Mihring mizia leh nungchang zirmite ngaihdan leh pawmdan nen chuan khaikhin chi chu a ni miah lo vang. A ziaktu hi thiamna bik nei lah a ni hek lo. Amaherawhchu, kan nitin nuna kan hmuh mai theih leh kan tawn mek a\anga sawi chhuah mai ka tum chauh a ni. Mi thiam zawkte chuan Mihringte hi Ze Nghet mi leh Ze Nghet lo mi kan awm an ti \hin a. Eng zawk hi nge kan nih tih lo inbihchiang ve ta ila a \ha awm e. Mihring piang chhuak tawh phawt chuan Pianpuizia kan ti mai a, nungchang leh rilru puthmang chu kan nei \heuh awm e. Chu kan mizia chu kan kum mil zelte pawn danglam thei mah se, thlak theih miah loh chinte pawh kan nei awm e.
Khawvel hnam hrang hrangte pawh hian a hnam ang zawng pawhin zia kan nei a. Mizo hnahthlak peng hrang hrangte pawhin zia kan nei an ti \hin (Ralte bengchheng han tih maite). A enga pawh chu nise, he hnamzia hi chu zaah za chuan a dik kher lo ang. Tin, tuna kan sawi tum ber pawh a ni lo. Mihringin Zia chi hnih - Ze nghet leh nghet lo kan neih theih dan bik hi lo bihchiang dawn teh ang.
Mizote hi Kristian kan nih hma khan sakhaw mumal tak kan nei lem lo tiin chhui mite chuan an sawi \hin a. Kristiannain kan ram a rawn luh takah khan kan lo dawngsawng fuh hrim hrim nge, rei vak loah khan kan ram a chiah hneh ta viau mai a. Kha kha Mizote Ze ngheh loh lutuk vangah a ngaih ve theih tlat. Mahse, chu ze nghet lo tak mai, inthlak awlsam zet chuan thil \ha zawkah min hruai lut si. Ze nghet bur mai neiin, kan ngaihdan kha sawhsawn hlei thei ta lo ila tun dinhmun hi kan thleng pha meuh ang emaw? Chutih rual erawh chuan kan Kristianna zia dah bo \haka ringlo mite tihawm tawk vel pawh ti hreh chuang miah loin kan ziate kan thlak danglam thei leh zel bawk si a, chu chu kan chhiatna tur a lo ni ve leh thei reng bawk nen. Ram pawn lama rawngbawltute (Kristian missionary) hian an sawi ve fo; hnam \henkhat leh sakhaw dang betute nghehzia leh an sakhuaa an rinawmzia hi. Mahse chu chuan chatuan nunna an hmuhna tur kawng a dal ve tlat si.
Mi \henkhat chu ngaihdan mumal pawh nei hlei thei lo khawpa kanghlang, mi tih ang apiang zawm thei mai zel an awm a. Zu hmuna in ve thei mai, Kohhran an hlim deuh chuan a phur pawl ni ve thei mai bawkte hi ze nghet lo awmdan a ni thei awm e. Hetiang mi hi an eng a thawl a, rilru hahna pawh an nei vak lo. Kawng tam takah chuan mi zinga khawsak an awlsam phah a, an nun a nuam em em lawi si. Tin, an bula khawsak hi mite'n nuam an ti viau zel. Hetiang mi hi chuan an ze nghet lo lutuk hi an chhiatpui tam mah zawk awm e.
Chutih rual chuan Ze nghet bur mai, ngaihdan pawh sawhsawn hlei thei lo leh mite thurualpui hlei thei lote hi an bula awm a hahthlak ve fo. Ze nghet tak mai ho hi chuan; an tih tawh lam an nek vak a, a lehlam an hnualsuat chiam fo. Chu chuan mi dangte a hnarin hmelma insiam palh maite pawh awl tak a ni. Tin, pawl anga thawh honaah phei chuan an hnawksak thei viau. Chutihrual chuan an tha pek tawhna lamah chuan an rintlak em em thung si. Tin, an zia man fuh tawh chuan an ngainatawm ve thei viau thung. Hetiang mi hi an rintlak a, an rin ngam khawp mai.
Kan sawi pawlh a, kan sawi chhe tawn a, kan infak chhawk leh bawk si a. A \ha zawk thlang tur pawn ngaihdan siam thiam a har awm e. Engpawh chu nise, sual kawnga tluk phah tur khawp chuan derthawng lo ila, midangte tana hrawn hrehawm tur khawp chuan khauh lo thung ila a \ha ber awm e. Mahni chhia leh \ha hriatna pawh hmang ngam lo khawpa nghet lo leh mi ngaihdan \ha zawk pawh pawm ve mai thei lo khawpa ngheh chu a \ha ber kher lo vang, a hun leh hmun a zir a ni e, tiin ti tawp ta mai ila, thutlukna chu chhiartute kutah a awm e.