AR Lammualah kan au a, veng mipui tam takin kan club inkhel kan \awiawm \hin a, kan chak avangin kan hlim em em. Kan bengchheng a, miten min fak a, veng chhungah pawh \halaite titi ber chu Chanmari West Football Club chungchang a ni mek.
2000 chho vel khan Mizoram Football Association hnuaia division sang ber kan ni \hin a, hetih hun lai vel hian veng leh veng emaw YMA branch inelnaah pawh veng pum kan phur a, min chiah hneh hle. AR Lammuala inkhel entu ngah ber pawl kan ni \hin.
Hriat loh karin kan boruak a hniam hret hret a, Mizoram football pawh a tlahniam ve telh telh bawk. Mahse, nikum a\angin electronic leh visual media nen \angkawpin professional zulzuiin Mizoram Premier League kalpui a ni a, ram pumah football boruak a invawrh kang leh \an.
Season hnihna a\angin kan tel ve a, a chhe pawl tura ngaih kan nih laiin, mi \hahnemngaiten veng chhungah boruak chawk nungin rin aiin kan che \ha a, vawi hnih kan khelh tawhah tlawm nei lovin goal kan la chhuah lo va, vawi khat chakin a sang pathum zingah kan tel thei.
Vaivakawn lamah high school ka kal \hin a, chutih hun laia school khata kan luhpui; a \hen kan pawl rualpuite chu Vaivakawn football chanchina chhuan duhawm ber ang hiala sawi ngam an ni.
High school kan luh a\anga kum nga hnu velah an vul zui hle a, ram pum hriat hlawh phak niin khatih hun lai khan Vaivakawn chu football thiam veng tia sawi an ni . Mahse, an ni reng lo va, chhuan thar an neih loh avangin rei lo te hnuah an zuih ve mai.
Lammuala an inkhel kan en \hin ka thiante khan tunah chuan kan veng inkhel an en a ngai ve ta tlat. Vaivakawn football chanchin kan sawipui \hinte nen kan veng team chungchangah titi kan vawrh a ngai ta.
Football-a hriat kan la hlawh hma daihin, Vaivakawna an hruaitu pakhat chuan “Chanmari West hian hma an sawn em em ang. Tualchhungah tournament mumal takin an nei a, Vaivakawn field-ah an rawn inkhel a, an inzui haw nguah nguah zel. Football an lawm a, veng pumin an tuipui hle tih a hriat,” tiin a sawi.
Pi Tlangkhumi Memorial, Tv Lalruatkima Memorial Tournament tihte khelh a ni \hin a, mimalin sum an thawh tawh loh hnuah pawh YMA-in kum tin section inelna a buatsaih zui \hin. Thalaiten kan hlutin nu leh pa tam takin min \awiawm a, naupang an bang bik lo va, a phur hlei hlei an ni.
Sporting Club pawhin kum bithliah inelna siamin, hriat loh hlanin kan veng a\angin player \ha, ram pum huap pawha zahpuiawm lo an chhuak a, veng mipuiten kan chhuang a, miten min hriat phah. Football nung taka kan kalpui lai khan naupang rilruah chi a intuh a, football thiam an rawn chhuak mai. Kum nga vel kal ta a\ang kha chuan veng leh veng inelnaah a \ha pawla ngaih kan ni ta reng a.
Mahse, tunah chuan naupang talent tihpunna lamah YMA emaw Sporting Club emaw pawhin ke a pen ta meuh lo. Khawvel changkang zelah thil tih a harsa telh telh a, hemi kawnga \hahnem ngai leh vei tan chuan kan hriat loh hlanin kan zuih thut ang tih a hlauhawm. Kum liam ta lam khan Pi Than\huamliani Memorial Tournament buatsaih leh zawk a ni a, kan la hlut hle.
Club hruaitute erawh chuan kan hniam ber lai pawhin tha an thlah lo va, ro ngawih ngawih leh tute mahin an hriatpui mang loh laiin an lo bei fat fat a, tunah a arh chhuak a, hmabak eng tak neiin veng pum a chawk nung thar leh.
Football ang tho hian thil dang pawhin veng chhung dap chhuakin boruak a nei \hin. Kawng dan en ila, YMA-in faina a buaipui lai hma leh hnua kan dinhmun te, zirna uar kum puan a nih lai vela zirlaite kha inzir puitling tak tak an ni hlawm.
Tih tak zeta thil buaipuiin awmzia a nei tih lantirtute pawh a ni thei. Khawtlangin \ha taka a thlawp miau avangin YMA hmalakna hian lukhawng a nei \hin a, a hun laiin a rah seng nghal lo mah ila a hnuah nghawng a nei fo. Khawtlang nunin hma a sawn a, a changkan theih nan khawtlang huapa kan thil buaipuiin awmzia a neih a \ul.