Pathian hruaina leh awmpuina zarah Sahmulphah Thla kan lo chuangkai leh ta reng mai. Kumin chhung hian kan Branch YMA chuan hmalakna kawng hrang hrangah a nei hnem viau mai.
Chutih rual chuan, hriat lawk loh, YMA te’n kan ngaih pawimawh ber tur ni bawk si, Thihna pawh kan tawk hnem hle mai. Heng YMA hmalakna leh ke penna hrang hrangah te hian engchen chiah nge tha leh zung ka thawh ve tih hi inngaihtuah a tha khawp mai.
Mihring khawsak phung a inang tawh lo hlawm viau a, eng kawngah mah hian pheikhai chu a rual tak tak thei tawh lo tih chu kan hrethiam tlang vek ang. Tlawmngai tura thalai thenkhat te’n hun kan neih tawh loh dante pawh inhrilh nawn ngai loin kan hre deuh vek. Nikhat lek pawh chawl thei tawh lo khawpa eizawnna kawnga buaite kan ni ta fur mai.
Hetih mek lai hian kan chunga Thihna lo thleng tur chu tuman kan pumpelh thei bawk si lo. Kumin chhunga mite chunga kan tlawmngaihna ang chiaha rulh ve tur hi ni ta ila kan lungawi meuh ang em? Chhuanlam siam mi hi chuan an siam reng mai a, mite thatna hi an fak viau rualin tih ve tumna pawh an nei lem lo. Kan tlin tawk theuh kan thawh mai hian kan la inpeizawn thei viau. Mahse, mahni phak tawk pawh tih tum lo hi kan thahnem ta lu deuh chu a ni lo maw? Kum a tawp ruai chu a ni tawh na a, rilru i siam thar leh ang u. Mi dangte tana Malsawmna ni turin inbuatsaih thar leh theuh ang u.