Ni 25.1.2013 (Zirtawp) zana CWBYMA Kumpuan Sub-Committee thukhawm chuan Central YMA-in kaihhruaina a siam anga Ram leh Hnam Humhalh kawngah theih tawpa veng chhungah hma lak nise tiin a rel a, Foreigner, dan lova lo lutte Mizorama an tlangnel loh nan Khua leh tui dik takte chauh In luahtir tur a ni tia Central YMA-in kaihhruaina a siam chu Chanmari West veng chhungah pawh zawm ngei nise a ti.
Central YMA chuan kum 7 chhung zet mai kum puan atan Ram leh Hnam Humhalh chu a lo hmang tawh a. Kum 2013 YMA kum puan atan pawh he thupui hi thlang nawn lehin, YMA member tinte thahnemngai leh zual turin a sawm.
Chanmari West Branch YMA Kumpuan Sub-Committee, Pu K Darthantluanga Chairman-na hnuaia thukhawm chuan kumin chhungin Ram leh Hnam Humhalhna kawngah kan Branch chhungah theihtawp chhuaha, hmalak ni se a ti a. Kumpuan Sub-Committee hian hmalakna tur hrang hrang a duang a, hengte hi Branch Executive pawmpuina hmuh a nih hunah chak zawka bawhzui tum a ni.
Central YMA-in Kum Puan ‘Ram leh Hnam Humhalh’ tha taka bawhzui a nih theihnan Branch, Group leh Sub-Headquarters te tan ruahmanna chi hrang hrang a siam a, heng kaihhruaina zulzuia hmala tur hian khua leh veng hrang hrangte a ngen a, Kumpuan bawhzui tha Group leh Branch-te hnenah Central YMA chuan lawmman pek a tum a, CYMA-in kaihhruaina a duante chu:
i) Inchimralna hrang hrang laka kan inven nan leh leilung fate’n kan chanvo dik tak kan chan theih nana hmalak
ii) Zu leh ruihhlo do kawnga hmalak
iii) Ram leh hnam humhalh a nih theih nan ei leh bar zawnna kawngah leh kawng hrang hranga kan intodelh theih nana hma lak.
iv) Hnam nun kal sual tur laka inhumhalh nan leh hnam nihna (identity) a boral loh nana hma lak
v) Ram ro hlu - thing leh mau, nungcha, lui tui leh boruak humhalh
Kum puan Sub-Committee chuan an hmalakna kawng hrang hranga theihtawp chhuahpui tur leh hma lakpui turin section YMA leh veng mipuite a ngen a ni.