Mizoram a tlawmngai pawl lian ber YMA chuan a vawi 67na atan Ni 23-25, Oct, 2012 chhung hian Kawrtethawvengah General Conference hmang turin a inbuatsaih leh ta mup mup mai a, Kawrtethawveng khua pawh nasa takin an inbuatsaih mek a ni. Hetih lai hian General Conference hi thalai intihhlimna leh nuam tawlna mai a ni loin, kan ram leh hnam tan ro an rel dawn a ni tih ka hre tlang awm e. Chung an rorel tur thenkhat chu han tarlang mai mai ila.
YMA KHAWIH
1) Mizo mipuite inpumkhatna tichhe thei zawnga Mizo hnahthlak hnambil hmalakna reng reng tihtawp a nih theih nan Central YMA-in hma la rawh se.
2) Rampum huap faina beihpui thlak turin Central YMA-in hma la rawh se.
3) Sorkar atanga Development Work Veng/Khua atana lo kal thin hi, tha leh rotling zawka thawh a nih theih nan YMA-in hma la rawh se.
4) Mizorama piang ni lo, Foreigner-te Birth Certificate pek an nih loh nan hma lak ni rawh se.
5) Human Trafficking do-na kawnga kan chak zawk theih nan YMA-in hma la rawh se.
6) Electoral Roll dik leh fel fai tak kan neih theih nan YMA-in hma la rawh se. Central Executive Committee-in an bawhzui tur thil.
1) Hmar tlangdung HPC’D’ Demand Area chhunga YMA Branch thiahte hi a rang thei ang bera YMA Branch din leh turin Central YMA-in hma la rawh se.
2) Central YMA-in Pandal ruhrel (Structure) kan neih hi, YMA General Conference dawng zo ngei tura tih len ni rawh se.
3) Mizoram hmun hrang hranga hnam dang kutdawh hi YMA ten khap rawh se.
4) YMA Sub-Hqrs/Group Boundary te ennawn leh nise.
B. SAWRKAR KHAWIH :
1) Assam Rifles chhuahsan tur ram hi mimal hnena pe lo tur leh tangkai taka hman a nih theih nana humhalh turin Sawkar ngen ni rawh se.
2) Mizoram chhunga Quarry awmte hi mihring tan a hlauhawm loh nan YMA-in a tul angin hma la rawh se.
3) Branch YMA tinin mahni area-a motor kawngpui kamah uar zawka Thing phun nise, kawngpui kam mimalin an neih thin hi Sawrkar Dan dinglai anga reserved a nih zel theih nan Sawrkar-ah thlen ni rawh se.
4) Tribal Certificate pek chhuah chungchangah YMA te hriatpuina (Recommenda tion/Verification) a tel theih nan Sawrkar-ah thlen ni rawh se.
Sawrkar khawih Agenda atang hian CEC-in a lo bawhzui tur te.
1) Mizoram chhunga pawikhawihna chi hrang hrangte hremna dan hi hei aia na leh khauh zawk a nih theih nan Sawrkar-ah thlen ni rawh se.
2) Tlawng Lei (Bairabi kai) ABC-in an dawh mek hi a huntiam chhungin an dawh zo thei ta lova, hemi chungchangah hian Central YMA-in chak zawkin hma la rawh se.
3) School Uniform leh Sawrkar Office leh Zirna In hrang hranga puanzar (Parda) atan Mizo kutchhuak puan hmang turin Sawrkar ngen ni rawh se.
4) YMA enkawl in leh bungruate Sawrkar atanga sakna emaw, thawmna tur emaw a lo kalin, a thawktu tur thlan kawngah midang kuta awm lovin, a enkawltu YMA-in a thawh ngei theihna turin Sawrkar-ah thlen ni rawh se.
C. KUMPUAN CHUNGCHANG :
Kum 2013 chhunga YMA kumpuan atan hengte hi General Conference-ah chhawpchhuah tur a ni.
1. Ram leh Hnam Humhalh
2. Intodelh
Conference rorel turte han thlir hian kan ram leh hnam tana tha tur tak tak vek a ni a, a hlawhtlinna tur tak taka thawktu leh hmala theitu chu Conference palai mai ni lovin nangmah ngei kha i ni e.