Ram leh hnam humhalh hi mitin mawhphurhna a ni. Kan ram neihsa zimte hi keini Mizote hian kan humhalh loh chuan tuman min rawn humhalh- sak dawn lo. Tin, ram leh hnam humhalh hi a \ulzia hriain YMA hian kumpuan thupuiah vawi tam tak a hmang tawh a, chuvang chuan keini YMA member-te hian tih tur tam tak kan nei a ni. Ram leh hnam humhalh tih hian hnam dang huat emaw diriam emaw lam a kawk lo va, kan ram leilung, thing leh mau, nungcha zawng zawng leh kan hnam nun leh incheina thlengin a huam a ni. Ram leh hnam humhalh tura kan mawhphurhna leh hma lakna tur atana \ha nia kan hriatte kan tarlang dawn a ni.
1. Aia upate thu awih : Mizo hnam nunze mawi tak ni \hin chu aia upate thu awih leh zah hi a ni. Aia upate thuawih tih hian hmanlaia an tih dan ang diak diak chuan tunlaiah a theih loh mai thei. Entirnan, Office-ah chuan Officer naupang te chuan a aia upa peon chu a tirh a ngai a, tin mahni aia naupang zawk ka pu tia koh a ngaihna lai pawh tam tak a awm. Engpawhnise khawtlanga kan nun hona kawngah chuan aia upate zahna hun leh hmun chu a la awm tho a ni. Bus chuanna a aia upate \hutna ken te, hnatlan nikhua leh thlan laihnaah te hian aia upate zahna hi lantir theih reng a ni. Chumai bakah aia upa kan biak dawnin hawihhawm tak leh inngaitlawm taka biak \hin hi a mawi a, kan hnam nun phung pawh a ni. Kan hnam nunze mawi hi chawi nung zel ila, khawtlang nun a\anga bul kan \an loh hi chuan a ler a\anga \huai chu a harsa tawh \hin.
2. Hnam incheina chawi nun: Kan incheina a\angin hian min han teh ta sela kan hnam hi chu hnam ropui tak chu kan ni ngei tawh ang. Amaherawhchu hnam ropui leh changkang tehna atan incheina hman a ni lo hi chu a vanduaithlak khawp mai. Show Room kawt ami pawha inchei ngam a hun ta. |halai thawhchhuah nei lo, changkang taka inchei a, mobile handset changkang leh man to tak hum bawk, bike / scooty chhuak thar nei thei nih hi thil zahthlak tak a ni. Kan chhungkaw thawhchhuah mila inchei thiam te a \ul. Tunlai hian local cable T.V-ah Korean Serial Flim Mizo \awng lehlin an tichhuak nasa em em a, en pawh kan en nasa hlawm hlein a hriat theih. An nun dan leh khawsak dan (Lifestyles) te thlengin kan la chhawng a, Korean Fashion hian kan incheinaah nghawng a nei nasa em em tawh a ni. An incheina leh an nundan ringawt en lo hian an culture leh an hnam inthuamna an dahsanzia lam hi kan hmuh hmaih leh fo \hin. An hun pawimawh Inneihni leh hunpuiah chuan an hnam inchei ngatin an inchei \hin tih leh ei leh in thuah pawh an hnam thil leh nundan an chawilar thiamzia te hi hmuh hmaih chi a ni lo. India rama State pachhe ber pawl Mizoram thlengin Kimchi te kan lo hmelhriat ve phah a nih hi. Tunlaia kan chindan hi inbihchiang teh ang. Inneihniah man tam tak chawiin (a \hen chuan puk chawpin) mo kawr kan hawh a, khawthlang lam ho tih dan angin kawr inang hak te kan intihhmuh a, kan hunpui (Inneih ni, Krismas leh adt)ah hian kan hnam inthuamna hian hmun a chang ta meuh lo a ni ber mai. Mo leh moneitu te chu kan hnam inthuamin lo inthuam lo pawh nise, midang (a bikin hmeichhiate) tal hi chuan kan hnam incheina heng puanchei te hi bih nachang hria sela a \ha ngawt mai. Tichuan kan hnam incheina hi kan chawi nungin kan humhalh a lo ni reng dawn si a.
