Han en reng reng pawhin nun uluk lo tak a ni thin ang tih a la hriat theih a. A kut bawr leh a ke chu Proxyvon-a a in chiuna hnuhmain a chik khat hrup a. A hmel pawh a sar viau tawh a. A pianhmang pawhin mipangngai pianphung an lohna a nei tawh lova a ke pawh a bai lo.
Hepa hian eizawnna thilah min rawn dawr ngun viaua, kei pawhin ka dawr let ve thin. Kum khat zet zawt kan inhmelhriat hnuah sum kar vak nei lovin kan titi thin a, kan titi duna kan thilsawi hi YMA hruaitu leh YMA memberte hriat ve atan ka it hle a, hei kan ziak ta a nih hi.
Ka sawi mek pa nen hian kan innel tawha, chuvangin kei pawhin ka duh duh heti hian ka zawt pawp pawp a.
Kei : YMA in ruihhlo a do hma khan Proxyvon hi i hmang sual nasa viau tawh em?
Ani : Nasa e, kum puan hma khan kum hnih vel kan inah haw lovin ruihhlo ka buaipui.
Kei : Eng ngati nge chutia i awm.
Ani : Ka zuar bawka, ka rui bawk. Chhungte pawisa min pek leh rukin daih hek lo.
Kei : YMA in ruihhlo a do hma khan kan ram kha a chhe hman i ti em?
Ani : E, ti e a. Veng tinah khan in thum danah Proxyvon ti an awmin ka hria.
Kei : School naupang pawh kha an bang chuang lo ti raw?
Ani : School naupang kha min dawrtu an tam a sin.
Kei : Thalai kha an thi zawih zawih a ni ber a ti raw?
Ani : Ni e, kar tin pahnih thi ang zel an niin ka hria. Kha tiang zel khan awm ta ila, a pawingawt ang.
Kei : Lecturer pakhat pawn YMA in ruihhlo hi in do har lutuka, tun ai hian kum khatin lo do hma ula chuan ka fapa ka chan lo tur a ti hial a sin.
Ani : A dik a lawm, YMA khan ruihhlo kha do lo ta se, keipawh hi ka dam tawh lovang.
Kei : A nih YMA in ruihhlo do kawnga hma a lak tan tirh khan engnge i ngaihdan?
Ani : YMA tih lam rik ringawt pawh kha ka hua. YMA in hma an lak hma deuh lawk khan ka proxyvon zuar min man a, Jailah thla hnih ka tanga. Jail atanga ka rawn chhuah ni chuan Bawngkawna ruihhlo zuar an vai tan ni, motor te hial an khawih tel ni kha a ni a.
Kei : Proxyvon chu i zawrh chhunzawm nghal em?
Ani : Zawrh mai a ni lo, ruih fe ka tum a, mahse, a man kha a sang thut a, zawrh chhawn tur han lak mai tur kha a vang nghal a, a hlauhawm bawk si a, buaithlak tak a ni.
Kei : Silcharte i zu thleng ve em?
Ani : Jailah thla hnih zet ka nghei a, YMA in khatia hma an laka a man a to khan ka rilruin nghei chhunzawm daih teh ang ka ti a, ka nghei chhunzawm ta a. Zawrh pawh ka tum lo.
Kei : Chuan Boot Camp-ah khan i lut ve em.
Ani : A mak khawp mai Pathian hian a lam hnaih kan duh chuan kawng hi a hawngzau hle in ka hria. Boot Camp hma khan Centre-ah ka luta, ka Piangthar ta hlauh a.
Kei : YMA chu i haw chhunzawm zel em?
Ani : Haw tawh nang. YMA in ruihhlo a do vanga hetia nunphung pangngaia nung leh thei hi ka ni a, ruihhlo do a tha leh zung sengtu zawng zawngte chungah khan lawmthusawi ka ba a ni. YMA hi kei chuan Pathianin a hmang ka ti.
Kei : YMA sawiseltute kha an awm a.
Ani : YMA sawiseltute kha an a ngawt a lawm. Kumpuan avanga ruihhlo ngheita ka hmelhriat tam tak eizawnna leh nunphung dika nung ta te nen kan inhmuh nikhua hian YMA hi kan fak mawlh mawlh thin a sin.
