Han hawi vel ila kawtthler inpersan tak tak kan ni hlawm a, a \hen Vaivakawn lama lawi mai awm tak, a \hen lah Hunthar venga lawi mai awm tak, a \hen lah Protective Home lama lawi mai awm tak, a \hen lah Chanmari lama lawi mai awm takte Chanmari West-ah hian kan khawsa khawm lawi si a nih hi. Chuti chung chuan veng inlungrual tak, rikrum thila chhuah khawm a ngaih chang pawha inhuikhawm zung zung \hin kan nih tehreng nen; tunah chuan eng kan ti zo ta nge? Kan inlungrualna chuan tlakhniam lam a pan zel mai si, \an kan lak tlan a va ngai ta ve le!
Changkan kan duh, changkang pawh kan changkang sawt khawp mai. Mahse, changkannaa ngaia kan thil neihte hi mite tana hnawksakah kan chantir zo ta! Lirthei kan nei, kan duh ang angin kan dah leh ringawt zel a. Pathianin in leh lo min dinsakte hi mi dangte tana malsawmna ni lovin phurritah kan chantir ta mai em ni le? Kan inbiak hlatna khawlte hi sual tih nan em ni kan hman thin? Kan kawngpui \ha neih ve chhunte hi bungraw dahkhawm nan kan hmang zo mai dawn em ni? Tuihawk luankawrte lah chu ek thli luanna atan kan hmang zel mai bawk si.
Kei zawng hetia tih mai atan chuan Chanmari West hi ka phal thei mawlh lo. Ka ngaihtuah chhuah belh zel a, Damdawi zuartute hian anmahni hlawkna tur chauh ngaihtuah lovin, damlo te tan chauh an damdawi zawrhte hi hralh thin se, dam reng tan chuan hralh tawh lo se tih hi ka duhthusam a ni.
Kan veng chhunga kan kawngpui neihte hi lirthei leh mihring kal nan hmang \angkai ila, lirthei neitute’n kan lirthei hun nana (garage) hmang mai lovin, kan lirthei dahna hmun tur hi ngaihtuah hmasa ta zawk ila, kan kawngpui chu a lo nuam leh zual ang a, keimahni tan pawh a him zawk tur hi a nia leh. Kan thli, entir nan, ek thli (septic tank leh vawk in thli) leh tui chhiate hi mite tan a hnawksak thei tih hriain,a rim chhe thei tur zawnga luan raltir mai lovin, a paih dan tur leh a tih riral dan tur dik takin i kaltir \hin ang u.
Ran kan vulh duh a nih pawhin, a enkawl dan leh enkawlna hmun tur mumal tak ngaihtuah hmasa \hin ila. Kan ranvulh, ui leh arte hi mi dang tana hnawksak zawng leh harsatna siam lo tur zawnga kan enkawl a \ha khawp mai. Kan in luahtute tan pawha hrawn nuam takin khawsa ila, hlim tak leh lungmuang takin kan in luahtute hi khawsaktir i tum ang u.
Heng kan sawi tak ang hian khawsa thei ta ila chuan chunglam pawh hian mal min sawm ang a, kan rama thil \hate hi Pathianin min pe ngei ang tih kei chu ka ring tlat a. Chuti a nih loh chuan chunglam anchhia hi kan dawng palh ang tih ka hlau \hin. Hawh u, kan zavaiin \angrual ila, Chanmari West hi veng nuam takah i siam ang u.