“Kha Hminga Mitthi lumenna ah I kal dawn a ni maw?” “Dawn lo ve, mitthi inah mikhual ka inchhiar tir zuah zuah peih lo,” ‘A ni maw!! Chu zingah Thlan I lai mai dawn tihna a ni ang maw?’ “Ni lo ve, mikhualin ka leilaihna hmun min kawhhmuh kual vel ka peih lo”. “A lo nih tak chu, chhunah tal chuan hnatlanga tel I tum ang ti raw?” “Tum nang, mikhualin hnathawh tur min tuk, thawktu nih ka peihlo,” “E heu!!, chu Chanmari West hi I veng a ni ve ta nange, tu veng nge?” He zawhna lo pianchhuah dan ka thil tawn hi, min timualphotu a ni dawn tih hrereng mah ila, chhanna ka thiam ang tawk a pek ve ka duh tlatna avangin, ziakfung nawrtawlh a hnuhma hnutchhiah nei ve ik lo ka nih intheihnghilh thak khawpin ka rilrua ka lo utawk tur vawn ve tlat thin thil tlemte ka han thai lan phah dawn ta anih hi!!. Khawilai nge Chanmari West veng chu: Hmarkaiinu veng, Pu J-a veng, Pu Kumsingh-a huan, Pamchung veng, Kawipui, Tuikhur veng, Theihai huan,Thlanmual veng, Tlabirh etc. tia veng thler hrang hrang an sawi thinna hmun, veng thler nuam leh lian tak, Aizawl ah pawh hmarlam a mi a ni tih chu tun an hai ka rinloh avangin khawi laiah nge Chanmari West veng chu? tih hi chu kan sawi zui lo ang.
Hminga’n Mikhual a tih hi tute nge: Khua leh tuite (citizen) chu ram leilung fate an ni, chuti chu chanmari west a piang seiliante chauh hi em ni mikhual ni ta lo chu. Voters’ ID, Ration Card te pawh nei thlap khua leh tui ni si lo kan va tam awm ve le!!. Hmingan mikhual a tihte hi reilote chhung kan veng a rawn awm zawk te a sawina em mi ni dawn? Nge, kan veng a rawn awmna la reilo deuh a tihna. A sawi hmang atangin heng hi chu anih hmel chhiah si loh, nge mi inluahhawh a khawsate a sawina. Hriatthiam a har khawp mai.
Anih vengmi inti Hminga hi bihchiang ang aw: Hminga hi he veng chhunga pianga seilian dik tak a ni. Chanmari atanga kan indan tirh te khan a intithei em em thin a, Zirna lamah pawh Chanmari West veng pel miah lovin pawl sawm (Cl-X) thleng a kai ve nghe nghe a, he veng chhunga lo pem lut ruih ruih te pawh hi an lo pem kum, ni leh thla a lo chhinchhiah deuh vek hlawm maw le. Mikhual chu a ni mawlhlo. Amaherawhchu, Hminga hian danglamna mak tak mai hi a nei tlat, YMA emaw VC (Local council te pawh an ti ta a ni awm e) emaw in khawtlang huap thil tih tur an buatsaihah te hian a kal ve ngai miah lo (thing a ti tlat!!), a lawina Kohhranah lah a kai tha peihlo pawl a ni a, mitthi in kal, thlanlaih leh hnatlang tulna in a nun a khawih che pha ve lo. Khawtlanga inhmante chu nihna duh vang lekah a ngai hmiah mai a ni. Amah hi veng mi hlun leh neitu nia a inhriat ve tlat avangin a duh zawng tak ruihhlo te hi a duh duhna hmunah a ti hmiah mai a, kawngpui sira thut a Trip (cannabis) han zuk hluah hluah te leh YMA Park kan neih hnu te phei hi chuan Park a zu han in ngei te hi changkang a ti tlat, kawng kal auh nawmnah leh veng dang mi lo leng han tihbuaite hi veng chhannaah a ngaia thawktha a inti thei hle mai a. Bawlhhlawh leh hnawmhnawk khawlai dunga han paih darh vel te leh midang tana hnawk/tawp tura an tuichhia han luan tirte hi veng mi dik tak tih turah a ngai hmiah mai a nuam a ti thei hle a ni.
Chanmari West veng neitu chu: Pathian thu chuan Khawvelah hian tumah hi kumhlum tur awm lo, Vanramah emaw Hremhmunah emaw haw leh tur niin min zirtir a, hei hi, kan pawm dan theuh pawh a ni awm e. Chuvangin, kan vai hian he khawvelah hian mikhual kan ni ti ila kan ti sual lo ang, Hminga ngaihdan nen hi chuan a inpersan hmel ta deuh. Chuvangin, Chanmari west veng mi dik tak ni a lang ta chu, veng tan a tha duhtu, veng chhunga an awm rei leh reilo lam pawh ni chuang lo a, an awm hun chhunga a awmna veng hmasawnna tur ngaihtuaha, thenawm tha neih tum ringawt lo a, thenawm tha nih tumtu zawk hi an ni. Mite harsatna siamtu ni lo a, mi harsatnaa hnemtu leh puitu zawk hi an ni, awm rei tawh leh tawh loh hi veng neitu tehna tur dik niin a lang lo a, Hminga ang mai a inti Chanmari West ve ringawt he veng chhung thatna atana tha leh zung thawh ve miahlo veng chhunga harsatna thlen thintute hi chu veng tana hnawk leh veng than ti thuan awptu mai chauh an ni a. Chanmari West veng neitu a chhiar tlak pawh an ni lo hial awm e. Nang Chanmari West veng neitu I ni ve em?
N. B. He thuziak tlawm tak hi Article ziak tura min ngen der ve chiamtu Masangte tan ka hlan e, Johny-a sam sei pawhin lo chhiar ve hram se, thawnthua hminga hi a u sanga a ni em tih lo ngaihtuah rawh se. Manchester United forever.