Kumin Chanmari West Branch YMA Kumpuan Sub-Committee-ah ka tel ve a. Kei ve hi member zingah a \angkai lo berte zinga \angkai lo zawk ka ni a. Mahse, kan Kumpuan Ram leh Hnam Humhalh hi a pawimawh hlein ka hria a, tawitein ka ngaihdan ka rawn sawi ve dawn a ni. Central YMA pawhin Ram leh Hnam Humhalh hi vawi tam tak Kumpuanah a lo nei tawh a, engtia tihtur a nih tih pawh hriat a har khawp mai. Thapui thawha beih chi lah a ni bawk hek lo, a tihngaihna tak pawh hriat a har hle.
Engpawh chu nise, Zofate hi kan \anrual a ngai a, a bik takin YMA member zawng zawng te’n thinlung taka ngaihtuah chungin i \ang tlang ang u tiin ka ngen hmasa duh che u a ni. Chanmari West Branch YMA Kumpuan Sub-Committee \hukhawm chuan a tihdan turte bengsika ngaihtuahin, hriat ang angte kan thawhkhawm a, chuta kan sawi ho pawimawh zualte chu hengte hi an ni:
i) Hnam dang nupui/pasala neih loh tur.
ii) Hnam dang hnenah in hmun, lo, ram hralh loh tur.
iii) Hnam dang hnenah pawisa puk nan L.S.C dahkham loh tur. tihte leh thil dang tamtak kan sawi ho a ni. A ni tehmeuh mai, hengte hi Zofate’n kan tih loh tawp tur a ni tih hi hre tlang ila a \ha hle ang. Kan zawm ngei ngei ngei tur niin ka hria.
Tin, Ruihhlo Do pawh Central YMA-in Kumpuanah neih fo tawh a, mahse a do rem tak tak erawh kan nei lovin ka hria. Hengahte pawh hian \an kan lak a ngai hle tawh a ni. A bul berah chuan, sum kan duh luatna avang hian kan duh aia thui kan kal \hin a, Ram leh Hnam kan hralh tih hi kan hre hman \hin lo a ni. Entirnan: Central sorkar chuan Zoramah Forest Reserve tiam chin nei lova zauh an duh reng a, an neih theihna tur a nih phawt chuan sum tam tak sen pawh an ui hauh lo. Chuvangin kan hriat a ngai, tlem kan zauh va sum kan hmuh khan kan Ram leh Hnam kan hralh a ni tih hi. Forest Reserve chhung ami reng reng chu thing emaw mau emaw pawh engmah kan khawih a thiang tawh lo a ni. Chuvangin Forest Resseve-ah te, Industry-ah te, Company-ah te sumdawnnaah te, hengte hi YMA rilru takin kan ngaihtuah chian a ngai \hin a ni.
Tin, ruihhlo leh chhiatna hrang hrangte leh Hnam inchimralnate hi pakhatah chuan Setana hmanrua dik tak a niin ka hria. Chuvangin Setana pawh hi a pawng a taka do hneh chi a ni bik hauh lo. Heng zawng zawng kan humhalh a, kan do hneh theihna tur chuan hmanraw pakhat chauh kan nei- chu chu Lalpa Rawngbawl hi a ni. Chanmari Pastor Bial KTP Conference (2013) thupui kha ka hrereng \hin- Lalpa rawngbawl tih a nih kha. Ram leh Hnam a lo him theih nan leh thil \ha lo te’n kan ram a tihchhiat loh nan Pathian rawngbawl hi kan tih makmawh a ni tih hi Zofate’n i hrereng ang u. Isaia 59:12-ah chuan “I rawngbawl duh lo ram leh hnam chu a boral dawn a ni” tih kan hmu a. Chuvangin kan \henawm state-te dinhmun ang kan thlen hmain i harh ang u, a la tlai hma hian.
Engtin nge Lalpa rawng hi kan bawl? tih pawh hi kan ngaihtuah chian a ngai. Kan inkhawm kim vang te, rawngbawltu kan nih vang te, thu kan sawi fo vangte hian Lalpa rawng bawl ta luaah kan lo inngai mai thei. Mahse, Israel fate’n Lalpa rawng an bawl dan kha Pathian chuan a duh lo hle a nih kha, tuna kan tih dan hi an ti vek ang. Inthawina, an kut urhsun dan te pawh keini letin an ti vek ang. Mahse, Lalpa’n engtin nge a tih? “In kain min chawimawi a, in thinlungin min phat si” a ti. “Thlan pawn hnawih var a, a chhunga ruang chhe awmkhawm ang in ni” te a ti a nih kha. Chuvangin, inngaihtuah nawn leh ila, thinlung thianghlim nen, rinawmna leh dikna nen Lalpa rawngbawl hi kan mamawh ngawih ngawih a ni tih ka sawi nawn leh duh a ni. Thlan pawn hnawih var ang chauhin awm i tum lo ang u.
Keimahni’n kan thei ngang lo a nih pawhin kan tu leh fate thinlung \heuhah tal Lalpa’n hna a thawh theih nan tihtakzetin \an i la \heuh ang u. Chumi hunah chuan Lalpa’n kan ram leh Hnam hi min humhalh sak ang a, Israel fate’n berampa ki ruak hmanga Jeriko kulh an tihchhiat angin, keini paw’n Lalpa min pek, finna leh thiamna hmangin kan ram hmelmate kan do hneh ngei ang.