Kan veng chhungah YMA member kan \hahnem viau. Chutih laiin Tlawmngai Pawla tel kan ni tih inhre miah lo hi a zatve aia tam mah kan nih a rinawm. Kan tlawmngaihna a inchen lo ang bawkin kan tlawmngaih theina kawng pawh a in ang kher awm love. Mahse, eng kawng maha tlawmngaih tum ve lo hrim hrim, YMA member ni ve duh tlat si, a bik takin \halai zingah kan la awm hi chu inenfiah deuh chu kan ngai lo maw?
Tlawmngaihna tih thu mal kan hriatfiah dan leh kan pawm dan hi a inchen lo viau ang. Tunlai mi, a tam zawk hi chuan kan hunawl neihah chauh mi dangte tana ke pen chhuah hi kan tum niin a lang. Tlawmngaihna dik tak chuan “Phut let nei miah lova, mahni hna \ul leh tihtur pawimawh tak tak pawh kalsana, mi dangte tana tha leh zung senga inpekna” hi a kawk awm e.
Tunlai khawvel changkang zelah tlawmngaihna lantir theihna hun leh hmun kan nei tlem tial tial a, kan neih chhunah pawh kan thawk tlem hret hret zel niin a lang. Mitthi lumen, Khawhar in kal leh Thlanlaihte hi a langsar zual chu a ni ta mai awm e, hengah chauh tal hi chuan \an i la thar leh ang u. Mi dang tana Malsawmna nih hi kan Pathian duh zawng a ni tih pawh hriat a \ha khawp mai.