Aizawl Daifem hmun rem lo takah hian in pakhat a bangdap, a chung, rangva tuiek tawh lam hi fal deuhin a dinga. Chu in panna kawng chuan ngil ang reng takin chhuk zawngin kawngpui a pawh a. Chu in chu Nihawipar, kehme, Tlangsam, Maspar leh thing chawrche ang reng tak tak hian a hual ve khap a. Chu in kawtah chuan tlangban vuanin nula pakhat hi a ding a. A bul vela krismas ti mas tu tlangsam parte chu a thlir a. Nidangah chuan chung pangparte chu mawi a ti a, mas boruak nen inhmeh a ti hle thin. Mahse, tunah chuan chung mas boruak hlimawm tak takte chuan a rilru a khawihbuai pha lo. A mangan luat avangin inchhunga leng lovin pawna a chhuak a ni si.
A hnung lawka a chhuahsan inchhungah chuan fahrah 15 lai an awma. Chung fahrah enkawl tur chuan a inpe a, thla nga em pawh a la enkawl hmain Tlangsam a par a. Chung fahrahte chuan ‘a nu mas thawmhnaw engtikah nge kan lei dawn’ tiin an zawt ni tin a. Nakinah tiin a chhang zel a, karkhat lai nakinah tia a chhan hnuah chuan naupang ho chuan naktukah kan lei ngei ngei a ngai tawh an ti liam liam a. Thawmhnaw leina chu sawi loh fahrah ho nena an mutna a khumfa tam lutuk tihrehna tur khumfa hlo leina pawh an nei zo lo.
Zanlaiah a fahrah enkawl naupang pali vel an tah that chuan engdang vang ni lovin khumfa vang a ni lo thei lo a. Naupang tap hnungzang a en apiangin khumfa ni awm lo a mawi lian tak tak sawm vel hian an lo seh thin a. Chung khumfa naupang thisen dawt puar lung te chu a man a, chhuatlaiah emaw bang remchangah emaw a tihlum thina. Khumfa a tihhlumna chu thisen vangin a rang duh hle a khumfa a tihhlumna chu inchhungah chuan chhiarsen rual loh hi a rang nuk mai a. Pawisa chu nei sela chuan khumfa chu suat mang vek a duh a. Khumfa suat mangna tur ai chuan an ei leh in tur lei a pawimawh zawk si. Chutiang a nih nak alai chuan fahrah naupangte chu krismas engtin nge hlim takin a hman pui theih ang tih ngaihtuah a la ngai zui a.. Sawrkar tanpuina an dawng dawn emaw an tih laiin february thlaha daih an dawng dawn si. Krismas lah chu ni hnih chiahin a dang tawh a, mangan loh theih a ni lo.
Pawnah chuan a hun tawn mek chu a ngaihtuah a. A pawisa kawl zawng zawng a belhkhawm a, a pawisa kawl chuan Krismas tuka naupang ho sa hmehpuina khawp chauh a daih a. A hlawh tlemte atanga a khawl ve chhun lah chu an home in pawisa an neih loh avangin thlatirah naupang damlo enkawl nan a hmang zo vek tawh a. Chu fahrah enkawlna hmun siamtute lah chu mi harsa tak tak an ni a, an lakah beisei tur a awm thei tawh lo. Tanpuina khawi atangin nge an hmuh ang tih a ngaihtuah a, beisei tur hre lovin beidawnna chauh a hria a. Chu in fal tak kawtah chuan beidawng em em in nitla tur chu a thlir a. A dinna chhak ko a nithla turin Krismas par a rawn chhun no nghalh mai chu a en leh a, chu mas-par chuan Nausen Lal Isua lo piang tur chu a mawina zawng zawng chhuahin a lo hmuak niin a hria a, a ni erawh chuan,... a ngaihtuah chhunzawm thei lo, a mittui chu dan rual lohvin a sur zung zung a, mas-par mawi tak pawh chu a hmufiah thei lova.
Inchhungah chuan naupang ho chuan an dinhmun khirh zia hrethiam ve lovin duhthu an sam liam liam a. An duhthusam thawm chuan a rilru a rawn ti harh leh zawk a, ngaihthla ngamlovin a beng a hup a. An piah muala in lian tak tak ding khup chu a thlira, an kawt atanga langthei kawngpuiah chuan chhungkaw tam tak an fate nena bazar haw hlim taka in zui a hmu a. Chung nu leh pa ten an fate an bazar pui ang chuan a fahrah enkawlte chuan bazar puitu tur nu leh pa an nei ve si lo, Fahrah naupang khawngaihthlak zia mi sawi atanga alo hriat leh a taka chenchilhin sawi aiin an khawngaihthlak zawk tih te a ngaihtuah a. An khua a mas hmang tura an in puahchah thin dante, a chhungte inpuahchah dan turte a ngaihtuah kai a. ‘He hna hi engngati nge ka lo thawh kher kher ni,’ tiin a vawikhat nan inchhirna thu a ngaihtuah phah hial a. Inhlawh duhin a thawka, atak takah chuan inhlawh theih alo ni lo. Amah chu fahrah 15 te tan nu leh pa a ni tlat.
Naupang ho thawmhnaw leina tur dilin vawi engzat nge a tawngtai tawh, a chhiarseng tawh lo. A tawngtai a tawngtai ringawt mai a, a tawngtaina lah chu December ni samhnih pathum nitlak dawn-ah pawh chhan a la ni si lo. A tawngtai dawn loh chuan belh tur dang a hre si lo, a tawngtai leh thin a. Chhanna a awm thei lo, a reh vung vung a. Chutah le a rilru-ah chuan “Min tanpuina tur chu Lalpa lei leh van siamtu hnen a mi a lo thleng ang’ tih hi chiang takin a rawn ri a.