Ka dawh teuh a, ka ei a, ka bar zel a, ka puar ta luah mai. Chutiang tho chuan ka bula mite pawh chuan an puarzia hlir an sawi a, vice president atanga bang mai tur Pu T Ngurkhuma thlahna chawhlui, ama buatsaih ngei mai eitute zingah kan ui em avanga chaw ei thei lo khawp kan awm lo va, zanriah min buatsaihsak a hlut em avang zawkin kan ei teuh a.
Hetianga tui ti tak maia chaw han bar hliam hliam mai hi chuan ka ngaihtuahnaah thil a rawn awm ziah thin. Chu chu "Vanram" a ni a, miten vanram nawm dan turzia an sawi a, lunghlu kawngkharah lutin rangkachak tual kan leng tawh ang an ti thin. Kei chu chaw tui taka ka ei lai hian vanram kal ta ang maiah ka inngai a, hei aia nuam leh thlakhlelh tur hi khawvelah hian a awm chuang em ni ka ti hial.
Kha mi tlaia uisa bai, ka'n ei tak tak mai kha chu vawi 10 vanram fang nawn hman hialin ka inhriat. Mahse, Pi Ruati siam a ni lo va, Pu NGKA nau Pu Huma siam zawk a ni a, Pi Ruati tan intihtheihna tur teh vak a awm lo.
Kan branch YMA tana Pu NGKA hlutzia leh ka chaw ei tuizia te, kum 20 chuang office bearer tangkai tak ni chunga veng tana a hnathawh tawh leh ka puarzia te, Serchhip lama min kalsan dawn avanga loh theih loh avanga YMA-a a nihna a chawlhsan a ngaih tak avanga a uiawmzia leh ka chaw bar luh zat te, Group A officer-a a kaisan tak avanga ka lawmpuina leh zanriah min buatsaihsak avanga ka hlimzia te, 'President' ni awm renga ngaih theih khawpa kan branch YMA-a hnuhma a lo neih tawh dan leh chaw ka ei hnemzia te ka ngaihtuah neuh neuh hian, thlansa khawpa ka bar mawlh mawlh lai chuan 'Vanram ka fang' a lo ni reng.
Ni e, amah ngei pawhin lunglenthlak a tiin chhuan emaw chen a tel tawhna kalsan a, khaw danga a awm bo mai tur chu kokim zawka amah thlahna chawhlui buatsaih a duh em em a, remchan zawkna avangin branch office bearer-te bakah production manager a nihna YMA editorial board member-te sawmin May 17 (zirtawp) tlai khan ama chenna inah zanriah a buatsaih a, eitu mi tlem te zinga ka tel thei ai mahin tui tak maia chaw tlang kan nem liam zung zung mai kha a hlu zawk mah.
Vanram fan zeuh zeuh hi rinna kawnga min tichaktu a nih dawn phei chuan vawi hnih thum mai ni lovin, vawi sawm tam pawh amah thlah nan chawhlui buatsaih se ka kil zel ang tih hi Pi Ruati hming chhal kher lo pawhin ka chiang tawk hle.
Kan hriat ve chinah YMA hruaitu tha leh tlo ber pawl a ni a, a ti takin min mi chak a, a thin a nelin kan nel em em a, zaidawh thei tak a nih angin dawhthei taka ngaihchan a ngaih chang a awm thin. A thusawi ka ngaihthlak apiangin dawtheihna ka tlakchhamzia ka hre fo va, thahnemngai taka muang ban chat maia thu a sawi thinte hi kan branch zei zia leh hmalak dan tifiahtu ber emaw chu aw ka ti thin.
President a nih chhungin engti zawng pawhin hma lila, kan nawr vut vut lo va, muang marin ke kan pen a, branch dang laka hmahruaitu ni fo lo mah ila kan vuaicha bik lutuk lovah ka ngai. A hruaina hnuaia committee an han thu khawmte hi ro an rel uluk em em a, ninawm leh hlimawm inpawlh nawkin zan lai pelh dar 1 velah chuan agenda hnuhnung ber an sawi ho hman ve tawh. Tisual hlauh vanga fimkhur nge an nih a, an hmanhmawh ve tho va, satel hmanhmawh an sawi ang vel chauh an ni tih thlanmual sir atang chuan ka hre thei lo.
Eng pawh ni se, awm ho thinte hi kan inthen fo va, ani ber kher kan then tur erawh tul lo ka ti hle. Kan secretary Zaiteate hi an la tharlam deuh a, awm bo zawk mai mai se a pawi lo zawk fe awm si a. A chhan chu chawhlui min buatsaihsak awm lek si lo va, kan President Pu Zara pawh hi a awm bo ve leh avangin editorial board-te hi chaw hlui min buatsaihsak se a tha ang.
Ni e, Pu Ngura hi kan ui a, officer lian a nih tak avangin kan lawmpui. A hnaa a kaisan tak avangin hlim tak si zuai raih chungin kan thlah a, mahse, chatuana min kalsan tur a ni lo tih kan hria a, kan vengah tho a la awm dawn tih pawh Pi Ruati'n min hrilh kher lo mah se kan hre chiang em em. Hruaitu ban nghet tak a nihna atanga min kalsan a ngai ta hi YMA editorial board-te chuan khawharthlak dawn hlein kan hria a, kan lungngai a, mahse, ka hawi kuala tute mittui mah a parawl lo va, tap pawh kan awm miah lo.
YMA AW editorial board min enkawltu a ni a, a duhsak bik zinga min telh hi kan lawm em em a, kum khat tal min ho thei se ka tan phei chuan a nuam fo ang tih ka ring a, editorial board-in kan ui. Ka peih chuan ka la ziah belh zel ang.. tawk phawt teh se.