Kumin chhungin kan veng thlanmualah mi 30 kan thlah liam ta a, ruang hmun danga chhuak hi 10 chuang a awm tawh bawk a, kum dang ang bawkin kuminah pawh hian chhiatni fund-in min daih dawn lo niin a lang.
Kuminah hian chhiatni fund-a kan hmuh tawh zawng zawng leh nikum a kan hman bang awm chu Rs 3,33,860.00 a ni a, kan hman tawh hriat theih chin chu Rs 3,06,994.00 zet a ni tawh a, pawisa fai Rs 26,866.00 chauh a awm tawh a, ba dang pek leh phei chuan hei ai hian a la tlem lehzual ngei ang.
Kumina kan veng thlanmuala mi 30 kan thlah liam zingah hian lumen ngai chu vawi 16 a ni a, lumen a nih hian mitthi pakhata kan sen zawng zawng hi Rs 8000 - Rs 9000 vel a ni thin a, lumen loah chuan hei ai hian a tlem deuh thin. Chhiatni fund hi mitthi vuakvet bakah thlanmual in leh bungrua atan te, information mike atante hman a ni thin a, a bak chu khawi dangah mah hman pen a ni ngai lo a ni.
Hetiang hi kan dinhmun a ni a, nikum anga mitthi 40 laite kan la nei a nih chuan tuna kan sum dinhmun hian kan mamawh min phuhru zo dawn lo niin a lang a, amaherawhchu, Branch YMA committee an la thu leh lo va, an thut hun chuan kan veng chhungkaw tin hian chhiatni fund hi thawh belh leh ngei kan ngai dawn ni niin alang a, chuvang chuan chhungkaw tinte lo inrin lawk ni se a lawmawm hle ang.
CONFERENCE - 2013 KAL DUH TAN
October ni 15 - 17 chhungin Khawbungah YMA General Conference neih a ni dawn a, kumin hi inthlan kum niin, kan branch treasurer Pu R Lalhmachhuana’n finance secretary a chuha tling ngei turin branch chuan a duhsak.
Kan branch atanga member kal turten September ral hmain secretary Tv Zairemmawia emaw mahni awmna section secretary hnenah hming pek luh tur a ni.
Leimin vangin In pakhat chim
Ni 20.9.2013 tlaia Taitesena Section huam chhunga Pu R. Rosanga in chhungkaw pahnih luah chu leimin vangin a chim a, vanneih thlak takin thi leh hliam an awm lo.
He chhiattawhna hi hriat a nih veleh veng chhung mi tlawmngaiten senghawi hna hi thawh nghal a ni a, he in luahtu Pu Ralkhama chhungkaw member pathum leh Pu Lalremtluangate chhung member pathum bawk hian an bungrua zawng zawng chhe vekin an chan a ni.
Disaster management committee leh Chanmari West Branch YMA chuan chhiattawkte chhawmdawl nan hian chhungkaw tinin tanpuina pek nise a ti a, tanpuina hi mahni remchanna hmunah remchan ang tawk tawk September thla chhung hian pek theih a ni. Tanpuina pekna hmun turte : Taitesena Section-ah Pu C. Lalmuankima, Khuangchera Section-ah Pu Lalrinliana (Sir Tea) leh Pu KC. Gangte, Neuva Section-ah Pu Lalliansangpuia, Chawngbawla Section-ah Pu Lalruatsanga leh Vanapa Section-ah Pu Vanlalvena hnenah pek theih a ni.