Hetianga kan hunpui lo thleng tur hi YMA member-te hian engti angin nge kan lo hmuah a? Engtin nge hman kan tum? tih hi zawhna pawimawh tak leh ngaihtuah ngai tak a ni. Kristian kan nihna atang chuan Kohhran hunruat anga hman mai hi kan tih makmawh a ni a, chumi piah lamah chuan YMA member-te hian tihtur pawimawh tak kan nei.
Krismas kan hman chhan hi Isua Krista, mihringte sual tlan tura khawvela a lo pian champha a ni a. Mi dangte tana inpekna chhinchhiahna a ni. Chutiang chiah chuan he hun ropui tak hi mi dangte tanpui nan leh mi dangte tana inpekna hunah i hmang ang u.
Kan hunpui lo inher chhuahlai hian mihring nun a zalen a, nun kawng sual zawh mai a awl thin. Kan nun hmang uluk ila, dam chhunga kan inchhir lehna tur thil tih nana hmang lo tura fimkhur a tha khawp mai. Rei lote atana nawmna hian dam chhung atana hrehawmna a thlen thei tih hriain mahni leh mi dangte tana tha tur zawnga hman hi a pawimawh hle.
A bik takin kum lama naupang zawk leh nula leh tlangval tan nun fimkhur a tha hle. Nu leh pate leh mahni in chhungkhura khawsak tam a fuh ber fo. Fianrial hun neih tam hian sualah min hnuk lut fo tih hriat a tha awm e.