Sex hman hrim hrim hi sual a ni hauh lo va. Amaherawhchu, Nupui/Pasal nei tawh pawhin midang laka Sex a hman chuan atan sual a ni tho a ni.Pathianin nupa kara hman atana a siam a ni a. “Tisa chakna hmang thei miah lo mi enge maw zat an awm. Chung chuan mithiamte rawnin sum leh pai tam tak an seng thin.
Mahse, tha chhuak ta erawh tlemte chauh an ni.” tiin Doctor pakhat chuan a sawi. Tisa chakna nei theia min siam avangin Pathian hnenah lawmthu i sawi mawlh mawlh ang u. Sex hi a hmanna tur dik taka hman anih chuan kan Pathian tan hian, Pangpar mawi taka lo par chhuak ang hian a mawiin a hlu em em a ni. Nupa nun ti nuam a, ti nghettu, induhna ti zualtu leh hmangaihna nemnghettu pawimawh tak a ni.
Tin, Sex hi kan chakna hrikthlakna tur mai a ni lo tih i hre thar leh ang u, mihringte hi Pathianin a anpuia a siam, thlarau neia siam kan ni a, chu mihring chu kan lo inthlahpung zel theihna turin Pathianin Sex hi hmang turin min duh a ni. Sex hmang hian Pathianin kei mahni ang midang a siam thin, a hmanrua kan nih theihna pawimawh tak a ni. Chuvang chuan, Sex hi a zahawm a, a hlu a, a ropui takzet a ni.
Amaherawhchu, chu Sex chu a hun lova kan hman erawh chuan sual lian tak a tlingin Pathian mithmuhah a tenawm takzet a ni. Rilru, taksa leh Thlarau piangsual tirtu lian tak chu a hun lova Sex hman hi a ni tih hria a, Sex zahawmna te, a hlutnate hi min siamtu Pathian hrereng chunga kan ngaihtuah chian a tul takzet zet a ni.
Sex hi Siamtu Pathian thilthlawnpek a ni. Nupa chu dam dun chhung zawnga awm dun tura Pathian ruat an nih angin, inngai leh inthlahel tak leh inhmangaih taka an dam dun chhung an hman theihna atan sex hi Pathianin a pe a, chutiang taka awm dun thin tur chu an ni (cf. Deut. 24: 5; Thuf. 5: 15-20; 1 Kor. 7: 3-4).
Chuti taka thilpek lawmawm leh ropui chu a nih avangin Bible pawh hian a zep tit tet lem lo, inlawm vel dan tur chenin a sawi (Thuf. 5: 19; Htk. 2: 6; 8:3). Nupa takte chauhvin an chan dun tur a nih avangin Pathianin sex hi a hum tlat. “I uire tur a ni lo,” tia uire lo tura thupek khauh tak ngei pawh hi nupa nun vawn himna tura Pathian thupek a ni. “Pathian duh dan rin kual chhungah chauh sex i hmang tur a ni,” tihna tluk a ni. Sex hi thilpek a nih ang taka “Siamtu duan” dan anga hman tur a ni.
Kan Veng Tlangval Footballer Racy K.Lalremmawia Biangbiakna
Tv.Racy K.Lalremmawia hi tunlai hian Aizawl lamah Independence Day Invitation Football (Lajong Club, Shillong tan) khelin a rawn haw mek a, Racy-a hi India ram Football inelna sang ber I-League khelpha niin Shillong Club Lajong F/C ah a khel mek a ni. Amah kawmna hun tha tak kan nei thei leh kan zawhna te tha taka min chhan avangin achungah kan lawm tak meuh meuh a ni.
Q : Engtikah nge Lajong FC i zawm? Shillong Club tha hi engvanga zawm thei mai nge i nih?
A : 2008 December ah Lajong FC hi MFA kaltlangin ka zawm.
Q : He Club i zawm hnuin engtin nge training in neih?
A : Zing leh tlaiah training kan nei thin.
Q : Lajong i zawm hnua football pawn lama i khawsak dan, i mimal nuna club atangin inkhuahkhirhna a awm em? I chenna, ei leh in leh thildanga hun i hman dan. (Professional footballer-te football pawna an nun dan hi an hre chak thin)
A : Club ka zawm hnu hian ka nun a danglam khawp mai. Mimal nun ah pawh inkhuahkhirhna a tha khawp mai. Ei leh in lama pawh a tha khawp mai.
