ZONET neitu zinga miin a enkawl, Mizoram khaw tin dap chhuak chanchinbu Vanglaini lahin ngaih pawimawh berah neiin chanchinbu phek a luah chuai chuai mai bawk a, Media lamah a chak miau avangin kan hriat loh hian Zoram khawvel kiltawp ber thlengin he MPL hian a al khawp mai. Khel tura kan qualify vang ringawt pawh hian Media lamah kan veng hming a lang ngun hle.
Khaw danga hun rei deuh han awm hi chuan Chanchinbua kan veng hming lang ve ringawt pawh hi nuam tak a ni. Thingtlang khuaah zin chhin teh, YMA emaw KTP emaw mimal ang pawhin zinchhuak mah teh Aizawl veng hausa leh ropui tak tak ai hian CHANMARI WEST hi a lar daih tawh zawk. Keini phei chu YMA leh Kohhran hrang hrang etc.-ah leh khawtlang anga kan thiltihna apiangah tawng mawi lo ni suh se 'a vantlang chung lam' kan ni lehnghal nen.
Chhiatni thatniah veng nuam kan ni bawk si. He Zoramah hian Chanmari West veng mi nih hi inchhuanna tham a ni ve tlat. Tun hmaa kan veng thalaiten mahni indah hniamna ‘inferiority complex’ an neih ruk thin kha tunah chuan chapo thu ni loin mi chunga lengah kan inngai ve tan ta. Mahni Veng chawilar nan, MPL khelh tum hian Aizawl veng hausa leh lian Dawrpui, Ramhlun N, Electrict Veng, Chaltlang, Zarkawt, Bethlehem, Bethlehem Vengthlang etc.-te bakah Lunglei, Champhai, Khawzawl leh khawlian dangte pawhin a rukin tan an la sauh sauh a sin.
He MPL, media lama chak tak hmang hian kan veng hming hi chawisan kan tum ve a ni. Veng hming chawilar nan he MPL tluka tha hi a awm rih lo.
KAN VENG KAN TANGRUAL EM : Tehreng mai,Local Council-in mamawh kan thlen apiang Pa ber chan changin ihe loin, mawi leh mawi lo pawh thlu loin min "YES" sak zel a, pangchan chintawk kan hre lo palh ang tih a hlauhawm khawp mai. Kan Branch YMA lahin MPL kan kai phatah Rs 10,000 min rawn theh chhuah nghal ringawt bawk nen, thla a muang suai suai mai. YMA Zawlbuk pawh player-te riahkhawm nan kan dil angin min phalsak leh thlap thlap.
Branch chanchinbu, kan YMA Aw lah kumin atan Sporting club chanchinbu zawk a maw tih mai tur a ni . MHIP lam lahin thuchhuah meuhin kan T-Shirt siam vete leisak turin chhungkaw nu ber theuhte pawnfen lo zen lawk turin an inchah lawk bawk. MUP-te pawh player-te huaisenna pe tura fuih phura Sermon min thlaksak turin kan la beisei bawk. Vengchhung in tinah vehbur kan khawn dawn e, kan tih thawm hriain thenkhat lahin, "in lo va kal har tawh ve" min ti chhen tawh leh nghal.
Heng bakah kan bialtu MLA, kan AMC Ward Councillor leh veng chhunga nu leh paa kan neih thenkhat ten, Sing tel, a Sang telten min tanpui tawh bawk. Kan veng thalai tamtak pawh engtin emaw tala tha thawh ve chakin an phu zek zek tawh. A hminga hruaitute hian tan kan lak peih phawt chuan vengchhung mipui hian min tanpui hreh lo tih kan hmu.
PLAYERS LAM TE :
Nia, kan player-te hi he Zorama tha ber ber an ni lo, Club dangten sum tamtak tak pek an tiam a, an pek laiin keini chuan mi hnukhawiah inthlahrung takin player kan zawng a, hlawh lam chu in khelh that viau chuan .... tih velten kan thlem chho ve lawp lawp a, rinna neih san a ngai hle. Kan veng player tha, MPL min inpet kaipuitute Tetea, Maruata, Buanga, Omega, Rampuia, Ruata, Ngaiha, Rinzuala etc.-te ho lah eizawnna leh zirna avangin training an zawm ve tak tak thei si lo. Inthlahrung tak chungin an rawn pha sap sap hlawm bawk si a, mi lak bang tha si kan zawng ve ngar ngar a, player discipline tha tak tak kan hmu chho ve nawlh nawlh mai. Risk lain July thla laihawl atangin Lungverh lamah coach-inspector B Lalneihsanga hnuaiah kan zu camp ve tawp mai.
Hruaituten ei leh in tur bakah Mutbu neih ang ang kan vawm khawm a, kan tlingtla ve mai. Tunah hian tunhmaa Pu Vanlalchhandama hun laia he CWSC team-a kan teammate lo ni ve thin NIS Coach C Chawngthansanga (Tanhril), kan ruai a, coach inpe zo em em, he club ama ta ang taka entu hnuaiah kan player-ten hma an sawn nasa em em.
Coach-in skill mai bakah fitness a pawimawh a ni tih hriain a hrual a, tunah hian Team fitness tha ber kan nih loh chuan a pahnihna tal kan ni ang. MPL atanga tlak loh hram tumin rilru kan siam hman a, tunah chuan champion an sawi ri uaih uaih tawh mai. Tin, player-te hi hruaitu bakah mi tlawmngaiten inah kan mikhual darh a, thlen ina inthlahrun chu sawi loh nuam an ti ve em em a, awm dan chintawk an thiam lo ang tih kan hlau lek lek zawk thin.
Awle, tunah hian kan vengin mimal lama India aiawh phak arm wrestler Juliet Lalengkimi 'V' , muaythai-a India tan Vietnam-a kal mai tur David Lalzamlova 'N' te kan nei. Mizorama football inelna sang ber khel turin kan inbuatsaih mek a, volleyball lamah division sang berah kan awm mek a, hruaitu thenkhatte phei chu an hah em em.
Sports lama tui em em vang pawh ni loin veng hmangaihna atanga hetianga thawk ta vakte pawh an ni. Tunah hian Chanmari West Sporting Club chuan team game pahnih football leh volleyball-ah Mizorama division sang ber ve ve kan ni a, hei hi veng mipuite tanrualna zar liau liau a ni tih CWSC hian a hrechiang em em a ni.
Kan hruaitu thenkhat football, volleyball leh sports lama history nei chhe zet zet tam tak hian sports an lawm em em vanga thawk chhuak an ni lo tih hi ka hmu chiang khawp mai. Ama insawi dan takah, nupuite thawhchhuah ringa khawsa ve mai Pu Ramhluna bakah volleyball lama Mizorama kan veng min tar lang tute Pu C Lalthanzuala leh an naute ho leh kan hruaitu tamtak hian hah mai lo chu hlawkna an hmu tlem hle tih hmuchiangtu kan ni. Amaherawhchu, hah hle mah se hma la tura hnuk tlattu an nei, chu chu he Chanmari West Veng hmangaihna mai te hi a ni.