Ram a changkang tial tial a, Mizote pawhin Rimawi Khawvelah pawh hma kan sawn ve zel a. Zaithiam an lo chhuak tam tulh tulh a, zai dan chi hrang lah kan hre hnem telh telh bawk. Heng zawng zawng hi hmasawnna chi khat chu a ni ngei mai. Khawtlangah hian mi chi hrang hrang, rimawi ngainat zawng inang lo tak tak kan khawsa hova. Pathian fakna hla chauh ngaithla duhte kan awm laiin; Lengzem leh lenglawng tel lova tlei thei miah lo pawh kan kat nuk awm e. Engpawh chu nise, zaithiam leh rimawi hian nun a tihlimin mihring rilru hah a chhawk a chhawk ve fo thin awm e.
Zaithiam ve miah lo leh zai honaa phun ri ve ngai miah lo pawh hian zaithiam leh thiam lo chu kan hre hrang ve thlap bawk sia. Mi zai ruala zai ve thei miah lote pawh hian zaithiam zai chu kan ngaina ve viau. Hei hian rimawi hlutzia a tilang chiang hle awm e.
Mizote hi Rimawi ngaina tak hnam kan nia a. Kan pi leh pute pawh khan an rilrua thu lo thleng apiang kha hlain an puang chhuak mai thin a, mi dangte nunah pawh thu a sawi nasa ngiang mai. Pi Hmuaki chuan a hla phuah thiam a thih phah hial a, hla avangin Chhim leh Hmar Indo hial a lo chhuak a, mi tam takin nunna an chan phah a. Hei hian hla leh rimawi thiltihtheihzia a tilang chiang khawp mai.
Kristian kan nih hnuah Pathian fakna hla hmangin Pathianin kan nunah thu a sawi thin a. Kan thlarau nun chawmtu tha ber chu Fak hla hi a ni a tih theih hial awm e. Chuvang chu a ni ang, Khawhar chhungte hnem nan ber pawh zai hi kan lo hmang reng a ni. Chutih rual chuan zai ve ngai lem lo tan chuan hla vawi 2/3 an han nawn hi chuan ninawm tak a lo ni ve thei bawk. Mihring kan thuhmun fo thei lo tih hi ava han chiang tak em!.
Bible thawnthu lam atang thlir pawhin Rimawi hian mihringte nunah hmun pawimawh atk a lo chang tawh a; Thuthlunghlui hunlai atangin Rimawi hian mihring nunah thu a lo sawi tawh thin a, Israel lal Saula kha ramhuaiin a tihbuai chang apiangin Davida khan rimawi a tumsak thin a, chu chuan a nun a tihahdamin a rilru hah a chhawk ve fo thin a ni.
Ram changkang zelah zai dan leh zaina hmanruate, a ngaihthlakna hmanruate pawh kan nei changtlung tual tual a. Mizo te'n Tape Recorder kan neih hma chuan Thla en zana leikapuia zaite chu kan lunglen hnem nan kan lo hmang thin a, a thawm lo hre phakte chuan bengchheng tih aiin an lunglen a kaitho zawk tlat thin. Beisei tur leh ngaihthlak tur dang an neih loh vangte, an nunphung a inan tlan vangte pawh a ni mahna le.
Kan pi leh pute tana thlawhmaa thereng hramte a ngaihnawm a; an lung a tihlen viau laiin thangtharte tan chuan bengchheng leh ri awmze nei lo chu a ni ve mai bawk si. Tunlai khawvelah chuan, kan hun hman dan te, kan eizawnna te a inang lo hle tawh a. Tin, lehkha zira inelna khawvelah kan awm tawh a. Eizawnna chi hrang hrang hmangin hunawl pawh kan nei hman tawh meuh lo tih theih khawpin kan buai a. Chutihlai kara rilru hahdamna hun awm miah lova bengchhengin kan nun a tibuai thin hi chu zia lo tak a ni.
Rimawi ngainatu pawh kan ngainat zawng a la inang lo leh zel a. Keiin mittui nena lungchhe taka ka ngaihthlak kha tu emaw tan chuan bengchheng leh ho mai mai a ni thei tlat. A ngainatu tana tahpui zawih zawih chunga ngaihthlak a nawm viau laiin, tu emaw tan chuan bur chhe ri nen a danglam hran lo tlat. Tunhma deuh chuan Tape Recorder nei hmasate khan thenawmte ngaihthlak phakin an zaitir kher thin, tuman an haw hran lo. Mahse tunlai khawvelah chuan chhungkaw tin deuh thawin zai ngaihthlak theihna tur hmanrua kan nei tawh a, mi dangte kep kher a ngai tawh lo tih hi kan hriat a tha. Keimahni mawi tih zawng ringawt ring taka mi dangte ngaihthlaktir ve phet tum hi a changkan hran lo. Pathian fakna hla pawh nise ring taka kan tihrik hian mi dang tan bengchheng a ni thei tih hria ila, Pathian duhzawng pawh a ni ber kher lo vang.
Chutih mek laiin mi mitmei venna chang hre miah lo leh mi dang zahna chang hre miah lova rimawi hmanga bengchheng siam ching kan la awm hi kan changkanna daltu pakhat chu a ni tlat. Krismas leh Kumthat vuakvetah hian hetiang hi a nasa leh zual. Ram changkang zawkah chuan bengchheng siam hi Thu buai neih theihna a ni a, Mizote zingah chuan kan inhmaizahna avangin tuma'n thubuai hla buaiah kan la lem lo. Mahse, mite tana hnawksaka khawsak hrim hrim hi Kristian-te tihtur a ni lo. Mi dangte zahna chang hriat hi mahni zahawmna a ni tih hriain, rimawi ngainatute pawhin mi dangte tana hnawksak lo zawnga khawsak kan thiam a ngai khawp mai.