Nghahhlelh zawng a inang lo va, tui zawng pawh a thuhmun vek chuang lo. Rilru pekna lam leh kan ngaihsan zawngte a danglam hle. Engnga ti teh reng nge maw ni kumin hian Formula One season thar, tun pathiannia an tlan tur hi ka nghakhlel deuh tlat mai a, tun zirtawpni atang phei kha chuan ka helhhlawh tan a ni deuh ber tawh. Thil ropui taka han sawi tur ni hran lo mah se, mi tute pawh hi an rilru pekna lam kan hnualsuatsak ngawt thei lo va, kei ai mahin U Nunthara’n a nghakhlel nge a hun a hai ve hrim hrim phei chu ka hre lo va, kar hnih kal ta khan tlantir a tum daih tawh.
Kum 10 kal ta khan kan vengah hian F1 chungchang sawi a nuam lo lek lek thin a. Mi pa dik tak intihsiakna nia ka hriat avangin kei chuan hmuhnawm ka ti a, mahse, han sawi changa intihchangkanna ang zawnga min puhsak leh ho lam taka mi dangten an ngaih thin avangin, sawi fo chi lovah ka ngai a. Ka ngaihdan chuan football chanchin kan sawi nen hian a danglam lo va, thiamna sang tak hmanga intihsiakna ni mah se, kan tuipui avanga kan changkan phah sawtna pawh ka hre lem lo. Tuipui turin car khalh thiam emaw neih kher emaw a tulna pawh ka hre chuang lo va, intihchangkan phah nana hman phei chu inbumna chi khat a ni ang.
Kan thil enin kan rilru chhungril a deh nat viau a, a changa hlimawm leh tawrhna min thlen a, pawi tih vawng vawngna leh nuam tih veng vengna a ken tel tawh chuan kan lo tuipui hman der thin. Kan tuina a nih chuan a chanchin hriat loh lutuk chu thil hrehawm a ni nghal a, kan duh reng vang pawh ni lo mah se thil dang aiin kan lo ngaihven viau a. Ngaihven a, en hnem a, chhiar na na na chuan hriat chin a awm ve mai. Thuk taka thil hriat hi a harsa a, mahse, pangngai taka thil awm dan hriatthiam erawh a har lem lo; hriatna nena thil kan en chinah chuan a hmuhnawmna tak tak a pawh theih.
F1 hi khawvelin an en nasa hle a. Season liam ta phei kha chu en an tam lehzual a. Infiamna kher ni lo TV atanga hmuhnawm chi hrang hrang pek chhuah zingah khawvela entu ngah pakuana ni phain, infiamnaiIfa World Cup a awm loh kumah kum khat chhunga event khata entu ngah ber a ni deuh ziah. Kum telin ram a la zau tial tial a, tlankawng pawh a darhsarh telh telh a, Aifica khawmualpui pumah tlanna tur a awm ve lo thung. 2011 hian a vawi khan nan intlansiak vawi 20 awm tura ruahman a ni a, mahse, tualchhung buaina avangin Bahrain-a season tan tura tih chu thulh a ni a, a hun sawn tumna awm zui mah se, tawt taka rem sa a nih avangin tun thlengin hun awl an la hmu thei lo.
Vawiin chaw hma dar 11:30 hian Albert Park, Melbourne-ah Australian Grand Prix hmangin 2011 F1 Championship intlansiak hmasa ber tan a ni ang a. Kum kal taa car nei tha ber leh world champion Red Bull an la pangngai a, Ferrari nen title chuha inthlurbing tura ngaih an ni. Mahse, McLaren-in chawpchilh takin ‘risk’ an la a, F1 car chak leh chak loh kawnga pawimawh em em, a thlihap (aerodynamic, a hma leh hnung thla) thuam that nan khawl chi hnih an vuah thar a, awmzia neiin zirtawpnia inbuatsaihna hunah McLaren a chak ber. Lewis Hamilton aiin Jenson Button a chak hret a, pathumna chu Ferrari khalhtu Fernando Alonso niin Red Bull driver pahnihte palina leh pangngan an ni. Kum hmasa aia hmasawn Mercedes-in dawt ve lehin Michael Schumacher chu tlan chak parukna a ni phak. Inpuahchahna (test leh practice)-ah hian an duh zat zat an tlan kual a, lap khat tlan nana an hun hman that ber hmangin an teh thung a, intlansiak tak tak nen chuan a inang lo.
Bridgestone an chhuah avangin kumin atangin Pirelli tyre an hmang dawn a, Italian company chiah hi F1 tyre petu an ni ta a. 2010 aiin pitstop-a luh zin a ngai dawn a, intlansiak hmuhnawm phah tura ngaih a ni. Kumin hian tlankawnga driver duhsak bik neih (team order) phal a ni a, he thil pahnih hi kumina thil inthlak lian zual leh danglamna siam thei a ni.