Khuanu hian mihring tungchhoa kal te hi rimawi ngaina theuh tur hian min lo siam nge kan lo ngaina fal bik phei chu ka hre lem law! Kan rimawi bungrua tur kan han tuak te kha, a van lo ropui tak em! Zingah ka nu in, tho rawh, tho rawh! Phak chuapin, ‘eng nge?’ I thianpa a lo kal. Pindan atanga ka nu chhuah rual chiahin , ka thianpa BZA (Pu Renga fapa) chu lo lang hlawl! Van tho har em em? enge? Lung thiar a ngai! E..ka lo theihnghilh daih a.
Chhungte chawei hma in thiar zawh a ngai.Kan in zui chho, Tesanga leh Thlanpuia te nen motor phur khat chu kan thiar zo! Hah kan hre phal lo, hlawh kan hmuh huna kan rimawi bungrua tur ringawt kan mitthla a a awm vang kha a niang. Le..tunah chuan rimawi kan tum ve thei dawn ta! Kan duh ang a tha chu kan lei thei lo, mahse mi ta te kan hawh khawm nen chuan kan in kim chu kan nei thei hram. Khatihlaia kim thap mai a kan in sawm khawm thei te kha a lo ngaihawm ngawt mai.Tunah chuan chawei khawm tur ringawt paw’n kan hman ta lo nih hi. Hla kan han zir a, mahni chan pakhatin a ti tha peih lo! Engatinge? Ani chuan a chan pual kha alo thiam nal tawh. “Tesang mu chung khan lo perh bik tawh suh” Ngati maw? I thiante tan a nuam lo! Pawltlak thla lo thlen dawn meuh chuan, engtin tin emaw kan band pualin concertna tur kan hmu ve hlauh mai! Khawi ah? Sialsukah... “E..kei chu ka huphurh”. Engvangin maw? “Motor ka rui a”, a ho lutuk, vawikhat pawh kan pualin concert kan la neih loh hi, nih chuan kal kan tum poh aniang chu. Kan chepcher te nen chuan Sialsuk kan thleng ta! Aizawl ai chuan lo vawt hle mai. Kan concertna tur atan chuan hapta khat vel kan la nei, tih zia lutuk hla zirna hun kan la nei a nih chu. Sialsuk tlang IB bulah kan inkulh ve ram mai. Chhuah tam loh ber kha kan duh, achhan chu concert nei ve tur si mi in min lo hmuh tam kha kan duh lo a ni’ang chu. Kan concert ni tur nikhat chiah in a dang ta. Kan phur tlang tawh khawp mai, chutihlai in kan zai tupa ber chuan “ka zai theilo ang!” Engati nge?? “Tunah pawh ka hmui a rep lutuka ..um..um.. bak ka ti theilo, nang nipawh ni ula in zai thei bik lovang”. A va buaithlak..Engtin nge kan tih ang? Chutia angaihna hrelo a kan thut thap lai chuan kan thianpa pakhat chuan "tihdan ka hria" ...Hnawihsen (Lipstick)..Tha lutuk.. tha lutuk.In hnawihsen vut mai rawh. Zanah te chuan tuman an hre lovang. Hei kan tum nasa tawh sia. Nihleh! A zan a thleng ta...kan zai tupa pawh sen tha vut vut khawp mai. “Engati nge thingfaka rawn luh in tum?” “Pawisa kan nei lova!” ...Pawilo...Pawilo kan zai en duh kan fans te an nih kha, ‘sawtah a hnungah thu ang che u.’ Hotel California kha sa ang u. ‘1969.. tih bak ka thiamlo, a thunawn tak ngial pawh ka thiam chianglo a...’ ‘a pawilo a zut ka thiam a lawm.’ Music chiah a ring! mahse kan sa zo ve thak tho!! Haw a hun ta. Kan tour kan zo....mi tour nei zo te chu hawna turah an buai ka hre ngailova. Keini chu Krismas dawn nih vangin bus a awmlo. Mi motor bungraw dah haw lam hnungah kan chuan a ngai. Pawilo kan veng kan thlen theih chuan a tawk. Kan veng pawh thleng lovin Kulikawnah chhuk a ngai lehsi. Van buaithlak!! kan chhepchher nen beddingte nen kan in pu bawr chho, a theih dan ang angin kan in ak chho. Sikulpuikawn kan thleng chho dawn tih in kawngzawh anlo phei mup mup mai! Kan hma a bawngkai ho nen kan lo nghak thap. “Hey..in bawngkaih kha asir lamah kal pui ru.” ‘kapu, kan bawng anilo’ engpawhnise bedding te nen kan ni a, mi ngaihah chuan bawngkai kan ni hrim hrim. Bawng kaih hrim hrim hi kan zak hranpa lo, mahse concert zo bawngkai a min ngai kher kha chu a in hmeh lo ve khawp mai. Tunah mahni seh seh mual hranah ti tawh mah ila heng zawng zawng ka hriat chhuah chang hi chuan kan nun ti famkim tu an lo ni reng si.