Kan hriat theuh angin YMA chu Khawvel-a pawl inzawmkhawm (Association) lian berte zinga pakhat chu a ni meuh mai. A hna thawh lian berah pawh Mite tana malsawna nih leh Tanpui ngai tanpui hi a thupui ber a ni. Hetiang rilru pu, pawl thianghlim anih lai hian kan rilruah engtin nge a tlak chiah lo enchiang teh ang.
YMA Member chu tunge? Member in enge a tihtur: Kan sawi tak ang hian YMA chu pawl lian leh thianghlim, tanpui ngaite a taka tha leh zung, sum leh pai senga tanpui thintu a ni a, he pawl lian tak a member ni thei leh ni pha chinte hi eng angin nge mite tan malsawmna kan nih a, YMA member-in a tihtur mawhphurhna a neihte kan hlen thin em le? Member fee pek a inziahluh mai hi a tam zawk chuan kan duhtawk der mai a nih hi!! YMA Member-a kan in ziahluh hian tihtur (duty) kan kovah a innghat nghal teuh a ni tih hi hriat a tha hle awm e. YMA Member chuan a tihtur YMA hmalakna hrang hranga tel te, Khawhar in kal, khawhar in riah, thlan laih, hnatlan, tanpuingaite tanpui, nungchang mawi, mite tana malsawmna nih etc, te hi a tih makmawh a ni, member-a inpe ve si, heng activities hrang hrang a lang ngai lo kan nih chuan in enchian a hun hle a ni. YMA Chu a tih a tih a ni si a!!
YMA Member leh YMA thupui : YMA Member zingah hian kan thupui hre lo leh zawm lo hi kan tam hle awm e, heng 1) Hunawl hmanthat 2) Kristian Nundan tha ngaihsan 3) Zofate hmasawnna ngaihtuah, te hi kan thupui a nih laiin hunawl a ruihtheih thil tih nana lo hmang leh mi thil ruk nan a hmante hi a YMA lo hle a ni. A pahnihnaah kristian nundan tha ngaihsan anih lai a, khawilai kawtthlera lo thut khawma Nula inkhawm bang lo chhaih leh hmelhriat kan ngamtlak deuhte inkhawm lo auh el vel hi YMA member tihtur a ni lo. Pathumna-ah chuan Member tinte hian mahni theuh-ah step khat talin hmasawn tum ila, kan hnam kan ramin hma a sawn thei dawn a ni.
YMA Hruaitu nge YMA Hotu?? : YMA hruaitu tam tak te zingah pawh in enchian ngai tam tak kan awm in a hriat theih awm e. YMA hi pawl anih angin hotu ni lovin hruaitu anni tih hi hriat a tha. Hruaitu tam tak chu hotu emaw kan inti a, tha thawh tak tak si lovin a tawng leh a rel lamah kan chak em em a, Hruaitu dik tak chuan engkim a relah emaw a tha thawhah emaw hruaitu anih angin hmahruai zawk tur a ni tih hriat a tha hle ang, (hetiang hruaitu hi chu kan vengah hi chuan kan awm em lo ang chu maw?). Chuvangin tuna kan thupui YMA chu a tiha tih a ni tih hmang hian tute pawh inen chiang ila.
Nu leh pa mawhphurhna : YMA chak leh chak lohnaah hian Nu leh Pate hian mawhphurhna tam tak an nei a ni tih hriat a tha, YMA Member kan fate thlan lai tur te, hnatlang tur te, khawhar In riak tur te in kan tir ngai em? Zanlaia mitthi an awmin kal turin kan kaitho ngai em? Hetianga kan ti ngai lo anih chuan Nu leh Pa ten khawtlanga kan mawhphurna kan hlen lo a ni mai awm e. Tin, Nu leh Pa tam tak hian khawhar in YMA hun hi thalai chauh kalna turah an ngai a, zai tui a har hle thin. Nu leh Pa ten an uap chuan thalai tan pawh tui tak a zai theih niin, zaite a nuam hle thin a ni. Tin, hei bakah hian YMA chakna turin nu leh pa te hian rilru kan seng ve thin em? Nu leh pa te chu YMA hruaitu leh Member te aia lungfing leh ngaihtuahna zau zawk nei anni a, YMA Committee ah hian YMA / Vengchhung thatna turin Agenda kan thehlut ve ngai em? Kan YMA hruaitute hi thurawn kan pe ngai em? YMA chakna tur leh thatna turin hruaitu te thawhpui a, thurawn leh rawtna te pawh sihhmuh hi kan mawhphurhna a ni tih hria ila. Hetiang hi kan ti ngai lo anih chuan a nachangte hria ila, YMA leh nu leh pa te kan thawhhona a that chuan vengin hma a sawn ngei ang.