Kan hriat theuh angin kan veng chu kham panga awm kan ni a, kan in leh loin a zir lo, hmun rem lo tak takah kan inbengbel a, chhungtinin chhiat/that kan tawk lo thei si lo. Hetiang nikhuaa min hmangaihtu thenrual tha, kan ina lo chuangkai thinte hi an va rethei em! Kawtkaiah, rem lo zetin, zunin leh vawkin bul velah, ni sensa hnuaiah mitthi an rawn vui liam ve hram thin chu a nih hi. Thatna lamah nise, ruai buatsaih tumna rilruin min kiansan thei rih si lova, rem leh rem lovin, thenawmte in nen thleng kan ham berh a ngai a, rem lo zetin ruai chaw kan tlingtla hram thin.
Heng harsatnate umbo dan hi a awm mial lo maw? tiin ngaihtuahna kan sen a ngai. A bik takin mitthi vui (hunserh lai bik) ah hian tu in leh lo mah hian min dawl zo lo, in leh lo nei tha apiangin thenrual an ngah ve zel a. Mahni in chhung atang khera in vui kan tum hian harsatna min siam ta a ni. YMA Hall/ Kohhran Hall-ah te hian ti ta mai ila, min lainattu te chu thutna nuamsa tak, nisa leh ruah surin a tihbuai miah lovin an awm thei ang a, a rem zawk lo maw? Kan hruaitute hian an rilru han seng leh deuh se, thil tha zawk leh remchang zawk, ruahmanna tha tak an siam theih ngei a rinawm.