bawk ang. Ei leh bar zawnna kawngah nise, sawrkarah leh company vela an hna hmuh kum a ni a, aw kum tha a va ni tehlul em an ti vawng vawng ta ve ang. Zirlaiten an zirna lama tha taka an pass vang a an lawm em em kum leh hlim taka class an kal kum a ni thei bawk.
Hetiang ang deuh bawk hian, kum lo thar tur thlirin beiseina nen mi tam tak chuan he kum hi an nghak thleng a, amaherawhchu an duh loh leh tum loh deuhin thihnain an chhungkaw chungah thla a zar a, an duh leh ngaih lai ngawih ngawih ten mual an liam san a ni. Eizawnna kawngah beiseina thar nen tha tawpa luletin an tang a, an tum leh beisei loh deuhin an thil kal a, an beisei a thlawn a ni. Nula tlangval inhmangaihte lah chu eng emaw harsatna avangin an tum loh leh duh loh dan deuhin an inthen a, ngai chunga then a tul ve tho bawk. Chutiang chuan mi tam tak chuan an tum loh leh duh loh dan deuhin harsatna an tawk a, kum tha leh chhinchhiah tlak ti a, thenkhatten an ngaih lai hian hemi kum vek hi liam tawh se, kum thar lo her chhuak leh thuai se tiin an duh ngawih ngawih bawk.
Eng a pawh lo nise, kum 2012 hi a hmangtute tan chuan kum danglam, tha leh tha lo a ni thei ang. Hemi kum chhung hian thil tam tak kan ti a, thil tha lo tam tak pawh kan ti nual mai thei e; mahse, siamthat theih a ni tawh lova, koh kir leh theih pawh a ni tawh lo. Hetiang a nih avang hian kan thiltih tawh avanga nun thara kan nun phah a, kan hun hman leh turah kan insiamthat ngei angai hle ang. Thil tha titu tan erawh hlim takin he kum hi an thlah liam ang a, an ngaiin an hre zui vawng vawng awm e. Kan thiltih that hi kum tharah pawh kan chhunzawm leh zel ang a, chu chuan he kum 2012 hi kum chhihchhiah tlak leh hriatreng tlak a nih zia a ti chiang viau awm e. Kum 2013 bul tan thlenga dam zawng zawngte kum thar chibai ve ule.