Krismas a lo thlen hian kum puitling tawh Mizo zingah kum tawp a hnai tih hrethiam lo kan awm awm lo ve, kum a tawp chuan kum tir aiin sam zuahtute sam a sei sawt turah ngai ila.
Tlem lai deuh khan Pu Lalnunthara Sailo, Pu Lalrimtuia leh Tv Lalhmingliana te’n sei takin an sam an zuah hman. Tichuan a sei ta maw tihah an sam zuah chu an met leh a. Tunah leh khatih hun lai thleng pawha kan venga mipa sam zuah langsarte chu Tv Lal-Johny-a, Tv Lianzawma leh Tv Rualate an ni a. U Nunthara leh U Rimtuiate bakah Hminglianate nen sam an zuahho dial dial thin a, intiamruala thil ti an ni em tih phei chu ka hriatpui hran lo.
Heti ang zawng hian ngaihtuah ta ila, U Nunthara hian sam a zuah lai khan ‘N’ section hmui ta se, Lianzawma hi ‘CH’aiawh a ni thei a, Ruala ‘V’ a ni a, U Rimtuia ‘K’ leh Lal-Johny-a ‘T’ a ni bawk a, section tinin sam kan zuah tihna a ni thei mai thei. Entir nan, sam an zuah vek lai khan an paruk hian kawtthlerah kalho ta se, mipa sam zuah mi paruk an inzui tihna a ni dawn a, zai lama thawkhova pawl din an ni hran lo va, chhan dang vang pawh awm chuang lo mah se, naupang deuh tan mai ni lo puitling tan pawh an hmuhnawm tham ngawt ang.
An zavaia an kalho theihna tura tute emaw talin hma kan lo la lo kha a uiawm a, huaihawt nachang kan hre lo kha kan thiam loh tak pawh a ni; a pawi hle. Tunah chuan mi pathumin sam zuah lamah an rilru lam letin an met tawh si a, kal tlang vek pawh lo ni ta tehreng se, mi pathum sam zuah, pathum zuah lo an ni tawh dawn a, a ropui tur angin a ropui tawh lo va, mahse, insawi thei bik tur awm lovin an la intluk tawk chiah a, ho viau angin lang mah se thilmak tak chu a ni.
Thawk khat laia kan veng mipa parukten sam an zuah suau suau lai khan, ka hriat dan mai mai chuan U Nunthara, U Rimtuia leh Hminglianate aiin Ruala, Lianzawma leh Lal-Johny-aten an sam an zuah hmasa a, anni pathum hian kan veng tlangval sam zuah mi pathumte hi an entawn deuh nge ? an zuah ve a, mahse, phatsantuah tang lehin an inthurual tan dawn chauh a, an pathum hian an mehsan leh ta vek a.
An member pathumin kian mah se, a sur a sa, a fur a thal, nipui thlasikah pawh Ruala, Lianzawma leh Lal-Johny-ate chu an nghing ve lo va, nghet leh tlo takin an sam an zuah tlat a, an mawipuina lam leh an inhmeh zawng a nih vang ai mahin sam zuah hmingpu tawh an ni tihah an chiang a, tlang sawi dan leh mimalin an sam chungchang an sawinate aiin rinawm takin an sam tan an nung tlat a ni.
Chutih laiin U Nunthara, U Rimtuia leh Hminglianate erawh chu inzuah hmingchhe ve uk tawh siin an met leh thuai a. Eng nge maw zawnga thlir phei chuan Ruala, Lianzawma leh LalJohny-ate tan pawh an huatthla la ngawt ang. Sam zuah membership fee em pawh pe hman lo khawpin an mehsan leh hi lunghnur zawnga ngaihtuah phei chuan sam zuah mek tan a lungchhiatthlak thei hial ang. Ruala, Lianzawma leh Lal-Johny-ate hian heti ang leh tur ting tang chuan zuah ve loh law law awm tiin dem ta se, awm kan tihpui hlein a rinawm. Kan thiante mah ni se, keini pawhin U Nunthara, U RTA leh Hminglianate hi kan tan ngam lo vang.
Thawkrim tan chawlhna nuam a awm an ti thin a. Khaw lum lai khan phunnawi lovin an zuah tau tau a, khua a vawt a, sam sei Laljoa, Lianzawma leh Rualaten met leh ta U Nunthara, U RTA leh Hminglianate aiin hamthatna an tel hnem ngei turah ngai ila.
Ruah leh rial, sik leh sa, sawi leh sel mai bakah, thil thleng leh boruak inlumlet karah pawh sam la zuah reng mi tlo pathumte leh zuah ve uka met leh si mi pathumte hi inkhel ta se tu nge chak zawk ang le ? A nih loh pawhin khawvawt intuarsiak ta se tu tak tuar thei zawk ang maw ? Thli thawah ding ho ta se, sam pheleng der der tur zawk chu a chiang sa.
Inchhirna eng emaw tak an neih avangin U Nunthara, U RTA leh Hminglianaten an sam zuah, sei hman tawh tak an tan leh ta mai kha uitu awm lo mah se, a hrehawm leh nalh lo chin tia an sawi zawng zawng an pumpelh tawh niin a hriat a. Mahse, an sam a sei avanga nalh han ti ta em em phei chu anmahni an nih ngawt loh chuan mi dang an awm hriatna erawh a awm hran chuang lo va. Lal-Johny-a, Lianzawmate thil tawn ang erawh eng emaw chen an hriatpui lo thei lo. Kan vengah hian sam sei ngai lo sam zuah thar lo awm leh ta se, Lal-Johny-a, Lianzawma leh Rualate hnungzuiin sam an zuah dawn tihna pawh a ni thei!