Khawvel piantirh ata a hmasa ber atan Chanmari West Local Council inthlan chu kan lo zo fel ta a, tling an awm laiin tling lo pawh a tam zawk an awm. Tling ve zo ta lote kha in lo inthlahrung palh ang e, inthlahrunna chi a ni lo. A hmasa in a tling hote kha enge an tlin chhan ni ang a, a tling lo te hi enge an tlin loh chhan ni ang aw tiin ka ngaihtuahna a vakvel a, heng vangte hi ni ta berin ka hria.
A tling te:
Pu C.Lalmuanpuia: Ani hi eng vanga vote hmu sang ber nge ni ang aw tiin ka ngaihtuah a, a chhan tamtak zingah Pu Chunga (L) makpa rangkachak a nih bakah Tv Mawia’n pa ena a en, a pa Pu Liankhuma, lam taima tak (regular dancer) a lo ni leh zel bawk vei nen. Lam malsawmna a chang ni berin a lang.
Pu Lalliansangpuia: Salvation Army nih leh LS Bakery neitu nih fawmkemtu a ni a, heti ang mi hi zawng ta ngat ila Mizoramah hian an vang khawp ang, LC member nih mai loh chu hmabak a nei lo.
Pu F. Zosanga: Ani hi a nupui duh lai ngawih ngawihin hun lo takah mual a liamsan a, a hnu lawkah a nu duhtak a boral leh zel bawk nen (min lo hrethiam ula) Ngaihte-an a lo experience tawh atanga a sawi danin “nupui sun chu Local Council inthlan vote zawn nan leh tlin ngat phei chuan nupui thar melh na’n thil tangkai lutuk a ni”a ti. (a risk sang vet vet tak a ni.}
Pu H.Lalramhluna: Pi Zodingi makpa a nih hi zep rual a ni lo. ZNP han lam rikin Chanmari West-ah na na na chuan a pa Pu Tlangliana (L) kha mitthlaah a lang thin, chu mai bakah a u Pu H Laltanpuia hi INC ticket-a VC/LC member ni lai ngat kha a ni a, tling lo rual a ni lo.
Pu RL Thanhnuna: Sande Sikul report leh Pawl insiam rem vel a han puang hi ropui tak a ni ropui tak. Presbyterian kohhran member vote nei chin tan chuan a thilpuan dan atang ringawt pawh hian vote loh chi a ni lo reng reng.
Pu H.Vanlalvena: Vanapa Section leader lo ni hrep tawh, kum khat chawl lailawka assistant leader ni leh mek, Puanthui thiam Angaihi meuh pawhin iai hauh lova a thlan ngam ngat a ni a, a symbol “UI”hrim hrim hian mi a lem em a, Local Council member nih phu vet vet tak a ni.
Pu HLalthuama: Pi Rualchhani pasal, kan veng mai pawh ni lo Mizoram pum huap pawha music thiam hmingthang Tv H.Lalthazuala pa ni bawk, amah thil inrem lo chuktuah rem thiam mistiri a ni lehzel bawk nen, thlan tlin a ni hi thik rual a ni lo.
Heng zawng zawng bakah hian vote an hmuh tam bik vang liau liau a ni.
A tling lote:
A tling zo ve ta lote hi in lo inkiltawih ringawt ang e. Inkiltawihna chi pawh a ni lo, achievement ropui lutuk khawvel pum huapa Mizoram Local Council member inthlan hmasa bera candidate hmasa ber ni phak chin, in thih hnuah pawh in thlanlunga ziak ngam ngat, hetiang deuh hian: ‘Min hmangaihtu MaSangtea, Khawvel pumhuap Mizoram Local Council Inthlan hmasa berah BJP Ticket-a candidate hmasa ber a ni a, mahse a tling zo ta lo ’ tiin.
