Krismas vuakvet hi Premier League buai hun lai tak a ni a, Bundesliga erawh chuan thlasik chawlh an hmang thung.
Spanish Liga-ah Lionel Messi leh Cristiano Ronaldo an intlurbing leh a, tluk rual lovin player pahnihte hi European football-a che tha ber an ni dun leh mek.
Goal thun thei hi striker an ni mai a, Messi leh Ronaldo hi tunlaia striker ropui pahnih an nih laiin, Mizoten striker tia kan sawi deuh bik centre-forward aiin winger lama khel tam zawk an ni a, mahse, striker dik tak an ni thung.
Centre-forward zingah mi pahnih thur chhuah ngam khawpa che tha an awm. Arsenal captain Robin van Persie leh Bayern Munich hitman Mario Gomez an ni. Van Persie hian calendar kum chhunga Premier League-a goal khung hnem ber ni turin goal hnih a la mamawh a, kuminah khelh hnih an la nei.
2004 khan Gunners boss Arsene Wenger chuan man tlawm takin Van Persie a la lut a, Dutch club Feyenoord atangin pound mtd 2.75 sengin a lei.
Kum eng emaw zat hnuah Arsenal player ropui zinga mi Dutchman Dennis Bergkamp-a hnung zuiin London hmar veng club innghahna lian a thei ta a, Arsenal tana goal thun tam ber Thierry Henry-a hmun ruak a hnawh khat bawk.
Kum 28 mi Van Persie hian 2011 chhungin Premier League-ah goal 34 a thun a, Arsenal tana calendar kum chhunga goal khung tam ber Henry-an 2004-a goal 34 a tihluh a tluk chiah. Netherlands striker hian calendar kum chhunga Premier league-a goal thun tam ber Alan Shearer a hnaih hle tawh a, 1995 khan Blackburn tan Shearer hian goal 36 a khung.
"He hlawhtlinna avang hian ka hlim a, ka inchhuang; ka tum ber erawh a ni lo. Kumina ka khelh dan danglam ta thut hi kei pawhin ka hrethiam lo va, goal ka thun thei a ni," a ti.
Van Persie hian Arsenal-ah season sarihna hmang mekin season hmasa ber 2004-05-ah league goal nga, a dawtah goal nga bawk, goal 11, sarih, 11, kuate thunin season a hmang chho. Season hmasa khan hliamin tihbuaiin chaw hma lam a khel thei mang lo; chuti chunginleague-ah goal 18 a thun a, hengte hi kumin January-May inkar veka a khung a ni.
Tun season-ah league khelh 17 hmachhawnin goal 16 a khung tawh a, top scorer a ni. Season kal mekah hian inelna hrang hrangah vawi 23 inkhelin goal 20 a tilut.
Season tirah Arsenal an talbuai a, August khan Manchester United-in 8-2 in an hneh. Hetih lai hian league-ah 17-na an ni a, mahse, tunah hian pangana luah chhovin palina Chelsea aiin point khatin an hniam a, hmahruaitu Man City nen an inkarah point 12 a awm.
Henry chuan Arsenal-a a khelhpui hman leh a record tluktu Van Persie fakin, heti ang dinhmun hi a thlen a beisei ngam lo tih a sawi a, tunlai striker zingah Messi leh Ronaldo tih lova tha ber a ni a ti.
German league lamah Gomez chuan amah atanga a tha ber leh vawrtawp a hmang mek tih a sawi. Bayern Munich striker hian tun season Bundesliga khelh 16-ah goal 16 a thun a, Champions League-ah goal sarih tilut tawhin Cup nen inelna hrang hrang khelh 25-ah goal 24 a kawl mek.
Kum 26 mi Spanish thisen kai Germany international hi Bundesliga striker zinga sawifiah harsa a ni a, a vul laiin a vung em em a, a hniam laiin a che chhe hle thin. Mahse, season liam ta atangin Gomez hi a puitling a, Bayern player pawimawh ber pakhat a ni chiang ta hle.
Stuttgart atangin a hming a chher a, 2009 khan Bayern-in leiin Bundesliga player man to ber a ni. A man peng dang nen euro mtd 30-35 vela hlua ngaih a ni.
Gomez hian kum thar Euro-ah ram tan hnuhma lian hnutchhiah a inbeisei a, Bayern atangin Germany international striker tha pahnih Miroslav Klose leh Lukas Podolski pet chhuakin a luahlan fel tawh a, Germany rinrawl a nih ngei a inbeisei sang hle.
2010-2011 season khan Bayern tan inelna hrang hranga khelh 45 hmachhawnin goal 39 a thun a, 2011 calendar kum chhung hian league-ah goal 31 a thun.
Gomez chuan : "Ram tana khelh phak ngei tumin ka theihna engkim ka chhuah. Euro thlenga ka khelh dan ka vawnghim thei a nih chuan coach thu a ni a, heti chunga min thlang lo a nih chuan kei chuan tihtheih ka nei tawh lo," a ti.
Gomez hian German club ropui Bayern tan season thumna hmang mekin, Bundesliga-ah tum 113 inlan tawhin goal 76 a khung. Bayern player ropui leh club tana khung tam ber Gerd Muller-an Bundesliga tum 427 a khelhah goal 365 a tilut ve thung.
Khelh zat atanga chhuta thun tamah Gomez hian Muller a khum tawh. Mahse, a thun zat tluk turin hmabak a la ngah hle a, 1971-72 season khan Muller hian season khat chhungin league goal 40 a thun thei a, Bundesliga record a la ni reng.