YMA leh kan khawtlang hmasawnna atana kan thawh pui zawng zawngte leh he thu chhiartu zawng zawng te chiabai ka buk a che u.
Kan Pathian in min hruai zel anga tunah chuan YMA -a kan rawngbawlna thawk chhunzawm thei turin Branch, Section leh Committee peng hrang hrangte kan in din chho leh ta a, kan khawtlang nuam leh hlim taka siam turin ka thawhpui zawng zawngte ka sawma che u. Kan thawh ho na tura kan ngaihpawimawh zual te lo tar lang ila.
1. YMA Zawlbuk sak :
Chhungkaw 1000 chuang kan ni a YMA member pawh 2000 chuang daih kan ni. Heti chung hian vantlang punkhawmna hmun tih tlak kan nei lo. Kan zavai tana pawimawh leh mamawh hi a rang thei ang ber luah theih a kan siam a ngai a, kan vengchhung nu leh pa Politician leh sawrkar hnathawk zawng zawng ten a puitlin theih nan kan theihna ang kawng kawng in i vei tlang ang u. Kan hruaitu ten chhung tin dap in pawisa leh thil dang an rawn khawn a nih chuan theihtawp a tan lo la theuh tur pawhin kan in ngen lawk a ni.
2. YMA Kumpuan :
Kan YMA kumpuan neih mek chu “khawtlang nun siam that” a ni. Nikum lam khan kan Sub-Committe te leh hruaitute thahnemngaihna avangin ram pumah thawk tha zual thlan chhuah a pathumna lai kan tling pha ve a, a ropui ngawt mai. He lamah hian kumin ah pawh theihtawpin hma lak kan tum a. Chhung tin mi tin in tih tur leh mawhphurhna kan nei leh vek dawn. Mi thenkhat mahni chauh in ngaihtuah thin ten midangte thatna tur vei ve thin tawh ila nu leh pa ten hmangaih dan dikin mahni fate hmangaih tawh ila kan tu leh fa te nuam taka an rawn khawsakna tlak khawtlang nun i siam ang u. Zu leh ruihtheih thil a buai thin leh buaina siam thin ten sim tawh ila, upa zawkte zahna leh ngaihpawimawhna neiin thalaite i harh thar ang u. Veng changkang lo tehna chu thalaite nungchang mawi lo hi a ni fo thin. Thenawm tha nih i tum hmasa ang u.
3. Faina chungchang :
Engti kawng mahin veng tawp tak veng nuam a ni thei ngai lo. Chhungkaw malah chuan faina chungchang a entawn tlak tak tak te kan tam tawh khawp mai, chutih lai chuan khawtlang huapa faina kawngah kan la hniam viau lawi si. Veng fai ni tur chuan tan lak kan la ngai nasa hle mai. Inchhung bawlhhlawh kan ngai thei lo ang hian khawlai bawlhhlawh hi ngai thei lo ila chuan hma kan sawn chak ngawt ang. mahni inchhung pawh ti fai peih lo te kan la ni a hetiang kan nih chhung chuan khawlai leh luikawr tawp vei chu a la hla hle mai. Tan lak kan la ngai hle a ni.
4. YMA Park chungchang :
Veng dangin an neih theih loh leh an awh ngawih ngawih veng lun laiah Park nuam tak mai kan nei a. Enkawl erawh a hautak zet mai le. He kan veng ro tha tak mai hi engemaw chang chuan kan hruaitute lu ti hai tu a ni thin. A hman dan dik kan thiam hlei thei lova a neitu ngei ten kan ti tawp a, thil tha lo tihna hmunah kan hmang fo mai hi a pawi hle a ni. Upa zawk leh nu nau te tan hmun ralti a chang thei mai ang tih a hlauhawm hlel love. Veng dang atangin an ran pan ve thin a, a neitu ten kan zir loh chuan veng ti hmaibal tu a ni thei tih i hria ang u. Kan hruaitu ten la thawm that zel an tum a, mitin in a hlutna hria in i enkawl tha sauh sauh teh ang u.
5. Tanpui ngaite tanpui :
YMA ingnhahna laipui a ni a. Hei ngei hi kan biak Pathian duh dan pawh a ni. Tanpui ngaite tanpui a hun leh tha hmang thin te hi a rawngbawltu atan Pathianin apawm ngeiin ka ring tlat. Mite tanpui an ngaih laia tanpui thin tu te hi an hlim thin a, Pathian pawhin mal a sawm thin. Hetiang mite hian khawtlang an ti nuam a, YMA thawhpui tute an ni. Thalai, lusun chhungte in a kal thin, thlan lai thin, thingpui lum thin tu te, thingpui sem thin tu te, buhfai khawn thin te, hnatlang a thawk chhuak thin te leh a tawp lai pawh ten duh miah lo tute hi veng ti nuam tute an ni. Hetih lai hian mahni nawmna chiah ngaihtuah a hman hlel thin mi engmaw zat kan la awm. Kumin ah chuan “Kan vaiin aw” kan ti duh e. Pen chhuak ngailo te lo chhuak ula, a hma aiin in hlim zawk daih ang. Nu leh pa te pawhin kan tu leh fa te tir chhuak ngam ila tan tlan kan ngai ta a ni e. Nu leh pa te pawh kan thawkchhuak tha viau a tan lak erawh kan la ngai tho mai.
Veng nuam leh lungrual siam turin heti zawng hian i tang tlang teh ang ule