Chanmari West Branch YMA committee meeting hmasa ber chu Pu Lianchhuna Branch President hmasa berte Inah thukhawm in “Kan Br. YMA hian kartin chhuak chanchinbu i buatsaih ve ang u” tiin a thuphunga passed a ni phawt a, a hming tur sawikhawm laih laih hnuah Pu Lalthuamluaia rawt “YMA AW” tih chu lungrual taka pawm tlan a ni ta. Khatia hruaituten ka ko a an nghah miau si chuan YMA AW kan han buaipui ta poh a. Prison Office-a Cyclostyle an hman hlui Pu Lianchhuna’n man tlawm deuh zawka lei tur a hmu remchang bawk nen YMA AW her nan kan hmang ta a nih kha. Pu Lalrengpuia Sailo Inhnuaiah khian YMA AW kan buatsaih thin a, Pu Saihnuna Sailo hi Jt Editor a ni a, an indan hmain. Zankhat chu - kha tih lai a kan Br. YMA Secretary (hmasa ber) Pu Lalramzauvan tlawmngaiin min rawn pui a. Stencil phek khatna kan her zo tep, khawl a nuar, a sak ta tlat mai. A ni’n khawimaw tih pahin a’n her sawk mai chu kan ip chawih chawih mai, Stencil a thler vek, a bul atangin zungchal ngatin Typewriter-ah kan chhu leh ta tlauh tlauh mai. Khatih lai khan mizo chhiara phek khat chauh ala ni hlauh zawk a.
YMA AW buaipui lai ngaihtuah hi chuan khatih laia Tv. Ruata Hnamte (tuna chhangchhe pa) leh a Uipui Te-i mitthlaah a lang reng mai, Tv Ruata hah thin zia kha aw. Cyclostyle a chhe ngun si, a thar leina kan la nei zo si lo, thimhlimah a Ink in tih kai hlauin kan ti ve der der a, zan dar 10:00 a rik meuh chuan bal tak kan ni ziah. Nupui a la nei si lo, Stencil Ink chhuat a kai ngiai nguai leh lehkhapuan Ink kai dum niau nuau te kha kan hawsan hnuah amahin a thianfai thin anih kha; Ruata kha ka khawngaih leh hnuhnawh ngawt mai. Mak angreng deuh mai chu: awm mai mai hi chuan Zirtawp zan hi karkhatah vawikhat chauh a thleng thin a, YMA AW buatsaih hi chuan Zirtawp zan hi zu thleng ngun riau zel a.
James-a huang hi a awm ta lova, kha huang kha kan va hmang tangkai thin tak e aw, duh duh sawiselna huang a ni ber mai. Amah Tv James Lalchhuanthanga lah Social Welfare Deptt buatsaih tar Chawmna “Old Aged Home” ah a awm a ngai ta tlat mai si, eng emaw lai khan kan zu kan a, mi pawh a hre mumal tawh lo, a khawngaihthlak asin aw. YMA AW copy sem turte kha a duham thin asin mawle, veng pawn lama kan chanchin thehdarhtu tha tak anih thin vei nen. James-a huangah khan tu tu emaw huat zawng kan sawi teuh ta ve ang, ka ngaihtuah kirin. YMA AW hmanga an rilru kan tihnat zawng zawngte hnenah YMA AW kaltlang vek hian ngaihdam kan dil e.
Letter to Editor te kha kan dawng maksak thin asin! sawichhuah vek ngam chi ziazang a ni lo, a ngaihnawm zual hre duh chuan Pu Ramus-a zawt mai rawh u.
Kum 2004 a rawn inherchhuah meuh chuan YMA AW buatsaih na’n Computer-te hial kan lo hmang ve ta reng mai, mang lamah pawh kan hmuh phak loh. Khawl changkang kan hman chinah chuan thiltih a lo awlsam ta, Computer Operator Sawmdawnga hmelchhe lutuk mitthlaah alo lang mai pawh a. YMA AW Helicopter, Ma Sangte-a a rawn inherchhuak zet hi chu malsawmna a tling takzet, ani aia hna tlin hi khawvel ramzauah hian yma member an awm chuang lo vang. Ma Sangte-a leh YMA AW vul zel rawh se.