September ni 5-a CM Running Trophy in Cultural Dance Competition kan hmachhawn tur atana section-te inbuatsaihna leh intihsiakna chuan Ni 9.8.2013 (Zirtawp) zan khan a vawrtawp a thleng ta.
Zirtawp zan dar 7:00 khan Indoor Stadium-ah intihsiakna hi neih a ni. He hun hi Pu RL Thanhnuna, Organising Comt Chairman-in a kaihruai a, Tv Zairemmawia, Secy CWBYMA hnen atangin report tawifel tak ngaihthlak a ni a, Pu C Lalzarliana, CWBYMA President-chuan tawifel takin he intihsiak hi a hawng. Kar leh maia intihsiak tura inbuatsaih mek Branch YMA Zaipawl hnen atangin zai mawi tak ngaihthlak zui nghal a ni.
Intihsiak tan a ni a, Taitesena Section-in Chaiin bul an tan a, Khuangchera section-in Khuallam in hnu an khar. He intihsiak hi veng mipuiin kan hlut hle, kut benga lawm au thawm a tha thei khawp mai. Art & Culture Dept atanga endik tura sawmte uluk takin kan intihsiak hi min endik a, endiktute chungah Branch YMA chuan lawmthu a sawi. He intihsiaknaa rawn tel zawng zawngte chungah hian Branch chuan lawmthu a sawi a, CM Running Trophy-ah theihtawp chhuaha lam ngei turin a beisei bawk.
Hetiang hi intihsiak result chu a ni.
CHAI
Section Points
1 Khuangchera 361
2 Taitesena 340
3 Vanapa 339
4 Chawngbawla 334
5 Neuva 334
KHUALLAM
Section Points
1 Khuangchera 356
2 Vanapa 339
3 Neuva 338
4 Chawngbawla 338
5 Taitesena
OVERALL
Section Points
1 Khuangchera 717
2 Vanapa 678
3 Neuva 672
4 Chawngbawla 672
5 Taitesena 340
Branch YMA Zaipawl ngawrh takin an inbuatsaih
August Ni 13 atanga tan tur Pu Rukunga hlate hmanga Branch YMA zaipawl intihsiaknaa tel turin Chanmari West Branch YMA Zaipawlte chu theih tawpin an inbuatsaih mek zel a. Tunah hian Zaipawl hi mipa 25, hmeichhia 17 leh conductor 3 an ni mek. Kar kalta chhung khan Camp neiin zing leh zanah hla an zir thin a, tunkar chhung hian zan lamah Pu VL Thakima, Pu R Lalhmachhuana, Pu T Bualzika leh Pu F Rosiamliana te inah hla an zir a, Inrinni khan nilengin Pu Lalrinliana inah hla hi an zir leh a ni. Hla zir nana phal taka an in hmantirtute chungah Branch YMA chuan lawmthu a sawi.
CWBYMA Zaipawl hi August ni 14 chawhma lam hian Central YMA Hall, Tuikhuahtlang ah an zai ang. He intihsiakna atana inbuatsaih chhung zawnga Zaipawlte tanpuina petu leh a tul apianga buaipuitute chungah Branch YMA chuan lawmthu a sawi tak zet a ni.