Hmuh dan a inang lo thei a, ka ngaih dan chuan 2013-14 Mizoram Premier League season chanve thlenga kan thlen chinah kan che \ha thaw khat hle niin ka hria.
Kai thar awm chhun kan ni a, MPL khel tura tling tlai ber kan ni bawk nen, player \ha kawl sa kan neih loh piah lamah la lut turin hun kan nei tlem ber.
MPL team pariatte sum hman tur ruahman enin Chanmari West-in budget a nei tlem ber a, sum hmang hnem ber tura ngaih Mizoram Police leh Aizawl FC-te nen inkhaikhin phei chuan an sum ruahman hmun ruka \hena hmun khat vel bak kan nei pha lo.
Squad hrang hrang leh player kan neih dan enin title chuh pha lo tura rin kan ni a, season tir a\anga tlak hniam pumpelh tuma bei tura ngaih kan ni bawk. Chumai bakah team pariat zinga tawn hriat nei lo awm chhun kan ni tel a, tehna hrang hrang a\angin mite ngaihah che \ha tura rin kai kan ni pha lo hrim hrim.
Season khat chhungin league vawi 14 kan khel dawn a, vawi sarih zo tawhin point riat kan thawk chhuak a, point khat min paihsak. Kulikawn leh Reitlang kan hneh a, champion lai Dinthar leh cup chi hrang pathuma champion Chanmari kan inhnehtawkpui bawk.
Police, Luangmual leh Aizawl FC lakah kan tlawm thung. Point sarih nen season chanve kan hmang a, pasarihnaah awmin kan hnuaiah point thum nei Reitlang an awm a, parukna Kulikawn nen kan point hmuh a inzat.
A mawngah awm ila, kan duh dan ni lo mah se football thlirna tlanglawn a\angin thil awm tak a ni ngei ang. Mahse, Chanmari West hian khel \ha tura team mamawh thahrui pawimawh tak pakhat kan nei a, team dang zawng aiin kan nei \ha zawk niin ka hria a, chu chu mipui an ni.
Player-ten phurna an neih a ngai a, chak duhna tak tak nen an khelh a tul a, keini team phei chuan kan mamawh lehzual ang. Chak loh hrehawm tikhawpin mipui thlawpna \ha an dawng a, hei hian thahrui tam tak a siamsak a, football chanchina team \ha ber ber pawhin hei thil hi mamawh loh lai an nei lo.
Club football-a fan nei \ha leh a hmuna entu nei tam ber German team-te tichaktu a ni fo. A bikin tunlai football-a club thlawp \ha bera an sawi mek chu Borussia Dortmund fan-te an ni. England-ah pawh inkhel se mualneitu aiin thawm an nei \ha a, an team-te n tlawm chang nei mah se an ‘boo’ khum ngai lo. Lungawi lohna an neih fote mualphona thlen khawpa an kalpui thawm kan hre khat hle. Signal Iduna Park-ah league an khel a nih chuan mipui 80,000 aia tam pungkhawm ziah ang an ni a, he “Yellow Wall” aia hmuhnawm leh ngaihnawm hi tunlai football fan rual zingah an awm lo.
German club-ten suma lei theih loh thahrui pawimawh leh hlu em em an neih ang hi tlema zawng kan kawl a, MPL club zingah keini aia chang tam an awm lo. Anmahni \antu tam takte hmuh laia tlawm aia hrehawm hi player tan a awm lo va, a hmuna thlawptu nei tam lo team reng rengin beisei aiin an khel \ha khat khawp a; rin aiin an khel chhe deuh ziah. Chu chu home advantage emaw away disadvantage emaw tia kan sawi \hin hi a ni. Eng vang nge ? Mipui thawm \ha tak hmanga phurna leh chak duhna tak tak thinlung nei reng tura nawrtu a kotlang a\angin an awm miau loh chuan, player-ten minute 90 chhungin an theihna mar taka hman tluan parh an harsat a, inthlahdah palh a awl em em.
Season chaw hnu lamah player-te a\angin hmasawnna kan beisei sang a, mipui lam pawh hmasawnna tur nei ve tho kan ni. Hmasawn hi engti zawng pawhin a \ha em em a ni.