Chanmari West Branch YMA Executive-in a lo rel tawh angin Ni 19.12.2012 (Nilai) zan inkhawm ban khan Advance Krismas leh Carol Service hman a ni. Hun bul lam hi YMA Zawlbukah hman a ni a, Pu T. Ngurkhuma Branch YMA President-in a kaihruai.
He hun hi ruahmanna hmasaah chuan Ni 18.12.2012 zana hman tuma a ni a, remchan zawkna avangin Ni 19-ah hian sawn a ni. Pu Lalthuamluaia Branch Executive member chuan hunserh a hmang a, Pu R. Lalhmachhuana Branch YMA Vice President-in kumin chhunga kan veng mi 40 chatuan ram pan tate sunna hun hman chu a kaihruaia a, sun nan hian ngawireng a din hnuah, Salvation Army, Chanmari West Corps Brass Band in thiam takin ‘Ram eng mawi’ tih mawi takin an tum bawk. Mi harsate pualin thilpek lakkhawm a ni a, heng sum leh Relief fund atang hian kan veng chhunga mi 15-te hnenah tanpuina sem a ni.
Zawlbuka hun hman zawh hian zai turin kal chhuah a ni a, Pi Thangzeli ‘N’ kawtah zai tanin, Pu Dengthanga ‘K’ kawtah zai leh a ni a, thuchah tawi Pu K. Lalremruata hnen atangin ngaihthlak a ni.
Pu S. Lalmama ‘K’ kawtah zai leh a ni a, Pu Lalrinliana ‘K’ kawtah zai lehin Pu PC. Pakunga hnen atangin thuchah tawi ngaihthlak leh a ni bawk.
Pu Lalrinliana kawt atang hian kal chhoin Pu H. Lalthlamuana ‘T’ kawtah zai leh a ni a, CV Library kawtah zai lehin Pu Sangthuama Rawite-in thuchah tawi a sawi leh bawk. Pu P. Zakhuma ‘T’ kawtah zai leh niin, Pu R. Rokima ‘CH’ kawtah an zai leh bawk. Vana pa Section lamah kal thlain Pi Mankungi ‘V’ inchungah an zai leh a, Pu HVL. Zarzoenga hnen atangin thuchah tawi ngaihthlak leh a ni a, tichuan Vana pa Section tawp hrut lehin Pu Runa Mualah zai leh a ni a, heta tang hian YMA Park pan phei leh a ni a, tual meipui ai pahin Sawhchiar tui tak pirho a ni. Ei leh in lam zawh hnu hian hlim takin zaiho leh a ni a, Pu C. Lalzarliana kaihhruaina hnuaiah Pu HVL. Zarzoenga’n tawngtaiin hun a khar ta a, Dar 1:30 velah memberte an tindarh ta a ni.
Hetia tuallaia zaia hun hman lai hian hruaitu thenkhatten YMA Motto angin tanpui ngaite tanpuina pawisa an lo sem a. He huna kal nu leh pa leh thalai zawng zawngte chungah leh eitur tui tak siam saktute chungah lawmthu an sawi a, mi inphalte avangin YMA chuan mi dangte an tanpui theih phah a ni.
CHIBAI BUKNA
Kumin Krismas lo thleng turah vengchhung mipui zawng zawngte Chanmari West Branch YMA chuan Krismas chibak kan buk che u a, hlim leh lawm taka hmang turin duhsakna sang ber kan hlan a che u.
LPS Samari mi tha
Nimin khan kan vengah LPS Samari mi thate rawn kalin tanpuina an rawn sem a, kan Branch YMA hruaituten an lo tawiawm a ni. Hetianga mi dangte tan inpe an awm hi a lawmawm in a ropui hle a ni.