Hnam tinte hian khawsak phung, ei leh in, silh leh fen leh ngaihhlutzawngte kan nei hrang fir fer hlawm a. Hei hi, khawvel hnam hrang hrangte ze bil leh danglamna chu a ni reng a. Tun \umah hian min hualtu hnamte laka Mizote kan danglamna langsar zual deuh deuhte kan han thlir kual den den dawn a ni.
CHAW BEL : Mizovin silvar kan tih ve mai, aluminium bungbel la awm hma kha chuan Mizote leh min hualtu hnamte paw’n eisiam nan lei bel mum leh lei khuhhriang kha kan hman ber a la ni vek hlawm a. Vai siam(company siam tihna) silvar bel lo chhuah hnuah pawh Mizote chuan bel mum kha kan lo ngaina laklawh tawh a ni chek ang chu, bel mum ngata chaw chhum tur emaw kan la ti fan a. Cooker kan tih bel \hami lo chhuah hnuah pawh a hmang pha lote chuan bel mum hlira chaw la chhum \ang \ang zelin bai leh tlak chhuan nan pawh loh theih lohva hman ngei turah kan la ngai fo mai.
Kan chheh vela hnamte erawh chuan dekchi belin chaw an chhum a, a hminah a tui an thli mai \hin a. Antui leh hmeh dang siam nan pawh dekchi an hmang tlanglawn ber bawk. Kan chhaka Kawl kan tihho phei khi chuan aluminium bel mum hi an siam ve lo hrim hrim niin a lang.
EI LEH IN : Tun hma deuh te kha chuan Mizote chuan chaw kan eiin kan kutphahin chaw kan \ham \awk a, kan kaah a bengin kan beng lut \un \un a. Vawk pui koham ang hrimin kan \hial ri leh bawrh bawrh bawk \hin. Zung\anga chaw \hamte pawhin chaw kenna zung\ang pali zet kaa rawlh lutin kan bar ber \hin a. Fiana antui kan hawp paw’n a sutin kan sut ri hruih hruih a, \henkhat fian khel ri rup rup tawk lah kan bo nahek lo. Min hualtu hnam hrang hrangte erawh chuan zung\ang pangaa chaw \hamin zungpuiin an hnawl lut a, ka chip hmanin an \hial mai \hin. Antui pawh chhum tawp ni lovin an siam a, ri lo leh fian seh rup rup lovin an hip lut mai \hin.
Tin, chawhmeh lam pawh sahriak lam kan lo tlakchham \hin vangin chhum, tlak leh baite hi siam dan phungah kan neih a. Hriak(tel) lam kan hnianghnar ve hnu pawhin Mizote hrawk chuan a chhum lam kan la ngaina ber fan a. Chawhmeh tam tawka chhum hnur te, kan pawh hawp theih tura tui nei puauva kan te kan ching a. Kan chheh vel hnamte chuan tel mawm \ha tak leh hmuihmer dangte telhin tlemte, tui takin an siam mai \hin a. Sa te pawh tlemte tein an siam a, an hmeh zing thung mai \hin. Mizote anga ei ngheng leh in ngheng ang hi an ching ve meuh lo.
TLEREUH : Tlereuh kan tih mai zungbun, \hi, bengbeh leh ngun lam pawh khawvel ram dang chu sawi loh, min hualtu Kawl, Manipuri leh Vai kan tih maihoten an uar hle laiin Mizote chu min thlawh khum lehpek a. Tuna kan pitar leh putarte vanglai phei kha chuan inneih zungbun atan pawh hnang kual te an inbuntir mai mai \hin a nih kha. |hihna leh kartut(cartridge) ruaka siam dar zungbun pawh an la ngaihlu em em a, hla thuah pawh an hmang awl lo \hin. Chung hun hma daih a\angin kan chheh vel hnamte chuan tangkarua(silver) leh rangkachaka siam tlereuh an hlut tak zet tawh a. Pachhe ve tak takte pawhin kutni vangthla leh hun pawimawha inbel atan te, sum dah \hatna atan te an lo kawl im em tawh a. Nei lo deuhte tan pawh rangkachak tui luan tlereuh hawh theihna dawrte hial a siam \hin.
‘85 kum, rangkachek kan chher tirh lai pawh khan rangkachak ngainat nachang hria an nupuite rawn kalpuitu pa tam tak chuan, “Khang ai chuan sa leiin ei nghek ila, a manhla zawk daih ang,’ tih kha an thu chhakchhuak a ni fo. Min hualtu hnamte leh ram changkanga mite nen chuan kan danglam kher mai.
TAWNG : Kan leili inran hleizia hi sawi kan tum zawk chu a nia. Min hualtu hnamte fiah fuk fuk lo leh rang fea an dak zat zat laiin Mizote chu fiah fuk fuk leh muang churhin kan \awng chut chut a. Mi tam tak phei chuan intihrinawm nan leh inlak thupui fun nan muang ban cherhchawrha \awng kan la ching lui zui lehnghal a, nghahlelhawm fe fea \awng kan tam fe \hin chu a nih hi.
Vai \awng emaw, Kawl \awng emaw, Sap \awng emaw pawhin, ‘Chaw i ei tawh em?’ han ti ila, an mahni \awng dan nena khaikhinin kan \awng muanzia chu a lang chiang thei khawp mai. Thil mak tak pakhat chu \awng muang na na na chu kan che leh thil ti vel pawh kan muang fan deuh dulh zel a, thil zir kawngah pawh kan thluak a muang deuh nge nge zel hi a ni. Vai leh kawlte chu bazara tomato leh alu ilo an han thlang te hi ar buh chuk ang maiin an mal zat zat \hin a. Mizote chuan peih lo chung chunga ti ang hrimin kan mal chut chut \hin. Khawvel hnam upa leh changkang, \awng muang chuar chuar leh che muang \uih \uih an awm ngai loh danah hian Mizote hi kan la changkang tawk lo em ni tih hi ngaihtuah tham fe a tling awm e.
HMUNPHIAH : Hmunphiah kan hman danah pawh Mizote chuan a mumin kan tel tawp mai \hin a. Min hualtu hnamte leh khawvel hmun danga hnam changkang zawkte chuan eng thil pawh hmunphiah atan hmang se, tel mum ngawt lovin bawlhhlawh hui tam zawngin an phiar/cher phek deuh zel chu a nih hi.
Hmunphiah sawi takah chuan kan chemte hman dan te pawh hi a danglam bik ngawt mai. Mizote chuan thil kan velin kan tang chhung lamah chemte kan hui lut zut zut a. Kawl, Vai leh Sapte chuan an \ang pawn lamah an nawr chhuak zet zet thung thin a nih hi.
Kan han sawi den den tak, min hualtu hnamte leh khawvel hnam dangte aia kan danglam biknate kha a \hat zawk leh zawk loh lam sawi tum kan ni lo va. Kan pi pute’n hnam dang leh ram dang tlawh pawh lova an lo inkhurkhung \hin vanga kan khawsak phung leh ngainatzawng danglam bikzia kan tarlanna mai a ni a. Chhawm nuntlak a awm chuan chhawm nung zel ila, sim ngai a awm pawhin simin inzir thar zel ila, raltiang kan kai theihna kawng a ni thei hial awm e.