Ni 23-25, October 2012 hmang hian YMA General Conference chu Kawrtethawveng khuaah hlim takin hman a ni a, rorel pawh tluang taka zawh fel a ni. Kumpuan atan hian Ram leh Hnam humhalh pawm leh a ni. Chanmari West Branch YMA chuan member kal kan tam theih nan kal man chawi ngai lo turin ruahmanna a siam a, chuti chung chuan Mi 7 chauh an kal thei a, kal nan hian Pu RL. Thanhnuna leh Pu RK. Rozidingate chuan phal takin an motor an thawh a ni.
He Conference-ah hian palai mi 4039 (Riak 2937 + lang 1102) an kal a, Serhmun branch chu member 435-ah 127(29.1%) an kal a, kal tha ber an ni. Member boral mi 606 sunna hun hman nghal a ni. Rorel palai 758 an ni a, an rorel thenkhat te : YMA khawih 1. Mizo mipuite inpumkhatna tichhe thei zawng leh Mizoram thendarh zawnga chibing hmalakna reng reng tihtawp a nih theih nan YMA in hma la rawh se. 2. Ram pum huap faina beihpui thlak turin Central YMA in hma la rawh se. 3. Sawrkar atanga development work veng/khua tana lo kal thin hi, tha leh rotling zawka thawh a nih theih nan YMA in hma la rawh se. 4. Mizorama piang ni lo, foriegner-te birth certificate pek an nih loh nan hmalak ni rawh se. 5. Human trafficking dona kawnga kan chak zawk theih nan YMA in hma la rawh se. 6. Electoral roll dik leh felfai tak kan neih theih nan YMA in dik leh uar zawka hmalak ni rawh se. Sawrkar khawih lam 1. Mizoram chhunga quarry awmte hi mihring tan an hlauhawm loh nan YMA in a tul angin hma la rawh se, 2. aizawl khawpui laili, Assam Rifle chhuahsan tur ram hi mimal hnena pe lo tur leh pek tawh sa pawh cancelled turin leh tangkai taka hman a nih theih nan humhalh turin sawrkar ngen ni rawh se. 3. Branch YMA tinin area-a motor kawngpui kamah uar zawka thingphun nise, tin, kawngpui kam, mimalin an neih thin hi sawrkar dan dinglai ang areserved a nih zel theih nan sawrkarah thlen ni rawh se. 4. Tribal Certificete pek chhuah chungchangah YMA te hriatpuina a tel theih nan sawrkarah thlen ni rawh se tih te a ni. Kumpuan pual atan member tinah Rs 3 zel khawn leh tum a ni a, Budgetah Rs 83,66,352 pawm a ni. Palai thlah zanah hian Lungdai mi hnamdang kuta thi Pi Lalawmpuii tawrhpui leh tanpui nan thawhlawm khawn a ni a, Rs 42,827 hmuh a ni. Nakum Conferece chu Khawbungah nghah a ni ang.
Kan Branch YMA Secretary Pu R.L.Thanhnuna chuan Kum 15 chhung Branch Office Bearer nihna a lo chelh tawh avangin, YMA General Conference Kawrtethawveng a neihah Central YMA atangin hruaitu hlun chawimawina a dawng. Ti hian kan Branch din tirh atangin kan hruaitute zingah hruaitu hlun chawimawina dawng mi 4 kan nei tawh a ni. Pu Hnuna hian kan Branch YMA ah heng post hi a lo chelh tawh te a ni.
Secretary : 1996 - 2002, 2005, 2010 - 2012. (Kum 11 chhung)
Asst.Secretary : 1994, 1995, 2008, 2009. (Kum 4 chhung)