Ngun takin ngaihtuah ula han hawivel teh u, kan veng mipui zingah hian damchhunga Local council inthlana candidate ni phak lo tur an tamzia hi. In caliber-in a phak loh hrim hrim vang a ni lo a, a tlingte hi in tluk loh bik vang pawh a ni hek lo. Pa lam (dancer) taima deuh in neih ve loh vang te, nupui in la sun ve loh vang te, bakery in neih ve loh vang mai mai te pawh a ni thei. A chhan bulpui berah chuan Local Council seat hi a tlem lulai em a tin ni; tun tum inthlanah khan seat 16 chu awm ngat se la chuan in vaiin in tling ngei ngei ang tih hi chiang takin ka sawi ngam sak.
Pu Huma, Ex VCP-cum, Ex Local Council Chairman hmasa ber, lo inthlahdah hauh suh, YMA takin ka ngen a che, MLA inthlan lo awm leh hmasa berah Chief Minister post chelh ngei turin lo intuaihriam nasa teh, kan veng mi minister pawh kan awm ve ngai loh hi. (a hua hua sih hlawk ah)
Electric kal sual kan tih leh thin hi
- C. Lalzarliana
Chanmari West
Tunlai khawvelah electric kan hmang nasain, a awm loh hlek chuan enga ti nge? Tu sorkar nge kan ti ruai thin a nih tak hi ! Eng kan ti zo ta nge ? Puh mawh tur zawngin kan khu ruai a, keimah vang a ni chu kan ti duh der si lo.
Thal laiah in han kang se, a tikangtu chu electric kan puh fai ta vek mai. Tawng thei lo ber, ngawi reng bawk si, a thiamthu pawh sawi thiam reng mah se sawi duh bawk si lo; puh zawng a nuam ber mai, court-a mitthi khin ang deuh a ni. A! Lal Isua dawta an puh, thiam lohna pakhat mah nei lo, a thiam thu pawh sawi duh lo ang deuh kha ni ber in a hriat.
Mahse, thil mak tak mai chu electric pawh awm lo, in a kan tak avanga electric kal suala puh tlat mai te, hriat tur a awm. Maubawk in kang pawh electric awm loh lai a nia, mombati chhit atangin a niang then khatin an tih lai reng pawhin load shedding vang a ni an la ti duh tal nia maw le !
Tun laiah chuan hmanruate pawh a tha tawh a, chu hmanraw tha chu hman a nih phei chuan electric short circuit a lo awm palh pawhin eng a sa lem lo. A tha chin kan la hmang pha lo a nih pawhin uluk taka zama zawm ni thei se, a zawmna te tam lo thei ang berin a connection lai uluka chip (tied)-a siam a, a khat tawka endik (check) reng tur a ni.
Kan in tihen nan hian tam tak hi chu kan pawt kual vel mai mai a, a en theih chuan thil dang chhe thei lam kha ngaihtuah a awm leh chuang tawh lo. Electric short avanga vengtu santiri kan dah thin cutout-te pawh kan duh dan danin fuse kan hmang a, a then lah hian darzai emaw thirzai emaw kan hmang leh tawp thin. A chah har chuan cutout dah khan awmzia a nei lo tihna ani. MCB-te kan hman chuan lo ti short palh pawh ni ila, a lo veng tha em em thin a ni.
In kang kan ti fo thin hi a fawhkai tha tak a bulah a awmte a nih loh chuan in han kang khawp tur hi chuan in wiring hi chu a awm har khawp mai. Electric short avanga kan puh fo thin hi chu a hmangtu te zir loh vang hi a ni chawk; a hma lama kan sawi ang khan puh tur awlsam ber hi puh a ni fo thin reng a ni. Connection kan lak tirha load kha ringin, kan pawh belh zel a, kan duh ang angin kan siksawi kual vel thul, connected load ngaihtuah lem lovin a tha tih vangin hmanraw tha electric hmang chite kan han lei ngawt a. Heng avangte hian kan wire hman kha thlak leh a awm bawk si lo, a zawh loh nghawngkawl kan bahtir a, wire-te pawh a lo kang thei thin. Mahse, electric short avang hi chuan in kang hi chu a awm har khawp mai.
Electric hrui in zawmna lai leh Switch bul hnaiah thil kang awlsam thei dah lovin Electric wiring reng reng a khat tawka check thin nise. Duh duhin siksawi kual kawi lo bawk ila, tichuan kan him tlang thei ngei ang.