3. Taihmak: Mi taima tan Mizoramah hian eizawnna tam tak a awm, mi taima leh thawh hreh nei lo tan chhungkaw
chawmna tur hi a lungngaihthlak loh. Chuvang chuan kan phak tawh thiam tawk thawh hi i zak lo ang u. Tun hma atanga kan inzirtirna fuh lo tak mai lehkha i zir loh chuan ek paih i la ni ang tih ang kha kan paih bo a hun ta hle mai. Hna tha a kan ngaih leh kan thawh chak em em \hin sawrkar hnaah ringawt innghat lova hna dang thawh ngam a hun ta. Tunlai chuan ek paih hi eizawnna hlawk tak a ni reng tawh asin. Mizorama Agriculture Department awm hma khan kan pipute chu ei leh bar kawngah chuan an intodelh asin, Supply Department awm hma pawh khan ei turah an buai ngai lo. A chhan chu hna an thawk a, lo/leipui neiin an ei bar tur an thawkchhuak tlat alawm. Midang rinchhan lovin anmahni thawhchhuah ngei eiin chhungkua an din \hin. Kan rama hnam dang hnathawka ei zawng an tam chhan chu an hna thawh ang kan thawh peih lo vang a ni. ILP tih vela buai buai lo hian an thawh ang hi thawh thiam a, an hlawh aia hniama thawk duh Mizo tlangval kan awm \euh chuan Mizoramah hian la awm rawh u pawh ti ila an ramah min hawsan dawn tho tho.
Thil chiang tak pakhat chu Mipa lumeh chungchangah hian a ni. Kan rama vai lumeta ei zawng tam tak awm \hin kha tunah chuan khang vai lumet \hin ho kha hmuh tur an awm tawh mang lo, engvang nge, a chhan chu Mizo tlangvalte’n lumeta eizawnna an luh chilh tak vang a ni. Hnawhchhuah kher ngai lovin anmahni thuin an ram lamah an haw thla mai a ni. Chuvang chuan hnathawh kawngah emaw zirna kawngah emaw kan theih tawpin thawk ila, ram leh hnam humhalhna kawngah kan thawh hlawk a lo ni mai dawn a ni.
4. Hnam dang mi kawppui atana neih loh: Hnam inchimralna hmanraw pawimawh ber chu nupui pasal a hnamdang mite nena inneih pawlh hi a ni. Hnam dang tih hian Mizo hnahthlak ni lo hnam dang zawng a huam a ni. Vai pasala nei kan sawisel nasat viau laiin Sap pasala nei erawh chu sawi an kai ve vak lo tlat. Engpawhnise, hnam dang pasala nei tho an ni. He huangah hian hmeichhiate hian sawi an kai lo thei lo, kan hnam hi mipa thlaha chi thlah kal zel a nih avang hian Mizo tlangvalte hian hnam dang mi nupuiah lo nei ta se an thlah te chu Mizo an nihna a bo chuang lo, amaherawhchu hnamdang mi neih loh erawh chu duhthusam a la ni tho. Mizo hmeichhiate’n hnamdang mi pasala an neih fo hian chhan \ha tak a awm thei, an mi duh zawng leh anmahni enkawl thei tur an hmuh loh vangte pawh a ni thei. Kan nulate’n hnam dang pasala an neih kan duh loh viaulai hian Mizo tlangvalte pawh hian inenletna tur tam tak kan nei. Zirna lamah leh eizawnna lamah kan hmeichhiate’n nasa takin hma an sawn si a, Mizo tlangvalte’n heti lama \an kan lak loh chuan kan nulate hian pasal atana neih tlak hi Mizo tlangvalte zingah hian an hmu lo telh telh dawn; chu chuan hnam dang mi pasal atana neih hi a ti hluar thei. Chuvang chuan Mizo tlangvalte’n \an kan lak thar a pawimawh. Pathianni tlai a kawnglai a rui taka kal pai \uang \uang te, dawrte a len a nuih uar uar te hi sim atana \ha tak a ni.
(Karlehah chhunzawm tur)