Ni 12.9.2012 zan khan Chanmari West Branch YMA Executive Emergency meeting Pu T. Ngurkhumate inah an thu. He meetingah hian YMA chu tanpui ngaite tanpuitu a nih avangin chak tak a hmalak zel ni se a ti a, chuta tan chuan Branch YMA Relief Fund siam ni se a ti.
Branch YMA hian sum vawn dan fel tak neiin sum a vawng thin a, audit pawk kum chanve leh kum tawpah neih thin a ni. Tun tuma Branch YMA Relief Fund siam tharah hian Account hran vawn tur a ni a, mi tupawh tanpui duhna nei chuan he account-ah hian pawisa an thawh thei dawn a ni. Tunah pawh hian Chawngbawla Section-a mi tlawmngai pakhat chuan he relief fund atan hian Rs 30,000.00 zet a chhung lut a, mi dang tan pawh hetiang a sum pek zel hi a theih dawn a, chu sum hmang chuan tanpui ngaite chu tanpui a ni thin dawn a ni.
Ramhlun Vengthar leh Complex-in leimin an tawrh chungchangah Central YMA in Aizawl khawpui chhung Branch YMA te chhungkaw tinah pawisa khawn tura min ngenna chu tih hlawhtlin ngei nise a ti a, Branch YMA chuan Section hruaitute kutah a khawn hna hi a dah a, Ni 26.9.2012 ral hmaa Branch YMA hnenah theh lut vek turin a ngen a ni.
Central YMA in Inter Branch YMA Volleyball Tournament a buatsaih chu theih ang tawka inbuatsaih zel a ni a, Section hrang hrangte an mamawha hman turin Rs 1000.00 theuh thawh turin a ngen a, inkhelh en hunah pawh vengchhung mipuite tawiawmna leh sum leh paia pui thei tan theih ang anga pui turin an ngen.