Ni 8.3.2012 (Ningani) khian Aizawl Civil Hospital-a hman turin kan Branch YMA chuan thisen pek runpui Chanmari West Govt. Middle School-ah neih a tum a. Section hrang hrang hruaitute’n a pe thei tur an rawn zawng dawn a, a tam thei ang ber lo inpe tura ngen inni, hruaitute hnena hming pe remchang hman lo pawhin, a hmunah hian kal a, pek mai tur a ni. Tun atang hian memberte pawh lo inla ‘fit’ tura ngen inni a, Member a tam thei ang ber midangte tana thisen pe tura sawm inni e.
ZCC NEWS
@ Ni 20.2.2012 (thawhtan) zan inkhawm ban hian All India Radio-a hla khung tur, Pu Nundanga inah zir tur a ni a, member leh hruaitute kim taka kal vek turin an inhriattir.
@ Member thar lak mek a ni a, Culture lama tui mite inpe theuh turin an sawm.
@ Ni 20.2.2012 (Thawhtan) hian MCO General Assembly leh Election neih a ni dawn a, Club aiawh turin mi paruk an tel ang.
Thlanmual Sub-Committee
1. Ni 17.2.2012 zan khan an Assistant Secreretary Tv Lalhriatzela (Sena) Chawngbawla Section-te inah meeting pawimawh tak neih a ni.
2. An Vice Chairman Pu PC Lalawmawia'n thlanlaihna a hman turin Lungral tha tak mai a pe chu lawmawm an ti hle.
3. Ni 20.2.2012 (Thawhtan) zingkarah khian Thlanmualah thing thlak hnatlang neih tur a ni a. Thlanmual Sub-Commttee Memberte kim tak a kal tura ngen kan ni e.
4. Vengchhungin chhiat kan tawhin, tlawmngai a thlanlai tura chhuak tlangvalte hma taka kal thin turin an ngen.
Lawmthu sawina
Pathian venna leh kaihhruaina azarah V/C leh Local Council term kum thum chu ka hmang zo ta der mai a, khawtlangah tling lo takin NGO leh mipuite tawiawmna avangin Pathian hnenah lawmthu ka sawi tak meuh meuh a, kum thum chhung tling lo taka ka hruainaah khawtlangah buaina lian tham engmah a awm lova, furah leimin nasa a awm lova, kangmei chhuak a awm lo bawk a, thubuai lian tham kan tawng lo bawk. Heng avang hian kan veng vanneihzia hi ropui ka ti hle a, Pathian hnenah lawmthu ka sawi nawn leh a ni.
Tun tuma Local council kan thlan leh turah pawh hian hruaitute tluang taka an kal zel theih nan duhsakna ka hlan e.
Vanlalhuma
Chairman, Local council