Ni 2.9.2012 (Pathianni) zing dar 6 pelh hret ah khan Chaltlang kham kawng ko chu a min a, footpath delh chhiain Chanmari West lamah lung lian tak tak chu a lum thla a, heng lum lum hian kan veng chhung in eng emaw zat a ti chhia a, nunna chan chu vanneih thlak takin an awm lo hlauh a ni.
Lung lo lum thla hian Pu Rochharliana in chu a deng chhe nasa ber a, a sira UPC Biak In pawh a deng chhe nual bawk a ni. Pu Lalbiakmawia Ralte inchung deng chhe leh bawkin, Pu Mosia in ban a deng tliak bawk a ni. A thlang lama awm Pu Remsangpuia in pawh a deng chhe nual bawk a, Pu T. Zorampela in bang hrut thla lehin Pu JH Pahlira (L) in kawtah lung lian tak chu a ding hram a ni.
He thil thleng hi hriat a nih veleh Minister Pu Nihar Kanti Chakma, Bialtu MLA Pu Lalthanzara leh official te chuan an tlawh nghal a, sawrkar pawhin a theih ang angin hma an la nghal a ni.
Ni 2.9.2012 tukthuan eikham khan kawngpuia lung chu PWD-in paih fai hna an thawk a, nileng pawhin an zo hman lova, a tukah an paih fai thei hram a ni. Veng chhungah pawh Pathianni khan hnatlan tan a ni a, Pu Rochharliana in atanga bungraw thiar theih theih chu thiar chhuah a ni. Thawhtanni atanga tunkar chhung zawng hian bawlhhlawh paih leh in chhiate siamthat hnatlang a ni thin a, hnatlang pawh an thahnem thei hle.
He chhiat tawh pual hian mi thahnemngai ten thil pek hrang hrang an pe a, veng chhung nu leh pa, nula leh tlangval ten siamthat hna an thawk a, heng mitechungah Branch YMA chuan lawmthu an sawi a ni.