Pu James-a hun atanga Masangtea vanglai kan hman mek thleng hian YMA AW hian mimal, pawl leh veng chhung tan hlutna tam tak a nei a, an zinga tel ve nual tawh ka nih avangin lawmna tur tam tak ka nei.
Kum 20 tlin hma atangin hruaitute duhsakna zarzovin ka tel a, tun thlengin a tikimtu zingah ka la awm ve a, mite hian mahni hlawkna tur ni lova mi dang tan, veng tan, pawl tan inpekna an neih sanzia hi kum tin, thla tin, kar tin hmuh tur a awm a, a ropui.
Chanchinbu buatsaihtute inpekna hi mi dang tana ngeiawm thei khawpa sawi vung vak a hlauhawm a, peng pakhat ve mai a ni tih hriatthiam a tha hle. Amaherawhchu, YMA AW chhung bik kan sawi miau avangin thil dang a leng lo va, YMA huangah ringawt pawh khawtlang leh veng thatna tura mi inpe leh tha leh tui seng nasa an tam a, branch, section, sub-committee leh peng tinah rintlak leh fak tur thler tinah hmuh tur an awm a, veng timawitu pawh an ni.
Mahse, hman atanga tun thlengin Pu James-a'n an tuipui tlat thin, Masangtea'n a thlahthlam theih loh he kan veng YMA chanchinbu hi bul leh tawp nei lo ang maia chatuan daih tur ni lo mah se, he thil avanga thil thleng tawh leh thil thlen dan bakah a behbawm thil hlimawm leh nimawm chenin, inzirna leh infuihna tangkai tak a ni. Veng chhungah mi leh sa kan inpawlhsawp tial tial a, kan tam zel a, thil thleng kan hriat chian loh telh telh tak avangte hian chanchin inhriatpawhna tha a ni deuh deuh.
Cyclostyle-a her thin laia buatsaih a hautak dan leh a buaithlakzia chu thai lan a ni tawh a, computer hman a nih tak hnu hian zirtawp zan apiangin kalkhawm ziah a la ngai tho. Khawl tha tak tak hman ni tawh mah se tha thawh a la ngai vek a, khawvel changkangna avangin thiltih a awlsam viau tawh na a, zan mei rei leh rim taka thawh a bang chuang lo va, khawlin min chhawk zangkhai tawh nge a hmaa typewriter hman lai ai khan a hah zual an tlem ta deuh chauh tih pawh chhut tam tak a ni tho mai.
2002 khan editor-ah min ruat a, cyclostyle hmanga her hnuhnun ber kum a ni a, mual min liamsan ta Vanlawma leh kumina editorial board zinga mi Mangheta leh mi dangte nen phur taka YMA AW kan buatsaih ve nawk nawk laite kha mitthlaah a lang.
U Dailova, U Nunthara leh U Rovate'n min ho va, anni bak kum 30 aia 20 hnaih zawk thlalai rualin kan buatsaih ve thin kha a ni a !! Kan thu chhuah puitlin leh puitlin loh lam ai chuan hruaitute'n naupang zawk chunga mawhphurhna sang tak an nghat ngam kha ka ngaihtuah letin thil lawmawm a tlingin ka hria.
Mualpho em em lovin kum a liam a, hemi kuma editorial board-a mite hi tun thlengin YMA huang leh veng chhunga mi tangkai an ni fur a, Kimtea Sailo ( T section secretary) pawh a tel ve nghe nghe a, badminton a khelh hma niin a dul pawh a la kiar lem lo.
2003-ah editor turin min ruat nawn leh a, cyclostyle leh typewritter hnuchhawnin computer age-ah tak tak kan lut ta rup a, thil inthlak hlawk a awm hian insiam rem nghal mai a harsa thin. A buai kan tlem ta deuh va, zangkhaina tha tak a ni laiin thiam thil a ngai lehzual a, chu chu a buaithlakna lai a ni ve leh zel bawk.
Tichuan, hun leh kumte a kal zel a, YMA hausakna hmuh tur a awm hnem tial tial a, khawl lama mi thiam leh mi inpe an rawn chhuak ve zel. Pu Chhuanawma'n hmel chhia a tih em em Dawngtea'n min pemsan tawh mah se khawl chhia siam zar zar thei mi inpe tak a nih avangin, a hnuhmate rilruah a la cham reng.
