Mahni in chhung pawh luah lum hman mang lo khawpin, kum pui lingletin, khawtlang tan, in tha leh zung, in thiamna leh finna, theihna zawng zawng sengin, mawng vawm ba ang maiin in che chhuak a, fak a hnekin reltu leh sawiseltu che u chu an la thahnem fu bawk sia!!! In va han chhuanawmin, in va han awhawm loh si tak em!! I mawhphurhna, i kova tla hi a rit em a ni. I nupui fanaute phei chuan bansan daih turin an nawr hial lo che maw? Mahse....Khawtlang Hmangaihtu, Y.M.A.Hruaitu i ni miau va. I hmaa awm apiang i hmachhawn a ngai tlat.
A ni reng lah taka, veng thler a zauin, YMA hmalakna pawh a lianin tihtur a tam reng a. Mitthi lumen, Khawhar Ina kal, Thlanlaih, Hnatlang, Committee...... a tam khawp mai. Chu a chhapah, mahni Kohhrana mi tangkai leh a pawimawh ber ber i la ni bawk si. I indaih lo viau reng a. Khawtlang Hmangaihtu, Y.M.A. Hruaitu i nih kha.
Hlawkna tel tur pakhatmah, (sum leh pai zawng phei chuan) awm bawk si lo. Hlawk chu sawi loh, mahni ipte atanga i phawrhte a tul chang a la awm bawk nen. Mi dangte tan i inpek ralraih te pawh a ngai a. Khawtlang Hmangaihtu, Y.M.A. Hruaitu te tihtur a ni fo si.Chung lama mi khian i thiltih kha a hriatpui che a nia.
“Chuti chu, khaw nge” tiin tan han la sa teh mahla, i hlawh tur chu a ngai reng tho. YMA thiltih nikhuaa i hmel kan hmuh loh a piangin keini member Phunchiara te ho hian kan lo rel ve hman ziah che a. I lo kal pawhin engvakahmah kan la ngai chuang lo zui. “Hruaitu a ni a, a tihtur reng alawm” tih bak chu Chawimawina NOPUI hlan tur che kan la nei miah lo leh nghal.
Khawtlang thatna tur leh hmasawnna a nih chuan tiin zan khaw tairek thlengin i meng a, mi kawmkar i hrut a, sual dovin ke i pen bawk a, mahni Khumpui chu i ngai ve thei viauin ka ring? Keini member Phunchiara te’n inthiam lohna nei miah lova, zanlai au thawm leh Dar Ri Mawi Lo kan muthilh hnan leh mai theih lai hian nang chu, “Chanmari West Veng mipuite hriat tur...” tih rual rualin i mu zui thei tawh miah lo va. Hruaitu i ni miau va. I awmna section huam chhung a nih ngat phei chuan Eizawnna tlansan thak khawpa in i la buai zui. Eizawnna lama i thawhpuite mitmeng kawite pawh i hmuh phah changte pawh a awm foin ka ring. Chuvangin. i tuangte pawh i tichhah lui ve fo mai thei. Hruaitu i ni sia.....
I tihtur, i kova tla ni chiah si lo, i tih ve ngai ziah si, ka huphurhpui em em mai che chu, mi inchhung buaina, mi nufa leh pafa, unau kara inhmuhthiam lohna thlenga ban phar tura an rawn ko thin che hi a ni. Mahni inchhung ro pawh rel fel hleih theih loh changte pawh a awm ve lai kara mi fate sual zilh lo ngai leh fo bawk nen. Theih tawpa Khawtlang tana sual dova, mi fate awm tha duh lo thu tha i hrilh, i rawn haw lam kha kawngsir atangin keini member Phunchiara te ho hian, i hnung lamah kan nuih zui che tih leh zel hi chu ka hrilh tawh lo mai ang che. I rilrute pawh a na lutuk palh ang. “A fapa/fanu pawh....chuti...khati.....” tiin i chanchin chhelai ber ngaihtuah chhuah phet tumin kan rilru kan lo la seng ve leh ta nghal a. Aw...i dinhmun hi a khirh a ni. Khawtlang Hmangaihtu, Y.M.A. Hruaitu i ni miau sia le.
A tawp berah chuan, keini member Phunchiarate ho thusawi leh kan lo teh vena che hi engah mah ngai duh suh, tih hi kan hrilhru teh ang che. A ruk tak chuan, keini member thatchhe ber berte pawh hian kan ngaisang chein kan zah ru ngawih ngawih che asin. Kan dah san lutuk vang zawk chein kan phut sang che a, kan beiseina che hi a sang ve leh zel zawk a ni. I lakah kan pangchang em mai a, i tel lova, YMA hmalakna a kal tur hi kan ngai ngam lo zawk mai a ni. Theih tawp chhuah la, kal zel rawh. Khawtlang Hmangaihtu, YMA Hruaitu i nih kha. Hei hi i hria ang u. Kan hruaitute hi mi fel leh dik ber berte an ni kher lo vang. Mihring ve tho an nia, tihsual chang nei, chauh chang leh theih loh chang nei ve thin an ni tih hriain, an dik lohna laia sawisel mai lova, thurawn pe tu nih i tum theuh ang u.
Aw, YMA Hruaitu, Khawtlang Hmangaihtu, Ka Va Han Ngaisang Che Em!