Aizawl North III bialtu Pu Lalthanzara MLA chuan a fund atangin kan veng High School thuam that nan Rs 1,00,000.00 (Cheng Nuaikhat) a pe a, Chanmari West Local Council chuan veng aiawhin lawmthu an sawi a ni. He sum hmang hian High School building chu tha zawk a thuam tum a ni.
Chanmari West leh Hunthar inrina laia ramri chhinchhiahna chu hun eng emaw lai khan mi tu tih hriat lohin an ti chhia a, chuvang chuan hun eng emaw chen chu welcome sign board tar loh hian a awm tawh a, nimin Inrinni zingah khan Branch YMA te nen lungphun chhinchhiahna siam thar a ni.
Kan veng chhunga hnamdang (Vai) permit Sponsortu ten Sponsor man Aizawl City Local Council Association thu tlukna angin Permit pakhat ah Rs. 200/- zel lak tur a ni e.
Veng chhunga in tinte mahniin leh a vel vawng fai theuh turin a ngen thar a, ui leh ar pawh nasa zawka khuahkhirh anih theih nan hmalak zel tum a ni a, hun remchang hmasa berah ui leh ar chhuakte hi vai a ni ang.
Khua a lo thal dawn ta a, chhungtinte kan electric wiring te, Gas pipe te leh K. Oil Stove te check uluk a, kang nei chhuak thei veng turin veng chhung mipui zawng zawngte Chanmari West Local Council chuan a ngen a ni.