Dawngtea a liam a, U Nunthara'n a thenawma mi Zorama a rawn chhar chhuak ve leh a, khawl chhia siam mai thei kan nei leh. Tunlaiah chuan editorial board-ah hetiang mi thiam pakhat tal an awm ve hi a tha em em a, Pa Dinga a rawn lut bawk nen a chhe siam lamah na na na chuan 2008 chho kha chuan changtlung tak kan ni.
Pa Dinga phei chu 2011 khan editor-a ruat a ni a, khawl a chhe hman tawh lo. Kuminah Nanga hovin kan han buatsaih leh a, hmana tute emaw ang mai khan ka kal leh kal loh a lang lo hle a, YMA AW-a tel ve kan inhah hleihzia min awl hneh em avangin ka hrethiam. Editor a rin ngam a, thawhpui dangte nen inpeizawn tlangin tlawmngaih vanga chawimawina dawng tawh Mahruaia leh Laljohny-a an awm a, Laljohny-a chungchang hi tunah tak chuan a taka hmuh aiin lawmman a dawng tawh tia sawifiah kher a ngai ta tih mai loh chu !
Chutah computer zirna hawng ngam leh rintlak CHDA-te kan kawl a, N section leader nih pahin kawng hrang hrangah kumin hian kan changtlun phah a, khawl a him a, a dam tha hle bawk. Chanchinbua thu chhuak lam chu eng pawh ni se, engkim famkimna chu kan zingah 'amah Masangtea' kan a awm. Thurawn engkim kan lakna ni hran lo mah se awiawm taka a lo thu ve ringawt hi chatuan lungpui la hmu lo tan pawh thlamuanpui tham leh mikhual tana hlauhawm a ni hrim hrim.
Hmana thu ziak tha duh lo Mangheta'n taima takin a ziak peih a, hman hmanah ziak tawh se tha tur tih mai a awl hle. Chutih laiin kumina board member-te erawh chuan kan chhawr em em a, thu chhuah tur kan haihchham changa kan pur chawkna lian a ni.
Hetiang mi hi awm belh zel se malsawmna a van ni dawn em !! V section secretary Pa Hminga’n phur hlut lai an nei pawh hi kan ziaawm phah a, tun ai hian phur ngun deuh se thu chhuah tur kan ngah ang. Mahse, kar tin kar tawp a awm ziah ang hian Pa Hminga pawhin a thil vei puan chhuah nan thu a ziak ziah a, ka rilruin ziak ngun deuh se tiin ka tur mah mah pawh a ni mai thei.
Kar tin tihchuah a ngai a, thu chhuah tur a tlem chang hian editorial board lam thlirna atang chuan kan vengah, thalai zingah thu ziak peih an tlem tial tial emaw tih a awl hle. Hemi kawngah hian kut hlei lehzual ila, malsawmna leh hmasawnna tha a ni lo thei lo.
YMA AW hi nuam ti taka buatsaih a nuam a, ka thiam leh thiam loh chu thu hran ni se ka tui vena lam a nih avangin hrehawm tih hlauh hlauh ka la nei mang lo niin ka hria. YMA AW buatsaihtu zinga ka tel hi miten tlawmngaihnaah min ngaihsak a nih phei chuan ka vannei lehzual ngawt ang.
Boruak nuam leh hlimawm taka inkawm chunga kan buatsaih theite hian a ninawmna leh hrehawmna min pumpelhtir a, mal taka buatsaih aiin a huhova tih a nuam a, board chhunga tute mai pawh hi kan pawimawh tlang em em. Kan hruaitute leh mi dang tute pawhin kan hnathawh min pawmpuiin min hriatsak a ni tih kan hriatte hian a nuam lehzual a, kum khat chhung board member-a awm tlang tawhte hian hun kal zelah pawh innelna tak kan nei a, chhung ril taka inpawhna pawh kan hriat miah lovin min siamsak thei niin a ka hria; thian siam thiam lo tak ni mah ila, kan veng kil tinah YMA AW avangin thian tha tam tak ka neih phah miau a ni.