Chanmari West Local Council chuan Chanmari West veng huam chhungah ran neituten an rante khuahkhirh tlat turin a ti. Sawrkar dan ding laiah chuan ran hi enkawl lo va chhuah mai mai a phal lo va, khuahkhirh tlat tur a ti a ni. Chanmari West veng chhungah hian ran khuahkhirh lo va tuallai leng mai mai hmuh tur a tam hle a, mi in bul leh kawngpui velah an e nasa a, chu mai bakah ran thenkhat chu a bengchheng hle bawk a ni, hei vang hian ran hi uluk taka khuahkhirh tlat a ngai a ni Hetihlai hian Chanmari West Branch YMA pawhin ran khuahkhirh tlat hi a duhthusam a ni a, Section thenkhat chu ran chhuak vengin an duty thin a, nasa zawka hmalak pawh an tum mek zel a ni.
Tunah hian Chamari West Local Council chuan Ui chhuak man a nih chuan Rs 200 leh Ar chhuak man a nih chuan Rs 50 ran neitute chawitir turin thuchhuah a siam ta nghe nghe a, veng chhung mipuite pawhin thuawih taka ran chhuah mai mai lovin tha takin ran i khuahkhirh tlat ang u.