Nia, nunhlui ngaih zawng a na em a ni. A bik takin, chhungkuain dam tlang taka kum khat kan han hman phei hi chuan hun hi a hlu zual em a ni. Chutih rual chuan, thihna avanga chhungkaw inthendarh te’n chhungkimlai ni an ngai bawk nen. Engpawhnise hun ral zel hi zawng chelh ding dawn lo mah ila, mahni tawn chinah theuh kan ngai viau reng mai dawn a nih hi.
Branch YMA leh Section YMA te’n kan thiltihte thlirlet ila, kum thar atana chin chhunzawm tur chi leh tih tawh loh tur chite thliar thiam a pawimawh khawp mai. Chu chuan hmasawnna min thlen ngei ang.
` Kum 2013 YMA AW Editorial Board te pawn kan thawhhona hnuhnung ber kan thleng ta der mai. Kum tluana khel lova Zirtawp zan apiang maia hnatlangho thin kan ni bawk a, kan inngaina tlang a, khua a har dawn viau mai.
Editorial Board-a ka thawhpuite chungah lawmthu ka sawi a. Min finchhuah a, nasa takin hma ka sawn a, ka tlin lohna zawng zawng min hliahkhuh thin avangin ka lawm hle mai. Pathian hruaina leh ka thawhpuite zarah mualpho lutuk lova kum kan vei thei hi a ropuiin ka lawm tak zet a ni. YMA AW chhiartute KUMTHAR CHIBAI kan buk a che u.