Q : Lajong i luh hnuin 2nd Div. lamah i khel tam fu a, 2009-2010 season-a I-League inkhelh tum khan i inlan tam vak lo va, team-a i dinhmun luah mek ni a i hriat min hrilh thei em ? Hmasawn zel tumna i nei em? Eng nge thlen i tum? (Entirnan, India National team a khelh ngei tum emaw, Lajong rirawl nih ngei ka tum emaw)
A : Coach a zir ve te hi a nia, hmasawn zel ka la tum a, India National Team ah chance ka neih theih chuan khelh ngei ka tum.
Q : Lajong i zawm hnuin inchhirna emaw, i beisei anga i hun hman phak loh avanga hreawm tih i nei em ?
A : He club ka zawm hnu hian inchhirna emaw hreawm tihna emaw ka la nei lo.
Q : Lajong-a i khelh hnua hamthatna i hmuhte min hrilh thei em ? ( I hlawh zat tarlan a remlo a nih pawhin, chhungkaw tan hnemhnanpui thama nih leh nih loh tal min hrilh theih chuan)
A : Chhungkaw tan chuan theih ang tawkin ka tang vein ka tanpui ve thin a, ei leh in, chenna chu club in min tumsak vek.
Q : Lajong club hi enge i hmuh dan ? India champion ni turin i beisei em? Club hausa tak nge tlachhe mai thei dinhmunah a ding?
A : He club hi kan in lungruala kan thlensan pawh ka beisei. Tunah chuan he club hi a pangngai tawkin ka hria.
Q : Lajong Senior team-ah Mizo engzat nge tunah hian awm?
A : Lajong Senior team-ah hian Mizo 10 kan awm.
Q : Lajong Club ah hian eng chen nge cham i tum ? Club lian zawka luh theihna hun tha neiin i in hria em ? Nge khelhna i hmuhna zawk tur club tenau zawk zawn i tum ?
A : Pathian in rem a tih chuan Club lian zawk a luh chu ka tum ber.
Q : Football hi kum engzat i nih atangin nge tih tak taka i khelh tan ? I naupan laiin eng nge football-ah thlen tum i neih ? I tum aia sang i thleng nge i tum ila thleng pha lo ?
A : Kum 15 ka nih atangin khelh tak takin ka khel tan. India National Team khelh phak ka tum a, ka tum ram ka la thleng lo.
Q : Professional footballer ni tura i naupan lai atanga kawng i zawh chhohvah tute nge nangmah tanpuitu mi pawimawh ni a i hriat ? Tun ang dihhmun i thlen theihna chhan nia i hriat leh i chhungten an tuipui dan che emaw an laka harsatna i tawh dan emaw ?
A : A hmasa berah chuan Pathian vanga he dinhmun hi thleng thei ka ni a, ka nu leh pa, ka chhungte’n min support tha em em bawk a ni.
Q : Lajong team i zawm hmain khawi club ah te nge i khelh ?
A : Lajong team ka zawm hma hian Chanmari West Sporting Club, SSA, Chanmari West Football Club leh Zotlang Football Club ah te ka lo khel ve tawh.
Q : Footballer ni tura pawimawh i tih ? Nangma nun atangin. (eg. thuawihna, tumruhna etc) Hma i sawn theih nana i tana pawimawh ni a i hriat.
A : Footballer tha ni tur chuan displine tha neih a pawimawh a, taihmakna leh insumtheihna a pawimawh hle.
Q : Kan veng thalai tam zawk professional huanga an luh theih nana pawimawh ni a i hriat ? Kawng kawhhhmuh theih dan i hriat tel phei chuan.
A : Ruihtheih thil laka insum theih a pawimawh a, a bak chu kawng a inhawng mai thin.
Q : Vanduaithlak takin thawhtanni a Luangmual FC nen in inkhelh tum khan i ke i tina a, eng chen nge a nghawng dawn ? Season thar I-League khelh tam i inbeisei em ? I dinhmun tur ni a i ngaih ?
A : Tunah rih chuan thla 1 chawlh min pe a, a bak chu Pathian thu thu ni rawh se.
Q : Kan vengin an chawimawi dan che emaw, an lo dawnsawn dan che ah emaw i beisei dan a ni nge, i beisei ang a pha lo ?
A : Kan vengin min dawnsawn danah hian ka lawm khawp mai.
(YMA AW Editorial Board ten kan chhuang chein i tum ram i thlen ngei theih nan i kal zelna turah duhsakna sang ber kan hlan a che)