Film en thin te chuan Jim Carrey channa Comedy Film "Bruce Almighty" hi kan en tawh awm e. He Film hi Buffallo, New York a TV Reporter Bruce Nolan chanchin ani a.
News Field Reporter (LPS Pu Vana te ang) phunchiar tak lawmna reng reng nei lo engemaw hlek a Pathian dem zel ching mi ani a, ngaihzawng kawppui mumal tak (Jennifer Aniston) nei chungin a thawhpui nula chhelo tak Susani a ngaizawng ru riau bawk a,mahni tana Chakai-khawrh, mi hmasial tak a mawi leh mawilo pawh thlu lem lo mi ani.Reporter Top Post ( Anchor) ruak a beisei ruk rauh rauh laia a thawhpui a ngaihsan bik loh tak Evan Baxtera'n Anchorman a kaisan khalh chiah phei chuan a insum zo ngang lo a mawilo takin a khawsa a, a hna atangin an ban hial a, misual rual in an sawisa nek zui a, amah lam in en si lo in Pathian lakah a vui nasa em em a, Pathian chu duhsak bik nei leh hna tlin lo lutuk tiin a vui chiam a, Pathian chuan a vui vaina te lo hria in mihring ang a rawn inlarin ( Morgan Freeman) Pathian hna thawh awlsam loh zia hmuh tir turin Pathian hna thawh tirin, Pathian chuan chawlh (vacation) la meuhin a thiltih theihna zawng zawng, mihring duhthlanna (Free Will) khawih danglam sak tiamlo in a pe ta a, chu Pathian thil tih theihna chu Bruce a chuan midang puihna leh Pathian hnathawhna atana hmang ta lo in ama hlawkna (personal gain) atan a hmang ta tlat mai a, mahni intih lar, phuba lak, in tih milen nan leh ama duhzawng tinreng tih hlawhtlin nan a hmangin ama thatna anih phawt chuan midang chuan tuarin eng ang pawn Khawvel chu lo buai sa teh mahse engahmah a ngai loin barah a khawn chhete eih duhlo a,Pathian hnena Tawngtaina zawng zawng pawh ama hnen a rawn thleng a a ngaipawimawh chuang lo. Pathian Power hmang chuan mahni hmasial takin a duh dan dan in a che a,thiam takin a duh zawng chu a ti thleng elh elh reng mai a, reilo te ah mi awh thamin sang takah a in vawrh sang zawt zawt a,amaherawh chu thil ti thei viau mahse Pu Sangkhuma mi awh "The Miller of the Dee" angin a dinhmun ah a lungawi ve thei chuang lo, mihring duhthlanna a khawih tel theih loh avangin a duh ber a bialnu thinlung erawh a ti nem thei chuang lo, a hna thawh tur ber Pathian hna a thawh ngai loh avangin Tawngtaina chhan sen loh a pending a,a hna Pending chuan a rilru leh taksa ah hna a thawkin a tibuai chho a,mi lawm siam tur ni a in ngai leh a thatchhiat avangin Tawngtaina a mi dilna zawng zawng chu "Aw" tiin a chhang a,duh dan leh duh zawng inan lohna Khawvel a ti buai zo ta, a beisei ang a a bialnu rilru a hneh theiloh vang leh Pathian hnathawh harsat zia hre chhuakin beidawng takin Pathian hmaah a tlawm ta a, Pathian in phuba la lo in thihna ata thi lo tawk tawkin a nunna zuah sakin zirlai ropui leh na tham deuh tak a pe ta a, tichuan and they live happily ever after ta ani.
He Film hi ka en tirh chuan hmuhnawm ti takin ka en liam mai mai a, TV a alo chhuah chuan ka en ning theiloa, amaherawh chu enge min zirtir tih lam ka lo ngaihtuah lem thin lo a, Bruce Nolana character hian Mihring te kan Khawsak ho na ah mahni hmasial taka kan duhzawng ngawr ngawr hlawhtling se kan tih thin te hi mi tana thalo hnawksak leh phurrit ani thei em tih te,tumruh na leh thawh tumna tak tak nei silo a hlawhtlin tum, midang vannei a mahni vanduai bik riau a in hria a vui reng mai mi te,mi laka dawhtheihna neilo mi ni si a mi in min dawhthei bik tura ngaih bik te, mi chunga leng tur a in ngaih tlatna te kan nei tlat te,mahni leh mahni thil tih hmu tha a midang leh an thil tha tih hmu duhlo tlat thin te hi kan tihtur anih loh zia min hmuh tir chiang khawp mai.
He Film hian Film siam tu te ropui zia, thil an tih mai mai loh zia, idea an neih that zia leh an hman thiam zia, a thawnthu phuahtu te ngaihtuahna ropui zia, Film changtu te chan thiam zia leh an tih tak tak zia chauh min hmuhtir ani mai lo, a tak taka Pathian ropui tur zia, a laka kan tet zia leh tangkai lohzia, a rorel harsat turzia leh a rel thiam si zia, a dawhtheih zia,a khawngaihna ngah zia te bakah Pathian hi mi eng ang nge mihang nge anih ang mingo tih te min ngaihtuah zui tir nasa hle ani.
MIZO LEH VAI CHANCHIN LEHKHABU
November 1903 Lehkha 1 na
August thlaah khan Thankhuma khuaah Sakei huai a tla a,a in tanna ber chu Hrangvunga lo thlo lai seh a tum a,a veh a, a veh lai chu a fapa in a hmu a. Tin, a fapa chuan Hranga chu,”Sakeiin a seh dawn che” tiin a au va, tin,sakei chuan a fapa chu a um ta a. Hrangvunga chuan tuthlawh kengin a fapa chu a chhan a. Sakei chu a ding ta a, a din chhung in thlamchhungah an tlan lut a, fei te,hreipui te an keng ta a.Sakei chu thlan kawtah chuan a ding ta reng mai a. Sakei thawm leh an thawm chu an lo ral a mi sapelin an lo hria a, an han au va, Hrangvunga te pafa chuanin an chhang a,”Lo tlan rawh u, sakeiin min dinchilh reng e,”an ti a. Sa pel ho chu an va tlan a, sakei chu an in au thawm hlau chuan a lo kal sawn ta a.Hrangvunga te pafa chu an thlam ah chuan an riak ngam ta lova, bawka mi riah khawm na lamah an riak ve ta a.
Sakei chu thlam dangah te pawh chuan a lut ta zel a, a chhung a nghaisa zel a, thildang nghaisak tur a hriat loh leh tuithawl te khawih ta zel a, Tin, ramah chuan tumah an riak ngam ta lova, an hawng ta zel a. Sakei pawh chuan an hawn zan chuan a zui hawng ve zel mai a.
Sakei pawh chu in lamah chuan a che ve leh ta thung a.Vawk te, kel te, ui te a seh ta fo mai a, arbawm sumhmuna dah te hi a khai thin a. Vawikhat chu a ui seh ruangin a kar an siam ta a, a thir thang chauh a per a, silai a per tak loh avangin tumah daia chhuak ngam an awm ta si lova, an mangang ta em em a, an zim a. Suaka chaprashi in an kaphlum ta a. Sakei chu Thankhuma’n a ai a, Thankhuman a ai avangin Bawkshish Sorkara a hmu ang, a kaphlumtu suaka’n a hmu lovang.