Tunlaia Mizoram mipui titi tam ber leh ngaihtuahna luahtu ber chu eng party-in nge sawrkarna siam ang tih hi a ni awm e. Keini vengah phei chuan kan veng mite hi an10:18 PM 11/8/2013 tling zo ang em? tih hi kan inrinsiak luih luih a ni ber. Hetihlai hian Mizoram sawrkar chuan a hnathawktu mi 5 (5 officers) te chu IAS (Indian Administrator Service) post pakhat (1) luah turin Union Public Service Commission (UPSC) hnuaia interview hmachhawn turin a chhawpchhuak ve mek bawk. Heng Officers tha chungchuang panga (5) te zingah hian kan vengpa ngei mai Pu HVL Zarzoenga chu a tel ve tlat mai le. Kan chhuang takzet e! Eng vanga UPSC hnuaia interview tur nge tih leh tuldang ka hriat ve chhun chhunte bengvarna a lo nih beiseiin kan han sawi zau ve ang e.
Mizoram sawrkar hnuaiah hian IAS post hi 29 a awm a. Chung zingah chuan sawrkar-in tul a tihdan a zirin MCS-in Post 15 an chang a, direct IAS-in post 12 leh Non-State Civil Service (Non-SCS)-in post 2 an luah thei a ni. A tak takah erawh chuan heng IAS post 29-te hi hnawh khah a ni ngai meuh lo. IAS tamtak (hnamdang) te hian Mizoram hi chhuahsan an duh deuh tlangpui thin. Tichuan Pu Zoenga te interview-na tur hi Non-SCS atanga post khat (1) luahtu tur a nih chu. Hetiang mi kan vengin kan nei hi a chhuanwm tak zet a, Non-SCS atanga interview tura thlan chhuah nih theih hrim hrim hi thil namai a ni hauh lo. Mizoram sawrkar hnuaiah Officers heti zozai an awm a, chung zinga a tha zual panga (5) zinga tel nalh chu ropui tak a ni ringawt. Tin, Non-SCS atanga IAS nalh tur chuan a saptawngin 'Right Person at the right time and at the right place' nih ve chu a ngai. ACR/APAP (kan hriatthiam em ang chu) tha chungchuang tak, kum 5 or 7 senior Grade Officer an nih hman a ngai a, kum 5 or 7 (a kum zat hi ka chiang lo) service an la neih a ngai bawk. Heng ho atang hian screening committee-in mi 5 UPSC hnuaia interview turin a recommend thin a ni.
Kum 2000 khan Pu K Lalnghinglova, tuna Secretary to the Govt. of Mizoram hi Non-SCS atang hian IAS ah a lo lut tawh a ni. Amah hi chutianga uluk taka sawrkarin a lo thlan chhuah a nih ang ngeiin IAS direct a lut ho zingah pawh a hniam bik lova, kawng engkimah a fit em em a ni. Chutianga sawrkarin mi tha, dik leh rinawm, hna thiam bawk si a thlanchhuahte zingah kan veng pa ngei mai zu han tel ve tlat a.....!!
A nih leh Pu Zoenga chu lo tling ta se engtin zel nge ni ang? E le, a lo tling ta a nih chuan Lal Bahadur Shastri National Academy of Administration (LBSNAA), Mussoorie, Uttarakhand-ah training turin kum thar lamah min liamsan daih mai ang maw le! Heng Service atanga IAS lut ho (confer-an tih) te pawh hian a bulte atanga training engkim an tih leh vek a ngai a, direct atanga lut hote nen an training ho leh vek thin a ni.
Amaherawhchu, service dang atanga lut ho reng reng chu an lo service tawh kum engemaw zat (ka chiang ta mai lo) chu chhiarsak an ni a, chuvangin training rual theuh theuh training an zawh meuh chuan an in senior hleih a, an dinhmun leh posting-ah pawh an inthlau thei viau nghal thin. Engpawh nise, fate rual lek lekte nen an training ho dial dial phawt chu a ngai dawn a ni. Tichuan, amah Pu Zoenga chu a lo tling ta a nih chuan training a zawh hnuah AGMU Cadre pek a ni ngei ang a, Mizoram chhungah a awm nghal lo mai thei. Kum rei vak lo chu Delhi or India ram khawpui lian a Mizoram aiawhin Residential Commissioner (RC) ah te a awm kual thei bawk. Chuta tanga Mizoram a lo chuang chhuak leh a nih vaih chuan UD&PA chauh ni loin Secretary to the Govt. of Mizoram a ni tawh hrim hrim dawn a ni. Chutah zet zawng, Awi ka rei... Pu Hlutea te nen chuan a bulah kan inkhelin kan au te chel chul ngam meuh tawh lo ang. A badminton khelh pawh a thiam sawtin a vuak (smash) reng reng pawh kan lo la (return) thei tawh lo ang a, a hma zawnga pangpar huan lama khel thin kha kan bulah automatic-in a rawn khel pha nghal ang a, partner atan kan inchuh deuh laih laih tawh ang a, tlai takah lo kal pawh nise kan lo kian zung zung tawh ang.
In chawimawi a, lo inlawmpui a, chibai a lo intlawn siak nghal ringawt tumte kan awm palh ang e, a la tih chi miah lo. Amaherawhchu heng thil a lo thlen chhoh dan hriat a inngaihsan erawh a hun ve tho nia ka hriat avangin he thil hi veng mipui te hriat atan ka han ziak ve mai a ni e. Hetiang mi fel tak naute han neih hi chuan U zawk nih hi a lo hrehawm bik hauh lo mai....hahaaa....!