Khawvel hmun dang zau zawka kan thlir chuan Hmasawnna hian thil chi hrang hrang puak chhuah a nei a, chung zingah chuan Ruihhlo leh a kaihhnawih thil dang sualna pawh hi a langsar ber a ni hial ang.
Thiamna leh finna a sang zel a, khawl changkang ber ber hmangin kan nung, kan che vel a ni ta ber mai. Mizote ngei pawhin heng changkanna leh hmasawnna te hi kan ban pha ve ta reng mai. Mahse, a hmandan kan thiam lohna hian harsatna chu min thlen mek zel bawk si a ni. Kan rilru chhungril changkang si lovin, kan bungrua (mobile phone, computer, internet) lamah changkan hmasak kan tum a, kan zo lo, kan chhiatpui mek zel a ni.
A tangkaina leh a nih dan tur ang taka kan hman thiam hmain changkanna hmanrua chi hrang hrangin kan sitting room a rawn thleng a, thatchhiat phah nan te, sual tihna hmanraw tangkai takah te kan chantir ta vel a ni ber mai.
Hemi kawngah hian ngaihtuahna thui taka sen a tul khawp mai. Kan khawsakna mil tawka nun thiam a pawimawh. Mahni zawn theuhah hmasawnna tur kan nei ang, kan rilru lam inpeih hmasa zetin changkanna rahbi hi zawh ve i tum zawk ang u.