Hepa hian tunah chuan dawr lun tak a nei a, Bike te a lei a, internet te a pawt a, nuamsa takin a khawsa chho a, KTP leh kohhran thilah a inhmang hle a, Section YMA hruaitu thawhhlawk tak a ni chho mek a. A mah ang hi veng tinah an awm thluah tih min hrilh a. Kei chuan kan Branch hruaitute hnung zuia ruihhlo do kawnga ke ka lo pen ven tawhna te chu kan ngaihtuah let a, ka thawk tlem hle tih ka ngaihtuah a, mithahnemngaite thawhrimna rah chu Mizoramin a va tel nasa em ka ti rilru a.
Kan Branch hruaitu leh member thawk nasa te hmel ka mitthla-ah a lo lang a, an hmel chu Favang ni chhuak eng mawi tak ai hian ruihhlo laka chhuakte tan chuan a eng mawi zawk dawn tih thuah hian ka hming ka hriatchian aimahin ka chiang a, khang YMA hruaitu hah tak takte thawhrimna kha Pathian hian a chhinchhiah tlat bawk ang.
Cell Phone ti ti........
-Thlanpuia
Kolkata: Tunlai khawvelah chuan Cell phone hi a tangkai chho ta hle mai. heng te hi kan hriatna ti zau atan i hmang dawn teh ang u hmiang. Engemaw emergency thilah phei chuan nunna chhan theih nan te a tangkai hle turah ngai ila.I tana tangkai tur awm a awm ve em? A awm chuan chhinchhiah nghal ang che.
1.Emergency: Khawvel ram pumpui a Mobile Emergency Number chu 112. Network man phak lohna hmuna awm pawhin network pe theitu service provider dang pawh a zawng char char mai ang.Mak deuh mai chu i phone a in lock pawhin he number hi chu a dial theih. Try ve chhin teh!
2. Unlocker: Hei hi chu haihawt te tan a ni zual.Tunlaiah chuan Car remote lock te an hmang nasa ta! I kalchhuahna hmunah chahbi car chhungah i lo kalh hnan palh hlauh chuan in lama chahbi spare lam turin emaw midang rawn dah tura tih ngai lovin ti hian i ti mai dawn nia. In lama mite kha phone in han dial la, phone atang khan door unlock button kha hmeh tir turin hrilh la.Tichuan, i phone kha car atanga 1/2 ft velah dah la, kawngka a inhawng mai ang. Mel tamtak a hla ah pawh awm la, cell phone hmangin i kalh thei a, i hawng thei bawk a nih chu (hei hi chu a dik ngei tih ka thianpa in min hrilh ed.)
3. Battery thuruk: Zin laklawh, leh theihnghilh vanga battery charge na remchang a awm hnai lo a nih chuan *3370# hmet la, i handset kha a in restart leh ang a 50% vel a la nei thei ang. Hei hi i charge leh hunah automatic in reserve leh mai dawn a ni.I cell phone battery a chauh viau hunah chauh hmang ang che.
4. Handset bo: Mobile handset tihbo emaw an ruk sak che chuan...ti hian i ti dawn nia...A hmasa berin i handset serial number hre turin *#06# hmet la, number lo lang kha tuman an nei ve lo, fimkhur deuhvin note chhuak la, tha deuhvin dah ang che.Tichuan, i phone tihbo hunah i sim card pe chhuaktu service provider hnenah report la, i handset hmang tu khan sim card pawh thlak sela, an hmang thei chuang lovang. I handset bo kha i hmu let leh lo a nih pawhin mi dangin (a ruksaktu che) an hmang thei bik lovang. Heng hi kan tih theuh chuan handset in ruk sak in awmzia a nei lovanga, a bo tlem deuh mahna.
5. Free Directory Service: Cell phone tana Free Directory Service duh chuan a hman theih bawk. tumahin phone directory kan keng peih lo, emergency thilah number duh ang kan neih theih mai loh chuan hemi number hi han dial chhin teh (800) FREE411 or (800) 373-3411. i phone ah khan he programme hi i set up thei ang.Mahse phone company thenkhat hian pawisa an charge thin a, hei hi chu free tura ngaih a ni