Hmasawnna tur nia kan hriat, chak tak leh khawng taka kan kalpui hian kawng lehlamah harsatna min thlen ve fo. Hydel project hian kan ram mamawh ngawih ngawih kawlphetha min pe tih mi tam zawkin kan hriat rual hian kan ram thing leh mau leh nungcha engemawzat chu a ti chereu a ni tih hrethiam phak chu mi tlemte chauh an ni leh si.
Thil tha lo nia kan hriat, eng thil pawh hi tih tawp emaw, siam that kan duh chuan a thlakna tur thil tha zawk kan duan fel hmasak a pawimawh khawp mai.
Kan ramah YMA hmalaknain nasa takin mipui a thunun a, Sorkar a khalh ngil fo bawk. Khawi ram pawh Sorkar chak lohna apiangah NGO te hnathawh a langsar a, an thawm a ring mai zel niin a hriat.
Mizote hi a huhova thil nawr huai tak leh phur chi kan ni a, kan dai bawrh bawrh a, kan pal baw pheng phung fo mai. Hei hian kan Hnam hi a hmai a tibal a, a tihmualpho zawk chang a awm fo. Ngaihtuahna fim tak kan hmang peih lo va, mi sah en saah chiang mang lovin kan kal a, kan inpal hnawk leh si thin a ang khawp mai. Chuvangin fimkhur tak leh Kristian rilru pu chung zelin i tlawmngai zel ang u.